Chapter 4

HABANG naghihintay, hindi maiwasan ni Cleo na ma-intimidate sa titig ng lalaking nasa kabilang table. Hindi niya mawari kung sa kanya ba ito nakatitig o ilusyon niya lang, mukhang may galit pero tama si Cleo, ang hot niya kaya hindi siya mapalagay. Ibinaling na lang niya sa bintana ang tingin. Pero hagip na hagip pa rin ng parameter ng kanyang paningin ang pagtitig sa kanya ng lalaki. Hindi siya komportable kaya tinanong na niya ito.

“Ahm, excuse me Sir, is there a problem with my face?” Ininglish niya kasi mukhang foreigner.

“Do you think that I am staring at you?” antipatikong tugon nito.

“Ay antipatiko,” bulong niya.

“Do you think you’re attractive or something?” pang-uuyam pa nito.

“Oh,” inis na reaksiyon naman ni Loraine, halos matawa siya sa sobrang inis. “Sorry, I thought you were staring at me.”

“Hindi ka ganon kaganda para titigan.”

“Ay gago, nagtatagalog pala ang Herodes,” bulong niya.

“I heard you.”

Hindi niya mapigilan ang sarili sa inis kaya naman tumayo na siya at pumunta na lang sa counter.

“O! Girl, nandiyan ka pa pala,” pangisi-ngising puna ni Cleo nang lumabas ito mula sa kitchen tangan ang dalawang tasang kape sa isang elegant na tray.

“Ay, oo girl kasi hinihintay ko yung bayad mo…” pang-uuyam naman niya.

“Aha! Pasensiya ka na girl, wait lang ha.”

Nainis siya sa kaibigan sa pagpapa-cute nito sa pagsasalita. Inasikaso muna ang customer na gwapo.

NAGNGINGITNGIT sa inis ang kalooban ni Ibrahim nang makausap ang babaeng kinababaliwan ni Khaleb. Sobra ang confidence which makes her attractive anyway, pero galit pa rin siya rito. Akala siguro nito sobrang ganda niya para komprontahin siya ng ganon kabulgar. Sigurado siyang pera lang ang habol nito kay Khaleb. Pakiramdam tuloy niya napahiya siya sa harapan ni Jayson. Konti pang ebidensiya at talagang idedemanda niya ‘to ng corruption of minor, teka hindi na nga pala minor si Khaleb pero kahit na, gagawa siya ng paraan para mailayo ito sa pamangkin.

Ito ba ang babaeng bibihag sa puso ng isang Kalif Royalty. “Huh!” impit na palatak niya. Lalong umahon ang inis niya habang nagpa-flash sa isip niya ang naganap kanina na nasaksihan ng kanyang mga mata. Ang matamis na paalaman na akala mo’y totoong nag-iibigan. Nadidiri siya habang iniisip ang naganap. Ini-imagine niya tuloy na what if ito nga ang maging asawa ni Khaleb at tatawagin din siyang Uncle Ib.

“Mustaqdhar (disgusting).” Hindi sinasadyang nasabi niya.

“ANO ‘yon!” Napalakas ang boses ni Loraine, alam niya kasi ang ibig sabihin non. “Sinong disgusting?”

Halatang nagulat ang lalaking iyon dahil alam niya ang ibig sabihin ng inusal nito.

“Will you please mind your own business? I’m not talking to you.”

Nakanganga lang siya habang nakikinig sa hanash nito. “Huh! Wow. Okay. I’m done. Cleo pwede bang bayaran mo na ako para makaalis na. Ayokong sirain ang araw ko dahil lang sa mga walang kwentang tao,” parinig niya.

Nagpalipat-lipat ng tingin si Cleo sa kanyang customer at kay Loraine.

“Ahahaha, oo sandali lang girl kukunin ko lang sa cashier yung pera.” Nagmamadaling tumakbo si Cleo. “O heto, uy girl balik ka mamaya ha inom tayo,” sabay kindat. “Ito o, Cote Kalif red wine, bago ‘to saka mamahalin.”

“Masarap ba ‘yan?” curious na tanong niya. Gusto niya rin kasi ang red wine, white wine, and champaigne.

“Oo naman, natikman ko na ‘to e.”

Nag-uusap sila na parang walang ibang tao.

“Sige, count me in, dahil parang kailangan kong mag-inom mamaya.”

Nag-apir ang partners in crime.

“Great I will wait for you.”

Umalis na rin siya para matapos na ang kanyang mga delivery.

“HOW can a mother will leave the house for a drink. Tsss! Sinasabi ko na nga ba,” bulong ni Ibrahim.

“Boss, may sinasabi po ba kayo,” pukaw ni Jayson.

“Ah, no, nothing. Finish your coffee and call Khaleb right away,” ma-awtoridad na utos niya.

“Yes Boss.”

“Pauwiin mo siya, ngayon din at kapag tumanggi siya sabihin mong ipasusundo ko siya sa mga body guards.” Iyon lang sinabi niya, pagkatapos ay ibinagsak ang tasa ng kape saka tumayo at lumabas.

“BAKIT naman ako pinauuwi ni Uncle ha?”

“Hindi ko po alam Sir Khaleb basta umuwi ka na raw at kung hindi ka uuwi mapipilitan siyang ipasundo ka sa mga body guards.”

“For real!? Ganon siya kadesididong pauwiin ako. Huh! Anong problema ng matandang binata na ‘yon,” naiinis na tugon niya.”

“Napag-utusan lang po ako Sir.”

“Okay Jayson, pakisabi kay Uncle na hihintayin ko lang si Loraine dahil walang kasama si Disney dito sa bahay.”

“AKO na lang ang bahala kay Disney,” sabat ni Bea. Habang ang kanyang mga mata ay hindi makatingin ng diretso sa mga mata ni Khaleb. Alam niyang malamig na pagtingin lang ang itutugon nito. Matagal na niyang gusto si Khaleb, halos magkasing-edad lang naman sila pero alam niyang malaki ang paghanga nito kay Loraine.

Si Bea ay isa sa mga batang nakatira sa bahay ampunan. Tumutulong siya kay Loraine sa paggawa ng paper cups. Doon na rin niya nakilala si Khaleb at isa rin siya sa tumulong ng maaksidente ito, hindi nga lang nito nalalaman dahil kasalukuyang wala itong malay nang nagbantay siya sa hospital.

Simula noon nagustuhan na niya si Khaleb ng palihim. Mga palihim niyang pagtitig na pilit itinatago at pinipigilan. Alam niyang walang kayang iganti si Khaleb. Isa lamang siyang palamuti kung ituturing na hindi binibigyan ng kahit konting pagtingin. Tanggap niya kung saan siya lalagay pero may mga oras na ang hirap pigilan ng damdamin. Kaya naman kahit ayaw niyang makipag-usap kay Khaleb ay napipilitan siya basta marinig lang ang tinig nito ay musika na para sa kanyang damdamin.

“No, okay lang. Hihintayin ko na si Loraine,” sagot ni Khaleb.

Loraine, Loraine talaga, ganon niya talaga kagusto si ate Loraine. Kailan mo kaya ako tatawagin sa pangalan ko? Taning niya sa isip.

Tumango lang siya at bumalik na sa paggawa ng paper cups.

“BOSS hihintayin daw po muna niya ang pag-uwi ni Loraine.”

Kumunot ang noo ni Ibrahim sa narinig. Tumayo siya sa pagkakaupo at humarap sa wide glass wall ng kanyang office. Pinipilit niyang i-relax ang sarili kasabay nang pag-inom ng alak.

“Ipasundo mo siya sa mga tauhan, ngayon din.” Ayaw niyang ganito ang gawin pero napupuno na siya. He cannot tolerate Khaleb, kailangan niya itong ingatan, ano man ang mangyari hindi pwedeng madungisan ang reputasyon nito bilang susunod na hari.