الفصل الثالث عشر....لازم محمد يخرج برة

صوت فون وجرس طويل أم محمد ترد أهلا يا إسلام لا خلاص هات البت بنفس الطريقة تعالى بس نزلها قدام شقة محمد هو هيستناك قدام شقته وبعد كده أنزل خد باقي حسابك مني وخلينا على اتصال

سلام وتنادي يامحمد اطلع استنى إسلام قدام شقتك خد منه مراتك وفك الحبال من عليها الاول وبعد كده فك بُقها عشان لا تصرخ وقبل كل ده أقفل باب البلكونة كويس وطبطب عليها وحاول تحتويها وفهمها أن أبوها أجبن من أنه يأخد لها حق ولا باطل فتعيش بما يرضي الله وخلاص

يافاطمة اتصلي بعمك عثمان النجار قولي له يشتري لنا كالون باب جديد ويجي يشيل ده ويركب الجديد وأنت يا محمد متأخدش نسخة منه لما تعوز تنزل عندنا اضرب الجرس وأنا افتح لك

(فاطمة) المرة دي خطتك باظت يا ماما

(أم محمد) مين قالك ده الأمين محمود كلمني من قسم الشرطة وقالي إن أبو سهير والمغدورة أختها في القسم جايين يشتكوني وقالي إن طالما مفيش معهم سهير المضروبة مينفعش المحضر وقالي أنه مشاهم وخلاص وخوف أبو سهير وشخط في أختها عشان تلم نفسها

(فاطمة) الناس دول أيه نفسي أفهم عاوزين ايه

(أم محمد) عاوزين الشقة دول تقريبا قاعدين في الشارع عشان كده أنا كلمت المحامي وقالي لازم محمد يخرج برة البيت يأجر شقة وان شاء الله ادفع له أنا الإيجار المهم لازم يخرج عشان كده هخلي أبوك يتكلم مع محمد ويفهمه ويشوف له شقة إيجار جنبنا هنا وخلاص

(فاطمة) ويهون عليك محمد يبعد عن حضنك ماما

(أم محمد) يبعد ولا يعيش مطحون زي الثور في الساقية من ابتزاز أهلها

(فاطمة) بس هو هيوافق على الخطوة دي

(أم محمد) لازم يوافق المحامي قال مفيش حل غير كده ومش كده وبس ده لازم كمان أجيب مستأجر غريب للشقة

(فاطمة) ياخبر ازاي يا ماما حد غريب يجي ويدخل بيتنا

(أم محمد) لا أنت نسيتي لما عملت قضية الطرد لأخوك أجرت الشقة لإسلام

(فاطمة) البلطجي أنت عاوزة إسلام يجي يسكن هنا

(أم محمد) لا ياحبيبتي المحامي قال ده عقد صوري يعني على الورق بس

(فاطمة) بحسب ياخرابي كده يبقى أهل سهير أرحم

(أم محمد) هو أنا هبلة أخرج سوحتجية وأسكن بلطجي لا طبعا

(أبو محمد) السلام عليكم ورحمة الله وبركاته

أيه يا أم محمد الكلام اللي سمعته تحت في الشارع ده

(أم محمد) كلام أيه خير

(أبو محمد) بيقولوا ضربتي سهير

(أم محمد) وأي حاجة تسمعها يا أبو محمد تصدقها تعرف عني كده برده

(أبو محمد) مهو أنا جاي أسمع منك أهو أومال بسأل ليه

(أم محمد) بدلع لا أنا زعلانة يا أبو محمد أزاي تصدق اي حد يقول عليا اي كلام وخلاص

(أبو محمد) بحنان ميهونش عليا زعلك يا حاجة أبدا

(فاطمة) فاطمة يا حنين لا أروح أنا أوضتي أحسن

(أبو محمد) أيه يا فاطمة غيرانة

(فاطمة) وفيه حد يغير من جوز الحمام دول

(أم محمد) حمام أيه يابت د احنا جوز عصافير يمام زغاليل

(فاطمة) يالهوي ياولاد كل ده ما قلت أدخل أوضتي أحسن

(أبو محمد) يابت ده أمك دي دنيتي وكل حياتي

(فاطمة) طيب ربنا يهني سعيد بسعيدة يلا لما تخلصي ياحاجة سعيدة أبقي تعالي نكمل حكايات إمبارح

