الفصل الرابع عشر...... فين الشوال يامحمد

(محمد) أصل أصل أنا كاتب قايمة بالعفش اللي فوق

(أم محمد) تصرخ قايمة يخرب بيتك أجرنهم كل شوية بيت بنتنا بيت اختي

(محمد) مهو يا أمه زنقوني قبل الفرح بكام يوم ولازم تكتب قايمة قلت لهم الاتفاق مع أبويا وأمي مفيش قايمة

قالوا وأنت مخونا ليه دي حفظ لبنتنا مش أكثر

(أم محمد) ياخرابي ياخرابي

(محمد) فيه أيه بس يا أمه

(أم محمد) فيه أيه معاك صورة من القايمة

(محمد) لا معهم

(أم محمد) تصرخ أنت ايه أنت عملي الأسود

مكتوب فيها ايه القايمة دى فاكر ولا مضيت على بياض

(محمد) والله يا أمه كل حاجة مكتوبة فيها حتى اكرة الباب كتبنها

(أبو محمد) والله أنت من الأول خلفتك خايبة والله لو كنت خلفت بنتين كان أحسن من خلفتك

(أم محمد) ملحوقة العفش كله فواتيره معايا وكان المحامي قالي أيام قضية الطرد طالما العفش باسمي ممكن ارفع قضية وأخرجهم بالهدوم اللي عليهم

(أبو محمد) واحنا ناقصين قرف محاكم وقضايا ووجع قلب

(محمد) يا أمه خلينا قاعدين في شقتنا عادي وأوعدك أن سهير تسمع كلامك والله ومش هتعارضك أبدا الله يخليك بلاش بهدلتنا عشان خاطر حفيدتك على الأقل

(أم محمد) تضمنها ازاي دي مراتك تربية قذرة ناس طماعة عينهم فارغة

(محمد) هحاول والله أغيرها

(أم محمد ) ياريت احنا نكره كله لمصلحتك وياريت تخليها تركب وسيلة وبلاش عيال ثاني لمدة كام سنة لحد ماتتضح الرؤية

(محمد) حاضر يا أمه حاضر

(أبو محمد) اطلع شقتك وقول لمراتك ممنوع تنزل هنا الا لما الحاجة تقولها وأنت لما تحب تدخل ترن جرس سامع

(محمد) حاضر حاضر

(أبو محمد) يلا امشي من هنا

(محمد) حاضر مع السلامة

صوت خطوات وباب يغلق

وصعود سلم

(أبو محمد) يلا يا حاجة ملناش دعوة بيهم خلينا في حالنا وهم في حالهم

(أم محمد) والله ياحاج أنا في حالي بس هم يسبوني في حالي

(أبو محمد) طيب يلا نتغدى ولا علقة سهير نسيتك الطبيخ

(أم محمد) تضحك وتنادي يا فاطمة تعالي عشان نتغدى

سهير تفوق من النوم وتفتح عينيها أنا فين أنا فين

وتصرخ أبعد عني أبعد عني

(محمد) فيه أيه يا حبيبتي فيه ايه أنت بتحلمي ولا أيه

(سهير) أنا فين وأنت مين؟

(محمد) أنت في شقتك وأنا محمد جوزك حبيبك

(سهير) أمك

(محمد) بإستعباط مالها

(سهير) ضربتني

(محمد) أمي أمتى وفين دأنت كنت نايمة وبتحلمي

(سهير) أحلم ازاي والزراق اللي في ايدي ده حلم كمان

(محمد) لا ده لأنك وقعتي في الحمام امبارح

(سهير) وقعت مش فاكرة حاجة

(محمد) أحسن دي كانت واقعة جامدة قوي بس ربنا ستر الحمد لله عدت على خير

(سهير) أنت ناوي تجنني ولا ايه بقولك أمك ضربتني وشدتني من شعري كمان

(محمد) محصلش جايز يكون تأثير الوقعة أصلك وقعتي على دماغك

(سهير) امشي أخرج برة الأوضة

(محمد) طيب قومي دأنا جايب سمك لوز يستاهل بُقك يلا وكمان طبخت الرز آه من الحق ابقي شوفي شوال حطي الرز فين أصله اتقطع مني وحطيت الرز في طبق الغسيل ورميت الشوال في الشارع

