الفصل السابع.... ملكة إنجلترا ياشيخة

ويصعد السلم سريعا ليجد أبو سهير وسهير عند الأم

(محمد) أيه اللي جابك هنا يارجل أنت موجها كلامه لحماه أبو سهير ويسترد في الكلام لك عين تيجي هنا ثاني ياشرابة الخرج

(أم محمد) عيب يامحمد ده ضيفنا

(محمد) موجها كلامه لزوجته سهير وأنت أيه جابك رجعتي ثاني ليه أنت مش هتبهدليني في المحاكم رجعتي ليه ياشاطرة ليه مروحتيش المحكمة ولا أبوك معهوش حق المحامي تحب ياعم الحاج اديك فلوس المحامي

(أبو سهير) عيب يامحمد احنا في بيتك وأنتم أهل الكرم كله

(محمد) غصبا عنك يارجل يارمة أحنا أهل الكرم والنسب اللي يشرف اي حد مش زيكم عرر

(سهير) لا أنت زودتها خالص يامحمد عيب كده

(أبو سهير) أخرسي يابت أنا بتكلم تخرسي أنت

(محمد) أيه مش عارف تأكلها جيت ترجعها أنا عارف هي قرش مصدي وهترجع ثاني

(أبو سهير) عجبك كده ياحاجة ساكتة ليه

(أم محمد) وهو حد فيكم احترم وجودي عشان اتكلم

(محمد) العفو يأمة والله بس الخلق العكرة دي لخبطت دماغي حقك عليا ياست الكل

(أبو سهير) الخلق العكرة دي أنت حفيت عليها عشان تجوزها

(محمد) يضحك بتقول ايه حفيت لا والله أنتم اللي حفيتوا ورايا عشان تلقحوا بنتكم ليا نسيت ولا افكرك من أول تسليط إبراهيم ابن خالتي عليا لحد اختها أم كلام ناعم زي الثعبان ولا أقولك أنت كنت بتعمل أيه عشان اتجوزها ياعمي

(أم محمد) خلاص يامحمد انتهى خد مراتك واطلعوا فوق عشان ترضع البت

(محمد) أخد مين زي مانزلت لوحدها ترجع لوحدها وتأخد البت ترضعها أهو نعتبرها زي الدكتور عبد القادر بتاع البهايم

(أبو سهير) عيب يامحمد دي مراتك أم بنتك

(محمد) يبقى ياريت ياحاج تفهم بنتك الكلام ده وأن الرجل رجل والست ست وتسيبها من أختها اللي مالية دماغها وتحاول تميل بختها وتخليها تعمل زيها

(سهير) مين أمتى ماكانت أختي عجباك ولا دلوقت بقت كوخة

(محمد) لا ياست البنات لا دلوقت ولا زمان أنا كنت بس مغيب كنتم واكلين عقلي لحد ما خلصتوا على اللي حيلتي وشحتوني ووصلتوني للقروض والسلف بالربا أعوذ بالله لكن دلوقت خلاص فوقت لكم واللي هيتكلم معي نص كلمة هفرمه

(أبو سهير) عجبك كده ياحاجة

(أم محمد) بص ياحاج هقولك حاجة قدام بنتك أظن أنت عارف أبويا وجدي كانوا مين وعارف جوزي أبو محمد يبقى من عيلة مين وهو أيه في الشارع صحيح هو صياد على باب الله بس اصل وفصل وعيلة وعنده مزارع سمك بتاعته ومعه الخير كله

(أبو سهير) عارف ياحاجة والعارف لا يعرف

(أم محمد) يبقى ياريت تقول لبنتك تلم الدور مش أنا اللي تناطحني الكلمة بكلمتها مش أنا اللي تبجح في وشي قولها عاوزة تعيش وتعمر هنا تلم نفسها وتعرف هي بتكلم مين؟

(سهير) ياسلام هكون بكلم مين ملكة إنجلترا

(محمد) أمي عندي أحسن من ملكات الدنيا عاوزة ترجعي تعيشي وسطينا تحترمي أمي قبلي وتتعاملي معها بما يرضي الله فاهمة ولا أبوك يأخدك زي ماجابك

(أبو سهير) خلاص يامحمد سهير عرفت غلطها ومن هنا ورايح هتعيش خدامة تحت رجلين الحاجة

(سهير) بتقول أيه يابابا أنت كده هتركبهم علينا

(محمد) ماحنا راكبين يابنت ال..... ومدلدلين رجلينا كمان وأمي مداسها على راسي قبل راسك

(سهير) من أمتى يأخويا؟

(محمد) من اللحظة دي إذا كان عجبك مش عاجبك انزلي مع أبوك والبت هتتربى أحسن تربية مع أمي على الأقل هتتربي في بيئة نضيفة