(أم محمد) طيب يأختي

(أبو محمد) حكايات أيه ياحاجة اللي فاطمة بتقول عليها

(أم محمد) سيبك من فاطمة وتعالي أقعد كده عشان فيه موضوع عاوزة أكلمك فيه

(أبو محمد) ودي قاعدة قولي ياحاجة عاوزة أيه عاوزة فلوس

(أم محمد) لا فلوس أيه خيرك سابق يا أبو محمد

كنت عاوزة أكلمك عن محمد

(أبو محمد) عمل أيه ثاني هو مش ناوي يجبها البر مش كفاية وقعنا في ناس عرر زي نسايبه

(أم محمد) عاوزة اتكلم عن نسايبه دول

(أبو محمد) هم مش خلاص غاروا وسابو شقته فيه أيه ثاني

(أم محمد) مش ناويين يجبوها البر دول عاوزين يرجعوا وبيخططوا لكده وكمان عاوزين يجرجرونا في المحاكم

(أبو محمد) بتقولي أيه ياحاجة مين دول اللي أنت عاملة لهم قيمة بلاش تقولي الكلام ده والله العظيم انزل احش رقبة أبوها على القهوة قدام العالم كله

(أم محمد) طيب وليه كل ده اشتال ده عن ده نرتاح ويرتاح محمد

(أبو محمد) فهميني

(أم محمد) شوف ياسيدي أنا كلمت المحامي قالي لازم محمد يترك البيت ويأجر شقة برة

(أبومحمد) ازاي يسيب ملكه ويأجر برة في شرع مين الكلام ده

(أم محمد) لازم عشان نخلص من سهير وأهلها

(أبو محمد) أنا مش فاهم أنت عاملة لسهير وأهلها قيمة ليه تحبي أخلص عليهم ونخلص

(أم محمد) يارجل افهمني يعني أيه تخلص عليهم وتتسجن عشان الزبالة دول المحامي بيقول أحنا معنا حكم الطرد وده فرصة نأجر لمحمد سنة كده برة لحد ما سهير تتعدل او تيجي لأختها مصيبة تأخذها ونخلص منها

(أبو محمد) مش موافق

(أم محمد) يعني عاجبك فضايح كل شوية

(أبو محمد) سبيلي الموضوع ده وأنا هتصرف لكن ابني يخرج برة بيته عشان دول لا

صوت خطوات احم احم

(محمد) جوز كناريا دول ياناس

(أم محمد) أنت جيت أهلا وسهلا

(محمد) يا أمه بطلي تقرشي ملحتي بقى

(أبو محمد) مهو من عمايلك السودة

(محمد) ليه بس هو أنا عملت ايه ثاني وبعدين استنى يا حاج عاوز أسأل أمي عن حاجة أمه أنت عملت أيه في سهير دي مسطولة أكنها واكلة قرش حشيش

(أبو محمد) هي مراتك رجعت

(محمد) أيوة أبوها جابها

(أبو محمد) كنت عارف والله هو يموت ويصرف مليم

(أم محمد) طيب عشان كده نخلص موضوعنا

(أبو محمد) قلت لا يعني لا ابني مش خارج من بيته عشان الرمم دول

(محمد) فيه أيه ياجماعة حصل أيه

(أم محمد) المحامي بيقول لازم تأجر شقة برة لأن ألاعيب أهل سهير مش هتخلص عشان يحطوا أيدهم على الشقة

(محمد) وماله يا أمه إذا ده فيه المصلحة مفيش مانع

(أبو محمد) اخرس ياوله مفيش خروج من بيتك

(محمد) بس فيه مشكلة

(أم محمد) مشكلة ايه

(محمد) احنا هنا عاملين العفش على قد مساحة الشقة هنلاقي فين شقة نفس المساحة

(أم محمد) لا ياحبيبي مش هتأخد العفش اللي فوق هخزنه في جراش عشة رأس البر وهجيب لك عفش ثاني

(محمد) مينفعش يا أمه

(أم محمد) وأيه قلة نفعه بس