CHAPTER 2: The Three-Month Ultimatum

CHAPTER 2: The Three-Month Ultimatum

~

PAGLIPAS ng kalahating oras, natapos din nila ang paghahanda ng mesa para sa agahan. Mabilis na kumilos si Dani para pagsilbihan ang kanyang biyenan at si Drake.

“Eto na po ’yung green tea niyo, Mommy,” wika ni Dani saka maingat na inilapag ang tasa sa harap ng kaniyang biyenan.

“Thank you,” malamig na tugon ng matanda nang hindi man lang siya nililingon.

Sumunod na nilapitan ni Dani si Drake para ipagsilbi ito ng toasted bread, ngunit mabilis na inilayo ni Drake ang plato. “Ako na. Umupo ka na lang diyan,” malamig na utos ni Drake.

Pilit na ngumiti si Dani at tahimik na umupo sa bakanteng upuan sa tabi ng kaniyang asawa. Bago pa man makahawak si Dani ng tinapay, pumasok na sa breakfast ang matalas na boses ng kanyang biyenan na si Donya Victoria.

“One year. Isang taon ka nang nakatira sa pamilyang Del Fierro, Danielle.” Tumingin ito nang diretso sa kaniya. “Pero hanggang ngayon, wala ka pa ring anak.”

Bumagsak ang kamay ni Dani sa kaniyang lap. Yumuko siya nang malalim, pinagsalikop ang kaniyang mga daliri sa ilalim ng mesa. Hindi siya makatingin kanino man, lalo na sa kaniyang biyenan. Ramdam na ramdam niya ang mga tingin ng kaniyang dalawang hipag na tila nang-uuyam sa magkabilang dako ng mesa.

Nahihiya siya. Ang pamilya ng asawa niya ay kabilang sa mga pinakamataas na lipunan sa Pilipinas, may lahing Kastila at malaking yaman. Ang kumpanya nilang Del Fierro Group of Companies ay nagmamay-ari ng mga kilalang luxury hotels, real estate developments, at mga pribadong ospital sa bansa.

Ang wealth at power na ’yon ay hinati sa tatlong magkakapatid, si Light na siyang panganay at kasalukuyang namumuno sa buong imperyo, ang pangalawang kapatid na si Raven, at si Drake na pinakabunso.

“Gumawa na ako ng appointment sa pinakamagaling na OB-GYN sa St. Luke’s,” sabi ng biyenan sabay tulak ng business card kay Drake para ibigay kay Dani.

Kinuha naman iyon ni Drake nang walang kagana-gana at inabot kay Dani nang hindi man lang tumitingin sa kaniya.

“I want you to be checked immediately,” hirit pa ng matanda.

“Baka naman baog talaga ’yan, Mommy?” singit ni Yngrid, ang asawa ng panganay na si Light, at ang tumatayong chairman ng Del Fierro Group of companies. Napatingin ang lahat sa kaniya habang ang asawa naman nito ay patuloy lang sa pag-inom ng kape.

“Pwede ring sinasadya niyang itago na baog siya para hindi siya hiwalayan ni Drake,” dagdag naman ng isa pang hipag na si Irish, at asawa ng pangalawang Del Fierro na si Raven, na lalo namang nagpainit ng sitwasyon.

Palaging mababa ang tingin ng dalawa kay Dani dahil sa malaking agwat ng status nila sa buhay. Si Yngrid ay isang kilalang fashion designer mula sa mayamang angkan, habang si Irish naman ay isang sikat na corporate lawyer at anak ng may-ari ng kilalang law firm sa Makati.

Habang si Dani? Isang simpleng babae lang na nagkataong napasok sa pamilya dahil sa lumang kasunduan at utang na loob ng kaniyang lolo. Ang salitang ‘baog’ ay parang matinding sampal sa mukha ni Dani. Ang sakit ng paghuhusga nila, lalo na’t alam niyang wala namang nangyayari sa kanila ni Drake dahil kailanman ay hindi siya ginalaw ng asawa.

Namutla ang mukha ni Dani. Tumingin siya kay Drake sa kaniyang tabi, pero nakatitig lang ito sa sariling plato na parang walang naririnig. Tulad ng dati, hindi siya ipagtatanggol ni Drake.

Lumamig ang pakiramdam ni Dani pero pilit niyang inipon ang lakas ng loob para magsalita. “M-Mommy... maayos po ang kalusugan ko. Wala pong problema sa akin...”

Ibinalibag ng kaniyang biyenan ang butter knife sa mesa na ikinagulat ng lahat. Matalim at malamig ang titig nito kay Dani. “Don’t tell me what's fine and what's not, Danielle! Sundin mo ang sinasabi ko at ipakita mo sa akin ang resulta ng check-up!”

“Gawin mo na lang ang sinasabi ni Mommy, Dani,” sa wakas ay nagsalita rin si Drake. Pero sa halip na itanggol siya, ay kampi pa ito sa kaniyang ina.

Lalong nanginginig ang mga kamay ni Dani sa ilalim ng mesa. Pilit niyang pinipigilan ang pagpatak ng kaniyang mga luha habang ang sarili niyang asawa ay kasama sa mga dumudurog sa kaniya.

“At isa pa,” patuloy ni Drake nang walang kaabog-abog. “I think you should really get checked. Sino ba naman ang nakakaalam kung sino sa atin ang may problema? Baka nga ikaw talaga ang may kakulangan.”

Napaangat ang ulo ni Dani, pikit-matang tinitigan si Drake. Paano nito nasasabi ’yon sa harap ng buong pamilya kung alam nitong hindi man lang sila nagtabi sa kama kahit isang beses?

“Makinig ka nang mabuti,” muling nagsalita ang biyenan sa isang authoratative na tono. “I’m giving you three months from now. kailangan mong mabuntis.” Bawat salita ay may dalang matinding banta at diin. “Kapag wala pa ring mangyayari sa loob ng tatlong buwan, ako mismo ang mag-uutos kay Drake na hiwalayan ka. At pagkatapos no’n, pwedeng-pwe de ka nang bumalik sa iskwater at alagaan ang lolo mong malapit nang mamatay.”