(أبو سهير) عجبك كده ياحاجة كلام محمد ده

(أم محمد) والله ياحاج بنتك السبب قولها تلايم الدور وتلم نفسها

(سهير) نعم يأختي شيفاني مبعترة

(محمد) من رأيي ياحاج تاخد بنتك وتمشوا بالسلامة

(أم محمد) بس يامحمد ده بيتنا بيت كرم مش بيت ناس جعانة وعينها فارغة خلاص خد مراتك واطلع شقتك عشان ترضع البت

(أبو سهير) وده عشمنا فيك ياحاجة

(أم محمد) بس قول لبنتك أنا خط أحمر اقسم بالله إذا حطيتها في دماغي همشيها تكلم نفسها في الشارع عارف وهيبة الغجرية اللي ماشية هبلة في بلاد الله أنا بقى همشي بنتك زيها إذا قربت مني ثاني

(أبو سهير) قلبك أبيض ياحاجة يلا أنا نازل وسهير عندك أهي زي بنتك خدي بالك منها

(أم محمد) تاخد بالها هي من نفسها ومن جوزها وبيتها وملهاش دعوة بيا عشان مترجعش لك ثاني ويعيني تضطر ترجعها عشان لقمتها

(أبو سهير) خلاص ياحاجة بقى السلام عليكم ورحمه الله وبركاته

(سهير) كده يابابا رخصتني مع دول

(أم محمد) دول يامقصوفة الرقبة هو أبوك عارف يأكل نفسه عشان يأكلك يلا غوري اطلعي رضعي البت خد يامحمد مراتك واطلع فوق

(محمد) لا يأمة تطلع هي أنا رايح القهوة شوية وكمان اشوف إبراهيم ابن خالتي فيه حساب بينا لازم يتصفى الأول يلا ياسهير خدي البت وأطلعي فوق

(أم محمد) حساب أيه اللي عاوز تصفيه مع ابن خالتك ايه عاوز تخسرني أختي كمان

(محمد) لا يأمه شوية كده وراجع لك سلام دلوقت

صوت نزول سلم وصوت فتح باب محمد قعد على القهوة شرب شاي وقام فتح الورشة وجاب منها شاكوش وقطعة خشب كبيرة

وراح لإبراهيم ابن خالته ونادى عليه تعالى كده وريني بقى كنت عاوز ايه مني يابطل

(إبراهيم) هعوز منك ايه يابن أمك

(محمد) ابن امي يابن ال.....

ومسكوا في بعض

والناس اتلمت وواحد ابن حلال راح لأم محمد ينادي الحقي ياحاجة أم محمد فيه معركة بين محمد وإبراهيم ابن خالته وجوز اخت مراته الحقي هيموتوا بعض

(أم محمد) تنزل جري على الشارع وتجري على ابنها تحاول اخده على البيت ويحاول إبراهيم ضرب محمد فالضربة تيجي على دماغ خالته أم محمد والدم يتناثر في كل مكان وتقع أم محمد في الشارع سايحة في دمها ويخاف إبراهيم ويهرب ويصرخ محمد حد يجيب الإسعاف بسرعة أمي بتموت ويحدث هرج ومرج في الشارع ويحاول الناس يكتموا الجرح ببن وتصل سيارة الإسعاف ويتم نقل أم محمد للمستشفى ويتم دخولها غرفة العمليات

ويتم عمل محضر بالحادث لكن أم محمد عندما يتم سؤالها بعد أن خرجت من العمليات وتمت افاقتها تقول أنها وقعت على دماغها عشان جالها دوار وهي ماشية وتنكر كلام الناس وكلام محمد أن إبراهيم هو الفاعل وتعرف سامية أختها أم إبراهيم بالحادث وتسرع على المستشفى للوقوف مع أختها بل تطلب منها الإبلاغ عن إبراهيم حتي يتأدب لكن أم محمد الأصيلة بنت الأصول ترفض وتطلب الخروج من المستشفى بعد حفظ المحضر وتعود لبيتها

ولا تجد محمد وتسأل عنه فيقول لها الناس أنه يبحث عن إبراهيم للانتقام منه فتتحامل على نفسها وتنزل بمساعدة سامية أختها للشارع بحثا عن محمد وعندما تجده تقسم عليه بالعودة معها للبيت وترك إبراهيم لحاله فهو ابن أختها وبمثابة ابنها مثل محمد لكن محمد يرفض ويقول لها لازم أخد حقك لكن الأم تصر وتأخد ابنها للبيت وتمنعه من النزول للشارع وتصر على وجوده بجوارها وهنا تظهر سهير بلسانها المتبري منها لتقول للأم ايوة عاوزة تضيعي الاثنين محمد وتخربي بيتي وإبراهيم وتخربي بيت أختي ياخرابة البيوت