البارت السادس

بعمها متولي يدلف إلى الشقة من بابها الذي كان لا يزال مفتوحًا، فتجمدت الكلمات على شفتيها، بينما التفت عم توفيق نحو الباب في دهشة.

نظر متولي إلى عم توفيق بضيق وجفاء، وقال بنبرة مستفزة:

— «كويس إنك هنا يا توفيق.. أهو بالمرة تشهد على اللي هيتقال».

ثم التفت إلى فرح، وانقبضت ملامح وجهه، ولمع الجشع في عينيه وهو يتقدم خطوتين داخل الصالة، ثم راح يشير إليها بسبابته مهددًا، وتحدث بنبرة ساخرة وقاسية:

— «على فكرة يا فرح، أنا كبار الحارة طالعين ورايا على السلم على طول! وبقى البلاغ اللي عملتيه ده هيخيل عليّا؟ حكاية الحرامي اللي دخل وسرق الفلوس دي تروحي تقوليها في القسم! إنما معايا أنا.. حقي هيرجعلي يعني هيرجعلي، ومش هسيب نصيبي الشرعي يضيع في الهوا بحجة تمثيلية واهية!»

وقفت فرح تواجهه، وعيناها تلمعان بدموع القهر، وردت عليه بانفعال:

— «تمثيلية يا عمي؟! أنا الفلوس اتسرقت مني فعلًا، والشرطة بنفسها كانت هنا ولسه رافعة البصمات من أوضة النوم وشافت آثار السرقة!»

لوى متولي فمه باستهزاء، ثم صاح بغلظة:

— «أنا ماليش دعوة بمين دخل ومين سرق! طالما الفلوس راحت، يبقى ماليش قعدة بره! أنا ليا نصيب شرعي في الحيطان دي، لأن أبوكي الله يرحمه مخلفش صبيان يحجبوا ورثي، ومن النهاردة هاجي أنا وعيلتي ومراتي نقعد معاكم هنا، وناخد حقنا تلت ومتلت!»

كانت شقيقتا فرح تستمعان إلى المشاجرة من داخل الغرفة، وقد تسلل الرعب إلى قلبيهما مع ارتفاع أصوات المتخاصمين.

انتفضت فرح من مكانها، وقالت بصوت يرتجف من الغضب والذهول:

— «تقعدوا معانا فين يا عمي؟! الشقة يدوب أوضتين وصالة، على قدنا أنا وأخواتي بالظبط! وبعدين إحنا بنات لوحدنا، وبنتحرك براحتنا، إزاي ينفع راجل غريب أو ولاد عمي يدخلوا يعيشوا معانا في نفس المكان؟ ده لا يرضي ربنا ولا الأصول!»

صاح متولي بعناد، غير عابئ باعتراضها:

— «أنا مش هسكت على حقي عشان خاطر براحتكم! اتصرفوا بقى وشوفوا هتعملوا إيه!»

وفي تلك اللحظة، ظهر اثنان من كبار الحارة عند مدخل الشقة، بعدما صعدا خلف متولي واستمعا إلى ارتفاع الأصوات من الخارج. دخلا الصالة، وأخذا ينظران إلى الوجوه المتوترة، قبل أن يطلبا من الجميع الهدوء لسماع تفاصيل المشكلة.

تقدم أحدهما، وكان رجلًا وقورًا له كلمته المسموعة بين أهل الحارة، ثم قال بحسم:

— «جرى إيه يا حاج متولي؟ البنت لسه عاملة محضر، والشرطة رفعت البصمات وعاينت المكان. سيب لها فرصة ومهلة لحد ما النيابة تشوف شغلها وتستكمل الإجراءات، ويمكن ربنا يظهر الحق والفلوس المسروقة ترجع، وصاحب النصيب ياخد حقه بالمليم! إحنا هنديها مهلة ست شهور تتصرف فيها، ونشوف الإجراءات هتوصل لفين».

انتفض متولي معترضًا، وارتفع صوته بالرفض:

— «ست شهور إيه يا حاج؟! كتير طبعًا! أنا بقالي تلات سنين صابر ومستحمل، مش هقعد نص سنة كمان على ما النيابة تحن علينا! هو بالكتير شهر واحد بس، وآجي أنفذ كلامي وأقعد أنا وعيلتي هنا في الشقة!»

ما إن سمعت فرح كلمة «شهر واحد» حتى انقبض قلبها، وارتسم الرعب بوضوح على ملامحها. أخذت أصابعها ترتجف دون إرادة منها، وهي تتخيل كيف يمكن أن تضيع الشقة من بين يديها في غضون أسابيع قليلة، بعد كل ما تحملته طوال السنوات الماضية لتوفر الأمان لشقيقتيها.

لاحظ عم توفيق أمارات الخوف التي ارتسمت على وجهها، فتدخل سريعًا محاولًا إنقاذ الموقف وتهدئة الأمور، والتفت إلى متولي قائلًا:

— «جرى إيه يا متولي؟ شهر إيه اللي البنت تتصرف فيه في مبلغ زي ده، والنيابة لسه بتبدأ شغلها؟ طالما مش صابر على الست شهور، خلاص.. إحنا نخليها أربع شهور، ويبقى كلام رجالة وحكم حارة يرضي الجميع!»

تبادل متولي النظرات مع كبار الحارة، ثم التفت إلى فرح التي كانت تحبس أنفاسها في انتظار قراره. ظل صامتًا لبرهة، قبل أن يزفر بضيق ويقول بصوت غليظ: