Chapter 5

ISANG LINGGO NA RIN ANG NAKALILIPAS, isang karaniwang abalang araw na naman sa ospital ang sinimulan ni Alyssa. Tulad ng dati, nakatutok siya sa kanyang mga pasyente, sinisigurong walang nakakalimutang detalye sa kanilang mga chart. Ngunit sa gitna ng kanyang trabaho, isang balita mula sa mga kasamahan ang gumulantang sa lahat—may nangyaring banggaan sa isang bahagi ng Maynila, at isinugod ang ilang biktima sa ospital.

Naging doble ang pagod ni Alyssa sa pag-aasikaso ng kanyang mga pasyente at sa pagko-coordinate sa emergency room para sa mga bagong dating na biktima. Ang tunog ng sirena ng ambulansya ay hindi tumigil, at ramdam niya ang bigat ng tensyon sa paligid. Mabilis niyang binalikan ang mga detalye ng kanyang trabaho habang naghahanda para sa anumang maaaring mangyari.

Nasa kanyang opisina siya nang biglang bumukas ang pinto. Halos hinahabol ang hininga, pumasok si Lucas, hawak ang clipboard sa kanyang kamay.

“Doc Alyssa, may naghahanap po sa inyo sa emergency room!” mabilis na sabi nito.

Napakunot ang noo ni Alyssa. “Sino daw?” tanong niya, iniisip kung sino sa kanyang mga pasyente ang maaaring nasa ilalim ng emergency care.

“Si Ms. Cruz daw po,” sagot ni Lucas, bahagyang nag-aalangan.

Hindi na inalam ni Alyssa kung sino si “Ms. Cruz.” Sa halip, agad siyang tumayo at nagmadaling bumaba patungo sa emergency room. Alam niyang ang bawat segundo ay mahalaga sa ganitong sitwasyon.

---

Sa emergency room, tumambad kay Alyssa ang masalimuot na eksena. May mga pasyenteng tinutulungan sa iba’t ibang bahagi ng silid, ang ilan ay may mga bali, habang ang iba’y may malalalim na sugat. Napuno ng sigaw, pag-iyak, at tunog ng mga makina ang paligid. Mabilis niyang hinanap ang tinutukoy ni Lucas na si Ms. Cruz.

Sa isang sulok ng emergency room, nakita niya ito—si Samantha “Sam” Cruz. Nakahiga ito sa stretcher, duguan ang laylayan ng kanyang damit, at hawak ang kanyang tiyan na waring pinoprotektahan ito. Kahit nanginginig, nanatiling gising si Sam, ngunit bakas sa mukha nito ang sakit at pag-aalala.

“Sam?” nanlaki ang mga mata ni Alyssa nang makita ito. “Ano’ng nangyari?”

Nagsalubong ang kanilang tingin, at sa kabila ng tensyon, bahagyang tumango si Sam. “Naaksidente kami… tulungan mo ako, Alyssa. Ang anak ko…”

Agad tumawag si Alyssa ng tulong mula sa ibang staff at mabilis na nagsuot ng gloves. Pinakiramdaman niya ang pulso ni Sam at sinimulan ang proseso ng pag-stabilize sa kondisyon nito. Hindi pa panahon para manganak si Sam, ngunit ang aksidente ay nagdulot ng komplikasyon—may vaginal bleeding ito na kailangang kontrolin agad.

“Prepare an ultrasound,” utos ni Alyssa sa isang nurse. “Check fetal heartbeat.”

Habang abala siya sa pagsusuri kay Sam, naramdaman niya ang pangangatal nito. “Sam, kumalma ka. Hindi kita pababayaan,” sabi ni Alyssa, kahit ang puso niya ay tila dinudurog sa bawat salitang binibitawan.

“Doc, fetal heartbeat is weak,” sabi ng nurse matapos ang mabilis na pag-scan.

Napakagat-labi si Alyssa. Hindi ito magandang senyales, ngunit hindi siya maaaring panghinaan ng loob. “Increase the IV fluids. Monitor her vitals every two minutes. Sam, I need you to stay with me. Makinig ka, okay? Laban tayo.”