(سهير) امتى كل ده حصل

(محمد) مهو أنت كنت نايمة تعبانة من الوقعة أصلك وقعتي على دماغك وصعبتي عليا أصحيك فطبخت أنا

(سهير) يارب الرجل ده ناوي على جناني

وتحاول تقوم لكن لسه مسطولة من تأثير قطعة الافيون

(محمد) أحسن عشان تبطلي تستقوي بأهلك وكل شوية تهددي بيهم أهي أمي علمتك الأدب أنت وأهلك صحيح أنا مش عارف عملت فيك أيه خلتك كده شبه اللي راجعين من القبر بس أحسن يارب تتعلمي بقى

صوت ملاعق وشوك ومضغ طعام

(أم محمد) خلصي أكل براحتك يا فاطمة أنا مرهقة جدا هدخل أريح شوية

(فاطمة) لا أنا هغسل المواعين وأحصلك على أوضتك يعني قدامك نص ساعة فقط ترتاحي فيهم وأطب عليك

(أم محمد) طيب بس خلصي والله يخليك بلاش تكسري نص الكوبايات والأطباق وأنت بتغسليهم

(فاطمة) بدلع ياسلام فدايا ياست ماما

(أم محمد) الدنيا كلها فداء ضُوفرك ياقلبي بس ابقى فكريني أخصمهم من جهازك وتضحك

(أبو محمد) ياحاجة عاوز أقولك حاجة عشان خاطري شيلي سهير وأهلها من دماغك البت غلبانة

(أم محمد) غلبانة دي عقربة ومحتاجة تتربى من أول وجديد والمهمة دي عليا

(أبو محمد) ياحاجة هتخربي بيت ابنك بلاش

(أم محمد) سيبها على الله ياحاج وروح نام

(فاطمة) أنا خلصت يلا بقى تعالي نكمل الحدوتة

(أم محمد) حدوتة هو أحنا كنا بنحكي حواديت

(فاطمة) آه قبل ما هادم الملذات ومفرق الأحباب يدخل علينا

(أم محمد) يعني أيه الكلام ده

(فاطمة) قبل سهير ماتيجي وتأخد العلقة التمام

(أم محمد) فعلا من ناحية تمام فهي تمام أظن بل أجزم هتقعد جسمها أزرق ووارم كده شهر ولا حاجة

(فاطمة) يبقي ننسى الست سهير وكملي كلامك عن الست أمك ممكن

(أم محمد) ليه مصرة على حرق دمي حرام عليكي

(فاطمة) عاوزة أعرف جيناتك

(أم محمد) مين فين ودي أيه راخرة

(فاطمة) عاوزة أعرف من مين أخدة قوتك وصلابة رأيك وحكمتك وغضبك السريع ودماغك الالماظ

من أبوك ولا من أمك

(أم محمد) أيه حكاية دماغي الالماظ دي

(فاطمة) ليه هو فيه حد غيري أكتشف سر الدماغ الألماظ

(أم محمد) إسلام

(فاطمة) البلطجي

(أم محمد) آه

(فاطمة) إسلام ده رجل بيفهم مع أنه شراني ومش بحبه

(أم محمد) ده غلبان

(فاطمة) إسلام!

(أم محمد) اي والله يابت اللي بيكسب فلوسه من الشر وهو عارف أنه بيؤذي الناس ومستسهل كده ومش بيفكر يكسب من دراعه وعرق جبينه يبقى غلبان

(فاطمة) طيب سبينا من الكلام ده وقوليلي هو فعلا أنت كنت متعقدة من أمك

(أم محمد) مين اللي قال الكلام الناقص ده

(فاطمة) سهير مرات أخويا محمد

(أم محمد) قومي ابت قومي قامت قيامتك روحي أوضتك وخليني أنام

باب البيت يخبط جامد وزعيق في الشارع

(أم محمد) هو فيه أيه مين بيخبط جامد كده هيكسر باب البيت

(فاطمة) مش عارفة

أم محمد قومي بصي من (البلكونة) شوفي مين ده

(فاطمة) الحقي ياماما دي أخت سهير

(أم محمد) يخرب بيتها دي جاية لقضاها بقى على رأي إسلام استعنا على الشقا بالله جيالك وأنت اللي جبتيه لنفسك فين الشوال يامحمد