CHAPTER 2

Sigurado si Leandro na babalik din agad si Amara dahil sa tuwing pinag-uusapan nila ang tungkol sa divorce ay palagi lang itong umaalis ng ilang sandali ngunit bumabalik din upang suyuin siya.

Kaya naniniwala siyang ganoon din ang mangyayari ngayon. Sa isip niya ay marahil emosyonal lang si Amara dahil sa pagkawala ng kanilang anak ngunit para kay Leandro, ang batang iyon ay isang aksidente lamang. Hindi niya kailanman ginusto ang pagbubuntis ni Amara, kaya wala siyang naramdamang lungkot ng malaman niyang nakunan ito.

---

Kasama ng divorce agreement ang bank card na naglalaman ng 50 milion pessos bilang settlement.

Tahimik itong kinuha ni Amara, kung noon pa niya pinirmahan ang mga papeles, matagal na sana siyang nakalaya. Sa halip ay inubos niya ang tatlong taon sa pag-asang balang araw ay mamahalin din siya ng asawa.

Ngayon ay natauhan na siya dahil panahon na para piliin naman niya ang sarili.

…….

Kinagabihan ay sumakay siya ng taxi papunta sa condominium na iniwan sa kanya ng kanyang tiyuhin bago ito tuluyang manirahan sa ibang bansa.

Hindi niya inakalang balang araw ay magagamit niya ito, malinis ang buong unit dahil ipinapalinis na niya ito kaninang hapon.

Tahimik niyang ipinasok ang maleta at pinagmasdan ang malawak ngunit bakanteng sala. Kung noon ay natatakot siyang mamuhay nang mag-isa ngunit ngayon ay mas gusto na niyang mapag-isa kesa muling makasama si Leandro.

Alas-sais ng umaga nang magising siya dahil sa tunog ng alarm. "Gumawa ng almusal para kay Leandro." Iyon ang note ng alarm na siya ang may gawa, ilang segundo siyang nakatitig sa screen bago tuluyang burahin ang alarm dahil hindi na niya kailangang gumising ng mas maaga para magluto. Muli siyang humiga at mahimbing na natulog.

---

Samantala, alas-otso nang magising si Leandro. Masakit ang ulo niya dahil sa hangover sa pag-inom kagabi, natigilan siya ng mapansin niyang may isang baso ng maligamgam na tubig sa tabi ng kama.

Napangiti siya ng may mapagtanto, ang akala niya ay bumalik na si Amara. Pagkababa niya sa dining area, agad niyang hinanap ang asawa.

"Nasaan si Amara?" malamig niyang tanong sa kasambahay.

Lumabas si Aling Rosa mula sa kusina. "Magandang umaga po, sir. Ako po ang naghanda ng almusal dahil sinabi po ni ma'am kagabi na hindi na siya uuwi kaya pinapunta niya ako ng maaga ngayon."

Nagkunot-noo si Leandro at napabaling sa mesa ang tingin niya, isang simpleng almusal lamang ang nakahain—tinapay, itlog, gatas at keso.

Malayong-malayo iyon sa mga masasarap na pagkaing araw-araw na inihahanda ni Amara.

"Ito lang ba ang hinanda mong agahan ko?" malamig niyang tanong.

Napayuko si Aling Rosa sa takot na mapagalitan. "Pasensya na po, si ma'am po kasi ang laging nagluluto kaya hindi ko alam ang gusto ninyo."

"Bakit hindi mo siya tinawagan?" May diing tanong ni Leandro.

"Sinubukan ko po, pero hindi na siya sumasagot." Nakayukong sagot ng kasambahay.

Tahimik na napakuyom ang kamao ni Leandro. Gayunpaman, kampante at sigurado pa rin siyang babalik din si Amara kagaya ng dati. Sa inis ay iniwan niya ang almusal at umalis ng bahay.

---

Sa kabilang banda ay mahimbing namang nakatulog si Amara at inabot ito ng tanghali. Pagkagising niya ay umorder na lamang siya ng pagkain.

Habang kumakain ay nagbabasa siya ng mga balita tungkol sa technology. Nakita niyang marami sa dati niyang mga kaklase ang naging successful na sa kani-kanilang trabaho ngunit wala siyang makitang balita tungkol sa dati niyang professor.

Naalala niya kung gaano siya nito sinuportahan noon at kung gaano ito naniwalang malayo ang mararating niya ngunit tinalikuran niya ang sariling pangarap ng piliin niyang maging asawa ni Leandro.

Napabuntong-hininga siya bago kinuha ang cellphone, tinawagan niya ang matalik na kaibigan na si Angela.

"Angela, pwede ba tayong magkita?" Bungad niya ng sagutin nito ang tawag.

"Sampung beses mo na akong niyayang lumabas pero ni minsan hindi mo ako sinipot. Sigurado ka bang seryoso ka ngayon?"

Napayuko si Amara, alam niyang siya ang nagkulang. Matapos siyang ikasal, unti-unti niyang pinabayaan ang mga kaibigan at ang sariling pangarap.

Huminga siya ng malalim bago nagsalita. "Hiwalay na kami ni Leandro."

Ilang segundo ang lumipas bago muling nagsalita si Angela. "Saan at anong oras?"

---

Matapos asikasuhin ang mga papeles ng kanilang divorce ay dumiretso na si Amara sa coffee shop na napagkasunduan nilang pagkikitaan ng kaibigan.

Umorder siya ng kape at tahimik itong hinigop ngunit bigla siyang natigilan at nanigas ang buong katawan ng makita ang taong hindi niya inaakalang muling makikita pa.

Hindi niya akalaing wala pang isang araw matapos ang kanilang paghihiwalay ay muling magsasalubong ang kanilang landas ni Leandro.

......

Hindi lang si Amara ang natigilan.

Pagpasok ni Leandro sa coffee shop, agad ding nagtama ang kanilang mga mata. Bahagya siyang nagulat nang makitang kalmado lang ang dating asawa. Wala itong bakas ng pag-iyak o pagsusumamo na inaasahan niya.

Tahimik lang na ibinaba ni Amara ang tasa ng kape at saka umiwas ng tingin. Wala siyang balak kausapin ito.

Para sa kanya, tapos na ang lahat.

Samantala, hindi inaasahan ni Leandro na makikita niya agad si Amara. Akala niya ay gaya ng dati, ilang oras lang itong magtatampo bago kusang babalik sa bahay.

Ngunit iba ang nakikita niya ngayon.

Hindi na siya hinabol ni Amara. Hindi rin ito nagpakita ng anumang senyales na gusto pa siyang kausapin.

Hindi niya maipaliwanag kung bakit bigla siyang nakaramdam ng kakaibang inis.