Habang inaasikaso ang kondisyon ni Sam, narinig niya ang pagbukas ng pinto at ang yabag ng isa pang doktor na pumasok. Humarap siya, at sa gulat niya, isa sa mga kasamahan niya ang lumapit.

“Doc Alyssa,” sabi nito, medyo hinihingal. “Nandito rin si Mr. Delgado.”

Natigilan si Alyssa. May hinala na ito kung sino ang tinutukoy ng pumasok na doktor, kaya naman imbes na agad sumugod sa itinuturong pasyente, ang una agad na naitanong ni Alyssa ay “Sinong Delgado?” tanong niya, pilit iniintindi ang sinabi nito.

“Yung sikat na CEO at negosyante sa TV!" sagot ng doktor.

Parang tumigil ang oras. Napatingin si Alyssa kay Sam, na noon ay patuloy pa rin niyang ginagamot, bago siya bumaling pabalik sa doktor. “Nasaan siya?”

“Nasa kabilang cubicle po, duguan din.”

Mabilis na tumayo si Alyssa, iniwan si Sam sa mga kamay ng ibang doktor na handang magpatuloy sa pag-aalaga. Sa bawat hakbang papunta sa cubicle na tinutukoy, naramdaman niya ang bigat ng bawat galaw.

Ano ang ginagawa ni Marco sa aksidenteng ito? Siya lang naman ang kilalang sikat na negosyante ni Alyssa dahil itong Delgado na ito ay ang kaniyang asawa.

Pagkarating niya sa cubicle, nakita niya si Marco na nakahiga sa stretcher, duguan ang kanang bahagi ng kanyang ulo at may sugat sa braso. Gising ito, ngunit halatang may iniindang sakit.

Pero sa hindi inaasahang pagkakataon, nagulat si Alyssa nang marinig ang unang mga salitang binitiwan nito. Mukhang hindi pa nakikita ni Marco kung sinong mga doktor ang lumalapit sa kaniya dahil nakapikit pa rin ito sa sakit na kaniyang nararamdaman.

Ngunit ang mga susunod na salita ni Marco ang siya namang nakapagbigay ng sakit sa puso ni Alyssa.

“N-Nasaan si Sam? Kumusta ang anak namin?” tanong ni Marco, halatang nababahala.

Hindi agad nakapagsalita si Alyssa. Parang binuhusan siya ng malamig na tubig. Ang mga salitang iyon ay nagbigay-linaw sa lahat ng kanyang kinatatakutan. Sa gitna ng pag-aalala niya para kay Marco, naramdaman niyang parang unti-unting nadurog ang kanyang puso.

“Marco…” mahina niyang tawag, ngunit hindi nito napansin ang kanyang emosyon.

“Doc,” sabi ng nurse na malapit kay Marco. “We’re stabilizing him. He’s conscious but needs immediate imaging for further assessment.”

Hindi na nakapagsalita si Alyssa. Tumayo lamang siya sa gilid ng stretcher, tinititigan ang duguang anyo ni Marco habang ang isip niya ay punong-puno ng tanong at sakit. Nang makita niyang muli itong tumingin sa direksyon ng emergency room kung nasaan si Sam, tila nanlambot ang kanyang tuhod. Hanggang ngayon, hindi pa rin napapansin ni Marco na nandito si Alyssa sa kaniyang paligid.

Ang buong atensyon ng kaniyang asawa ay nakatuon sa isang babae bukod sa kaniya. Kay Samantha.

Hinawakan niya ang gilid ng stretcher ni Marco, pilit pinatatag ang sarili. Ngunit ang mga luhang matagal na niyang pinipigilan ay unti-unti nang bumagsak.

“Marco,” mahina niyang sabi. “Bakit hindi mo sinabi sa akin?”

Hindi ito narinig ni Marco. Nakatayo lamang si Alyssa sa gilid habang pinanonood si Marco na nagpupumilit tumayo at saka dali-daling pumunta sa cubicle kung saan nakahiga si Samantha. Tumakbo siya pabalik kay Sam, na noon ay patuloy na ginagamot ng mga kasamahan niya.

Ang mga tanong sa kanyang isipan ay tila hindi maipaliwanag ng kahit sinuman. Ngunit isang bagay ang sigurado—ang sitwasyong ito ay magbabago ng lahat.