Chapter 7

Chapter 7

Wala sa oras na napatakbo siya kay Nexus nang nang makitang namimilipit ito sa sahig. Nakadagan sa kalahating katawan nito ang wheelchair.

            “Nexus!”

            Hindi ito sumagot bagkus ay mas lumalim ang pakakakunot ng noo nito at mas lalong namilipit.

            “Nexus!” Mahina niya itong inalog ngunit umiling lamang ito na parang may iniinda. Bumaba ang tingin niya sa kamay nitong hawak-hawak at mahina siyang napamura nang makitang dumudugo iyon dahil sa mga nakatusok na mga basag na bote.

            Ngayon niya rin lang napansin ang mga bubog sa sahig. Nakita niya ang baso at platito na basag sa di-kalayuan.

            Napamura siya nang mahaplos niya ang mukha nito dahil inaapoy ito ng lagnat. Sunod-sunod niyang pinindot ang buzzer at nang walang sumagot sa intercom ay muli niyang nilapitan ang dating asawa.  

            “S-Steph,” nahihirapan nitong wika.

            Napangiwi siya nang halos pareho silang babagsak nang binuhat niya ito upang ibalik sa kama. Ang bigat ng hudyo at gusto niya itong pektusan.

            Hingal na hingal siya nang tuluyan niyang mapasandig si Nexus sa headboard ng kama. Kinuha niya ang first aid kit sa banyo nito. Napapangiwi ito nang binalikan niya.

            “Huwag kang sisigaw,” utos niya nang kinuha niya ang tweezers at inalis ang mga bubog na nakatusok sa sugat nito.

Pigil na pigil nito ang mapadaing at hindi niya alam ang mararamdaman nang mamula ang mukha nito pati na rin ang leeg habang naluluha ang mga mata.

            Ngunit, sunod-sunod itong napamura nang buhusan niya ng alcohol ang sugat nito. Inilalayo pa nito ang kamay mula sa kanya na hindi naman niya hinayaan. Nilagyan niya iyon ng gasa bago ito itinulak pahiga.

            “Kumain ka na ba? Nasaan si Rex?” Kaninang umaga pa niya hindi nahahagilap ni anino man ng private nurse nito.

            “P-Pinauwi ko.”

            “Ano?” Naging pasinghal ang kanyang boses ngunit agad niya rin naitikom ang bibig nang makitang bahagya itong namumutla.

His eyes are watery and dilated.

            “Diyan ka lang,” wika niya at itinuro pa ito. Hindi ito sumagot bagkus ay nakatingin lamang sa kanya.

Wala siyang mahagilap kahit isang kasambahay, wala rin si Alejandro. Kumuha siya ng plangganita at nilagyan ng maligamgam na tubig. May sopas na tira sa kaldero na siyang meryenda ng mga trabahahador. Kumuha siya ng isang mangkok at inilagay sa microwave oven.

            Pagbalik niya sa itaas ay latang-lata na si Nexus sa kinahihigaan nito. Nakalaylay ang kamay at halos hindi na gumagalaw. May kalakasan na tinapik niya ito sa pisngi. Nang hindi ito nagmulat ng mata ay mas nilakasan pa niya ang tapik na halos pasampal na.

            Nahihirapan na umungot ito.  

            “Umayos ka. Pupunasan kita,” utos niya at inilagay ang isa nitong kamay sa balikat niya para tulungan itong i-adjust ang sarili sa pwesto nito sa kama.

            “S-Steph…”

            “Tumalikod ka.” Hindi ito sumunod kaya naiikot niya ang kanyang mata.

Siya na mismo ang nagpatalikod dito upang punasan din doon. Kumuha siya ng bagong damit nito pati na rin jersey short.

            Pigil na pigil niya ang sariling mag-init ang pisngi nang hubaran niya ito ng damit. Tumambad sa kanya ang katawan nitong kahit medyo pumayat ay naroroon pa rin ang patag nitong sikmura. Mistulang model sa siksik sa muscle. He’s lean, hindi sobrang ma-muscle pero may ibubuga. Hindi na niya binilang ang abs na dati ay anim.

            Pinagmumura niya ang sarili nang hilahin niya pababa ang suot nitong pajama. Natuon ang tingin niya sa umbok na nagtatago sa likod ng kulay itom nitong brief. Mabilis niya itong sinuotan ng jersey short bago pa man magkasala ang mga mata niya.

            Teka nga lang muna, ano bang inaarte niya? Nakita naman na niya iyon dati pa. Pumasok pa nga…

            Nang makatapos bihisan ay pinakain niya ito. Pwede itong kumain ng sopas pero may sinusunod pa rin na diet na siyang ibinigay ng doctor. Nang muli itong makatulog matapos niyang painumin ng gamot, saka pa lamang niya napagtanto ang ginawa niya.

            Bitbit ang tray na muli niyang nilingon si Nexus. Kunot ang noong umiling siya at mabilis na lumabas ng kwarto nito. Nasapo niya ang kanyang noon ang makarating siya sa kusina.

            Maliban sa mga bodyguard, wala na siyang iba pang nakitang tao sa loob ng mansyon. Hindi niya naman mauutusan ang mga naglalakihang mga lalaki na bantayan si Nexus. Mukha pa naman ang mga itong wrestler.

            Umupo siya sa gilid ng kama ni Nexus. Maghapon niya itong binantayan. Paminsan-minsan ay umiingit at muli niyang binabasa ang bimpo para punasan ito.

            Nang pangatlong beses nitong magising, nagpasama ito sa kanya sa banyo. Mabuti na lang at kaya ng gumalaw ng kamay nito para hugasan ang sarili.

Nagse-session din kasi ito ng therapy kay Rex. Kahit basic lang para ma-exercise ang muscle nito ay malaking tulong naman. Muli niya itong tinulungan pabalik sa kama pagkatapos nitong gumamit ng banyo. Kumuha siya ng alcohol at nilagyan ang kamay nito.

            Nagulat siya nang hulihin nito ang palapulsuhan niya bago ikinulong ang magkabila niyang kamay sa mainit at malaki nitong mga palad.

            “S-Salamat…sa pag-aalaga sa a-akin.”

            Dumampi ang mainit nitong labi sa kanyang kamay. Puno ng adorasyon ang mga mata nito nang tingalain siya.

            Sumikdo ang puso niya kaya naagaw niya ang kanyang kamay. “Mahiga ka na ulit para gumaling ka na.”

            Masunurin itong tumango at nagpatulak sa kanya pahiga. Umupo siyang muli sa tabi nito ngunit napatayo rin ulit nang makita niyang tila hindi ito komportable habang nakatingin sa mga paa.  

            Huminga siya ng malalim at pumwesto sa paanan nito. Ang sabi kasi ni Rex ay normal lang daw na namamanhid iyo o kaya nagbibigay ng hindi komportableng pakiramdam.

Kinuha niya ang magkabilang paa nito at ipinatong sa mga hita niya bago sinimulan masahehin iyon.

             

NAPATDA si Amara Stephanie sa kinatatayuan nang sumulpot sa harap niya si Nexus at inabot sa kanya ang isang tangkay ng kulay pulang rose na walang tinik.

            Namumula ang tainga nito pati na rin ang leeg habang nakayuko at pasulyap-sulyap sa kanya.

            “S-Steph, f-flower for you.”

            Kinuha niya ang ibinigay nito bago siya napatingin kay Rex na nasa likod ng wheelchair nito.

            “Pinitas niya po ‘yan Ma’am sa garden.”

            “N-Nagustuhan mo ba?” mahina ang boses na tanong ni Nexus.

            Dumako ang tingin niya sa kamay nitong nakapatong sa ibabaw ng hita nito. Nang makita nitong nakatingin siya roon, mabilis nitong itinago ang mga iyon.

            “Bakit ka may mga sugat sa kamay?”

            “W-Wala.” Para itong batang sunod-sunod na umiling at takot na mapagalitan. Tiningnan niya si Rex na sinagot lang siya nito ng pag-iwas ng tingin.

            Umuklo siya para mapantayan si Nix at kinuha niya ang kamay nito. Ayaw pa sana nitong ibigay ngunit mas makulit siya.

            “Anong nangyari rito?” Maliliit na sugat na sariwa dahil may dugo pa. Parang nahiwa ng matalim na bagay. Napatingin siya sa rosas na hawak-hawak niya. “Nasugatan ka ba dahil dito?”

            Sa pangalawang pagkakataon, muli na naman nag-iwas ng tingin ang mag-amo. Huminga siya ng malalim at pumunta sa likuran ni Nexus.

“Ako ng bahala sa kanya, Rex. Gamutin ko lang ang sugat niya.”

            Nagningning ang mata ni Nexus sa sinabi niya.

            “Sige po, Ma’am. Punta lang ako sa living room. Darating po kasi ngayon si Sir Ramirez,” anito at umalis sa bungad ng hardin.

            Ang Sir Ramirez na tinutukoy nito ay ang therapist ni Nexus. Dalawang buwan na rin na halos lingo-linggo nagpapabalik-balik sa hacienda ang therapist para sa therapy session ni Nexus. Nagpasuyo siya sa dumaang katulong na ikuha siya ng first aid kit.

            Umupo siya sa sofa sa living room habang nasa harapan niya si Nexus. Nang dumating ang kasambahay ay ginamot niya ang maliliit na sugat ni Nexus.

            “N-Nagustuhan m-mo ba ang bulaklak?” tanong nito na nag-aalinlangan pa.

            Tumango siya ngunit hindi man lang ito sinulyapan. “Pupunta rito si Dr. Ramirez para sa therapy mo. Gusto kong makipag-cooperate ka sa kanya.”

            Nitong mga nakaraang linggo kasi ay kinakailangan pang pilitin si Nexus kapag magse-session. Ang sabi sa kanya ni Nanang Yeye, ayaw raw magsimula hangga’t wala siya. Nagkukulong siya sa guest room kapag nasa mansion si Dr. Ramirez dahil marami rin siyang office works na ginagawa. Mabuti na lang at magaling ang sekretarya niya at mapagkakatiwalaan.

            “M-Manonood ka?”

            “Oo.”

            Kumislap sa saya ang mga mata nito at gumuhit ang ngiti sa mga labi, maligaya sa sinabi niya.

            “T-Thank you. K-Kapag nakapaglakad na u-ulit ako, p-punta tayo sa t-tree house.”

            Natigilan siya sa paglalagay ng betadine sa sugat nito. “N-Naaalala mo ang tree house?”

            Mas kumislap ang mga mata ni Nexus at tumango.

“P-Palagi tayong pumupunta do’n d-diba?”

            “Ano pang naalala mo?” Nagsimulang bumangon ang kaba sa kanyang dibd ib dahil sa antisipasyon. Subalit, agad din iyong naglaho nang umiling si Nix habang nakalapat ang mga labi.

            “W-Wala na.”

            Nang dumating ang therapist nito, sa isang bakanteng kwarto na kasinglaki ng studio pumwesto sina Nexus at si Dr. Ramirez. Naupo siya sa tabi ni Rex habang pinapanood si Nexus na tinuturuan ng therapist kung paano ihakbang ang mga paa.

            Pansin niya ang pagiging ganado nito. Nagpapasikat yata sa kanya.

 Sa tuwing susulyapan siya ay ngingiti ito katulad kung paano siya nito ngitian noon. Sumandig siya sa sandalan ng upuan at tumaas ang sulok ng kanyang labi para suklian ang ngiti ni Nexus.

            Bandang hapon na nang matapos ang therapy session. Inalalayan ni Rex si Nexus para uminom ng tubig at magpalit ng damit. Habang siya naman ay hinatid ang therapist matapos nitong kumain.

            Sinabi sa kanya ni Dr. Ramirez na sa susunod na linggo ay kailangang sa Maynila na magte-therapy si Nix dahil mas kompleto roon ang mga kagamitan. Hindi siya pwedeng sumama dahil sa maiiwan na trabaho kaya ibinilin niya kay Dr. Ramirez ang kalagayan ni Nexus. Sigurado naman na hindi ito papabayaan ni Rex. 

            Bumalik siya sa loob ng mansion at tinungo ang kwarto ni Nexus. Naabutan niya ito na naka-upo sa kama habang si Rex naman ay palabas na nang kwarto habang dala-dala ang pinagbihisan ng dati niyang asawa. 

            Umupo siya sa tabi ni Nexus at hindi na siya nagulat nang ipinulupot nito ang mga kamay sa kanyang baywang at ipinatong ang baba nito sa kanyang balikat. Hinawakan niya ang likod ng ulo nito at ipinasuot ang kanyang kanyang mga daliri sa hanggang balikat nitong buhok na nakatali ng pa man-bun.

            “V-Very good ba a-ako kanina?” parang bata nitong tanong sa kanya.

            “Oo.”

Pilit niyang iwinaglit sa isipan ang mainit nitong hiningan na kumikiliti sa kanyang leeg.

            “G-Gusto ko ng premyo.”

            Mahina siyang nagpakawala ng tawa at iginalaw ang mga daliri sa pagitang ng mga buhok ni Nexus.

            “Aalis ako bukas. Kailangan kong pumuntsa opisina. Gusto mong sumama?”

            Sunod-sunod na tumango si Nexus kaya nilingon niya ito. Subalit hindi niya inasahan ang mabilis na pagdukwang nito sa kanya at walang sali-salitang inilapat nito ang mga labi sa kanya.