Chapter 5: Interviewing My Own Fiancé

Pagbalik nina Inara at Tatiana sa kompanya, mabilis na kumalat ang balita na sila ang nakakuha ng exclusive interview kasama ang presidente ng El Davion Group.

Halos lahat ay napatingin sa kanila nang may halong paghanga at inggit. Sino ba naman ang hindi maiinggit kung ang makakapanayam nila ay walang iba kundi si Arlend Kaizan El Davion, ang misteryosong presidente ng El Davion Group? Isa iyong napakalaking karangalan.

Kung magagawa nila nang maayos ang interview na iyon, tiyak na hihigit sa inaasahan ang performance ng buong team ngayong taon. Napakabigat ng pangalan ni Kaizan. Mas mahalaga pa nga iyon kaysa sa lahat ng taong na-interview nila sa loob ng isang taon na pinagsama-sama.

Samantala, bigla na lamang may humila kay Inara patungo sa isang lamesa. Paglingon niya ay agad niyang nakita ang kaibigan. Punong-puno ng kuryosidad ang mukha nito, at tila mas kuminang pa ang mga mata ni Liora Salvidar.

“Inara, bilis! Sabihin mo sa ’kin, gwapo ba talaga si Young Master El Davion? Grabe ang mga naririnig kong papuri tungkol sa kaniya!”

Napahinto siya sa pag-inom ng tubig.

Kung tutuusin, totoo naman. Sobrang gwapo ng lalaking iyon.

Pero may kakaiba siyang nararamdaman.

Parang may mali.

May pag-aalinlangan sa tinig niya nang harapin niya ang kaibigan.

“Liora, alam mo ba ang buong pangalan ng tinatawag nilang Young Master El Davion?”

“Ha? Dito sa Dumaguete, iisa lang naman ang puwedeng tawaging Young Master El Davion. Si Arlend Kaizan El Davion! Hindi mo ba iyon alam?” kunot-noong tanong nito. Bakas sa mga mata nito ang matinding pagtataka, na para bang isang malaking kasalanan ang hindi pagkilala sa pangalang iyon.

Nanlaki ang mga mata ni Inara.

'Arlend Kaizan El Davion? Teka... ano?! Ang taong dapat kong harapin sa interview ay walang iba kundi ang lalaking nakatakda kong pakasalan?!'

'Lord, ano po bang nagawa ko?'

Napasapo siya sa mukha. Gusto na niyang maiyak.

'Hindi ko na tuloy alam kung swerte ba ako o malas dahil siya pa talaga ang humiling na ako ang mag-interview sa kaniya. Diyos ko naman!'

Napansin ni Liora ang biglang pagbabago ng kaniyang ekspresyon kaya agad itong nag-alala.

“Inara, anong nangyayari sa ’yo? Ayos ka lang ba? Bakit parang nakakita ka ng multo? Hindi ba totoo iyong mga sinasabi nila na gwapo si Mr. El Davion? Pangit ba?”

Halos malunod siya sa dami ng tanong ng kaibigan. Sunod-sunod pa ang mga iyon na para bang ilang araw na nitong pinaghandaan at kailangan na lamang ilabas.

“A-Ah, wala!” mabilis niyang sagot sabay iling.

Ngunit nang maalala niya ang lalaking iyon noong nakaraang gabi, tila may malamig na tubig na dumaloy sa buong katawan niya. Naroon pa rin ang kirot na hindi niya maipaliwanag.

Galit sa kaniya si Kaizan, at wala siyang ideya kung ano ang maaaring gawin nito kapag muli silang nagkita.

'Hindi pwede! Hindi ko kayang gawin ang interview na ito! Hindi naman talaga dapat ako ang gagawa nito! Sumama lang naman ako dahil trabaho iyon, tapos ngayon babalik ako sa kompanya na may responsibilidad na i-interview ang lalaking nakatakda kong pakasalan at galit pa sa akin?'

'Trip na trip naman yata ako ng tadhana, Lord!'

Dahil sa matinding kaba, bigla siyang tumayo at nagmamadaling nagtungo sa opisina ni Tatiana. Naabutan niyang nag-aayos na ito ng mga gamit.

Pagkapasok pa lamang niya ay agad na nitong iniabot ang isang folder.

