Chapter 6

"HINDI ko alam kung paano ko sisimulan ang kuwento. At nagdadalawang-isip pa rin ako. Siguro dahil sa takot."

Ginagap ni Yeonna ang kamay ng babae. Nagpakilala itong Loretta. Sa tingin niya, hindi nalalayo sa mga nakakatanda niya na mga pinsan ang edad nito.

"Alam ko ang ibig mong sabihin. At naiintindihan kita."

Napabuntong-hininga lang ang babae. Sa nakikita ni Yeonna, nag-aalinlangan nga ito. Kailangan niyang makuha ang tiwala nito. Hindi maaaring mawala sa kanya ang nasisilip na pagkakataon na malaman ang nangyari kay Yessa.

"Nangangako ako. At marunong akong tumupad ng pangako. Maniwala ka."

"Hindi ko alam," sabay iling nito na hinila palayo kay Yeonna ang kamay. "Marami kasing pangalan ang masasangkot. At hindi sila basta puwedeng kalabanin."

Lalong lumakas ang determinasyon ni Yeonna na marinig ang mga nalalaman ng kanyang kausap. "Ang pagpunta mo sa libing at burol ni Yessa, gayundin ang pagsunod mo sa akin sa police station ay senyales na matapang kang tao. Kulang ka lang sa tiwala. At iyon ang hihingin ko sa iyo ngayon." Muli niyang ginagap ang kamay ni Loretta. "Kahit na anuman ang malaman ko ngayon, hinding-hindi kita idadamay."

"Sigurado ka?"

Tumango siya. "Hindi rin ako matatahimik tulad mo hanggang 'di ko malalaman ang nangyari kay Yessa. Magtiwala ka sana sa akin. Hindi kita ipapahamak."

Natahimik si Loretta. At hinayaan lang muna ito ni Yeonna na makapag-isip.

"Mahigit isang buwan noon si Yessa sa Deliemar nang ianunsiyo ng isa sa mga opisyal doon na ikakasal na ito..."

Alam ni Yeonna na hindi maganda ang katapusan ng pagkukuwento ni Loretta. Kaya pinakalma niya ang sarili. Tila kasi naninikip na ang kanyang paghinga.

"Nagplano ang lahat ng isang party. At nagkaroon nga ng malaking salo-salo. Pareho naming kailangan ni Yessa ng pera kaya nagboluntaryo kami para sa catering na kinuha ng kompanya."

Napapikit si Yeonna. Alam niya na gusto lang ng kanyang kapatid na makatulong. Sana hindi lang niya ipinaparamdam dito o sinasabi ang hirap niya sa pagsasabay ng pag-aaral at pagtatrabaho. Baka hindi nito naisipan ang pagpasok sa part-time o sideline jobs.

"Na-assign ako sa kitchen habang siya naman ay sa pagse-serve ng mga food and drinks. Maayos na nagsimula ang party. At maayos din namang natapos. Pero may isang grupo ng mga bisita ang nagkaroon ng interes kay Yessa."

Napasapo sa dibdib si Yeonna nang sumikip ang kanyang paghinga.

"Okay ka lang?"

Napahawak si Yeonna sa braso si Loretta. Gusto niyang iwaksi sa isip ang wakas ng kuwento, pero iyon na ang nagdudumilat sa kanya. "Sabihin mo sa akin," wika niya sa pagitan nang paghahabol ng hininga. "B-Binaboy ba nila ang kapatid ko?"

Sandaling hindi nakasagot si Loretta.

"Binaboy ba nila ang kapatid ko?" madiing pag-uulit ni Yeonna.

"Isa sa limang magkakasamang lalaki ang nagbigay ng inumin kay Yessa. Sa tingin ko, nilagyan nila ng gamot iyon."

Napatitig siya kay Loretta.

"Nakita ko na lamang kasi na kusa nang sumama sa kanila si Yessa. Kilala siya na mailap sa mga lalaki. Kaya nagkaroon na ako ng pagdududa."

"Anong nangyari pagkatapos niyon?"

"Dinala siya sa rooftop ng Deliemar..."

Muling napapikit si Yeonna. Kaya iyon ang lugar na pinili ni Yessa na tapusin ang buhay nito dahil doon nasira ang lahat nang mga pangarap nito.

"Bakit hindi ka humingi ng tulong?"