“Heto,” sabi nito. “Mga impormasyon iyan tungkol sa Young Master. Basahin mong mabuti ngayon pa lang para wala kang magawang pagkakamali bukas sa interview. Malaking pangalan at makapangyarihang tao ang makakaharap mo. Kapag nagkamali ka bukas, hindi lang ikaw ang mapapahiya kundi pati ang kompanya.”

Sa kabila ng mga paalala nito, hindi niya agad tinanggap ang folder. Mariin niyang kinagat ang labi.

“Ma'am Yana, pasensya na po, pero hindi maganda ang pakiramdam ko. Puwede bang iba na lang ang pumalit sa akin bukas para gawin ang interview? Mas mabuti pa nga sigurong ikaw na lang po ang mag-interview kay Y-Young Master El Davion...”

Hindi pa siya handa.

At higit sa lahat, takot pa rin siya kay Kaizan.

Pakiramdam niya ay hindi na mawawala ang takot na iyon, lalo na matapos ang ginawa nito sa kaniya noong nakaraang gabi.

Tinitigan siya ni Tatiana na tila hindi makapaniwala.

Napakabihira ng pagkakataong makapanayam si Kaizan El Davion. Ipinagkatiwala iyon kay Inara, ngunit gusto lamang pala nitong ipasa sa iba. Bukod pa roon, si Kaizan mismo ang humiling na siya ang mag-interview rito.

“Zandrielle Inara Clemente,” malamig na tawag nito habang matiim na nakatingin sa kaniya, “kilala mo ba si Young Master El Davion?”

Parang biglang tumigil ang tibok ng puso niya.

'Paano niya nalaman?!'

“A-Ah, h-hindi…” pautal niyang sagot at saka nakagat ang labi. “Hindi ko po kilala ang Y-Young Master...”

Galit si Kaizan sa kaniya.

At dahil doon, sigurado siyang ayaw nitong malaman ng iba ang tungkol sa kanilang ugnayan.

Hindi naman nagduda si Tatiana.

'Right. Ano ba 'tong iniisip ko? Paano makikilala ng isang hamak na intern ang isang katulad ni Young Master? Tsk. Pull yourself together, Yana.'

Para sa kapakanan ng kompanya, medyo lumambot ang tono nito.

“Dahil si Young Master El Davion mismo ang humiling na ikaw ang mag-interview, kailangan mong sumama. Pupunta tayo bukas.”

“H-Ha? Hindi pwede!”

Napahawak siya sa dibdib. Nanginginig siya sa kaba habang sariwa pa sa isip niya ang nangyari noong nakaraang gabi.

“Ayaw ko pong pumunta!”

'Haharap para mag-interview kay Kaizan?! Diyos ko!'

'Katapusan ko na yata!'

'No! Ayaw ko pa!'

'Hindi ko talaga kaya!'

Alam niyang fiancé niya ito, at alam din ni Kaizan na siya ang haharap dito. Dahil doon, hindi niya maiwasang isipin kung bakit siya mismo ang pinili nitong papuntahin.

'Ano ba talagang nangyayari? Hindi ba't ayaw niya sa akin?'

'Oh, God. Paniguradong may masama siyang balak!'

“Inara, hindi ako humihingi ng opinyon mo. This is an order. Sasama ka sa akin bukas para mag-interview kay Young Master El Davion. Kung ayaw mo, magsimula ka nang mag-impake ng mga gamit mo at umalis ka na lang sa kompanya.”

Nanlamig ang boses ni Tatiana. Matigas iyon at walang puwang para sa pagtanggi.

Napatigil siya.

Gusto sana niyang sigawan ang babae at pumayag na lamang sa sinabi nitong pag-alis, ngunit hindi niya iyon magagawa.

Kapag bumagsak siya sa internship, hindi siya makakatanggap ng diploma. Mas lalo rin siyang mahihirapang makahanap ng trabaho.

Kailangan niyang lunukin ang sariling takot.

“P-Pasensya na, Ma'am Yana. N-Nauunawaan ko po…” mahina niyang sagot na halos hindi na marinig.

Habang palabas siya ng opisina, ramdam na ramdam niya ang bigat sa kaniyang dibdib.

'Ano ba talaga ang binabalak ng lalaking iyon? Ano ba talaga ang gusto ni Kaizan na mangyari sa akin?!'

Napasabunot siya sa sariling buhok.

'Mas mauuna pa yata ako kay Lola na maglaho sa mundong ito dahil sa stress na dulot ng lalaking iyon!'