"Natakot ako."

Napakuyom siya ng kamao.

"Pero nagsabi ako sa isa sa mga guwardiya ng Deliemar."

Nakita ni Yeonna ang muling pag-ikot ng paningin ni Loretta sa paligid. Nasa isang public park sila. At pinili nila ang parte ng lugar na hindi matao.

"Kinabukasan, wala na 'yong guwardiya. Hindi na siya pumasok."

"Nasaan siya?"

"Ang sabi, nagnakaw daw mula sa mga bisita kaya kinulong. Pero kilala ko si Ali. Mabuti siyang tao. Hindi niya magagawa ang bagay na iyon."

"Alam mo ba kung saan siya nakatira?"

"Pinuntahan ko siya sa bahay nila noong araw na inanunsiyo sa buong kompanya ang ginawa niya. Pero wala na roon ang buo niyang pamilya."

"Kinabukasan lang bago ang nagyaring insidente?"

Tumango si Loretta. "Naiintindihan mo na ba kung anong klaseng tao ang gumawa niyon kay Yessa? Naipakulong nila ang inosente at nadamay pa ang pamilya nito."

"Sino ang mga taong iyon?"

"Ang isa sa kanila ay pamangkin mismo ng may-ari ng Deliemar."

Tumayo na si Yeonna.

"Hindi mo ako idadamay, 'di ba? Ayokong matulad kay Ali. Maliliit pa ang mga anak ko. Kaya ko sinabi sa 'yo ang nalalaman ko ay dahil sa konsensiya ko. Hindi kami malapit sa isa't isa ni Yessa, pero mabait siya."

"Salamat."

Pinigilan ni Loretta sa kamay si Yeonna. "Saan ka pupunta?"

"Sa police station."

Napatayo ito. "Sasabihin mo ba sa kanila ang mga nalaman mo ngayon?"

"Huwag kang mag-alala, marunong akong tumupad ng pangako."

Tumalikod na si Yeonna. Hindi pa naman siya malayo sa police station kaya ilang minuto lang nang paglalakad ay narating agad niya iyon.

Dumiretso siya sa pulis na nakausap kanina. Abala ito sa paglalaro ng baraha sa computer kaya hindi nito napansin ang kanyang presensiya. Nagulantang na lang ito nang maramdaman nitong may mga matang nakatitig dito.

"Ikaw na naman?"

"Ginahasa ang kapatid ko."

Napatingin ang pulis sa mga kasama na napansin naman ni Yeonna.

"Sinabi ko na sa 'yo na sarado na ang kaso."

"Pero alam niyo ba?"

"Hindi."

"Dahil hindi kayo nag-imbestiga. At dahil minadali ninyong maisara iyon para pagtakpan ang mga taong involve sa insidente."

"May pruweba ka ba?"

"Wala."

"Wala pala, pero ang lakas ng loob mong magbentang?"

"Babalik ako kapag may pruweba na. Sana nandito ka pa kapag nagharap uli tayo. "

Walang paalam nang umalis si Yeonna. Mula sa police station ay nilakad niya rin lang ang papunta ng sementeryo kung saan inilibing ang kapatid. Kalahating oras din iyon. Pero nagkaroon siya ng pagkakataong makapag-isip.

"Yessa..."

Lumuhod siya nang tumapat sa nitso ng kapatid. Wala nang luhang pumatak sa kanyang mga mata. Napalitan na iyon ng galit.

"Pinapangako ko. Pagbabayarin ko silang lahat. Bibigyan kita ng hustisya. Bibigyan kita ng katahimikan. Hintayin mo uli ako. Darating ako. Ihaharap ko sa 'yo ang mga taong dahilan kaya nandiyan ka."

Hindi siya nagtagal sa sementeryo. Umuwi na siya at kinuha ang mga gamit.

"Saan ka pupunta?" usisa ni Marco nang makitang palabas ng bahay si Yeonna na may dalang bag.

"Babalik na po ako ng Maynila."

"Hindi ka ba muna magpapalipas dito ng ilang araw? Baka hindi mo pa kaya."

"Huwag po kayong mag-alala. Kailangan kong kayanin dahil nakasalalay sa akin ang katahimikan ni Yessa."

"Anong pinaplano mo?"

Tumalikod na si Yeonna. Hindi na niya pinansin ang pagtawag ng tiyuhin.