Chapter 6: President?!

Everest Corp.

Pagdating ni Fae sa kumpanya, bumaba siya ng taxi at tiningnan ang malaking gusali ng Everest Corp. Kumakabog ang dibdib niya, pero agad niyang inangat ang sarili at ngumiti.

"Kaya mo 'to, Fae. Magaling ka. Walang imposible!" bulong niya sa sarili habang hinihigpitan ang hawak sa envelope ng kanyang resume.

Pagpasok niya sa loob ng building, sinundan niya ang direksyon patungo sa interview room. Pagbukas niya ng pinto ng waiting area, napansin niya ang dami ng mga aplikante — may iba't ibang edad, porma, at mukhang seryoso ang mga mukha.

"Ang dami pala," bulong niya sa sarili, sabay huminga nang malalim. "Okay lang 'yan, laban lang!"

Tumayo siya sa isang tabi, nag-ayos ng buhok at nilaro ang ID sling sa kanyang leeg.

Ilang saglit pa, dumating ang isang lalaki na may bitbit na clipboard. Matikas ang tindig at may propesyonal na aura. Tumayo ito sa harap ng mga naghihintay at nagsalita.

"Good morning, everyone. Welcome to Everest Corp. We have several available positions in our company, and you will be assigned based on your qualifications, skills, and performance in this interview. So, do your best."

Nagkatinginan ang mga aplikante, habang bahagyang ngumiti si Fae habang patuloy na chinecheer ang sarili sa isip.

"We will now start calling names. Once your name is called, please proceed to the interview room one by one."

Isa-isang tinawag ang mga pangalan, at ang bawat tinawag ay naglalakad papasok sa isang silid sa dulo ng waiting area kung saan isinasagawa ang interview.

Nakaupo si Fae habang hinihintay ang kanyang pangalan, ramdam niya ang unti-unting pagtaas ng tensyon, pero pilit niyang pinapanatili ang ngiti at positibong pakiramdam. "Kaya ko 'to," sabi niya ulit sa sarili habang nag-aabang.

Habang naghihintay si Fae, biglang may dalawang tao sa kanyang tabi ang nagsimulang magbulungan. Isang bading na parang ball of energy at isang lalaking mukhang interesado rin sa tsismis.

"Bes, bes, narinig mo ba? Dadating daw ngayon ang President ng kumpanya — si Mr. Gold!" excited na bulong ng bading, sabay dikit sa lalaki.

"Talaga? Anong itsura niya? Gwapo ba?" tanong ng lalaki, curious.

Umismid ang bading, sabay flip ng invisible hair. "Hay naku, bes! Misteryoso raw siya! Walang babae ang makalapit, hindi tumitingin sa mga babae, parang allergic! Sinasabi nga ng iba… baka… alam mo na… type niya e 'yung mga lalaking kagaya natin." sabay kindat sa lalaki.

"Hala, seryoso?" bulong ng lalaki.

"Oo, bes! May mga bulong-bulongan pa nga na nung isang party daw, puro lalaki ang kasama niya, mga pogi pa! Tapos ang sabi, tuwang-tuwa siya sa mga barako, kabog ang mga girls! Kaya ako, bes, kung totoo 'yan, aba… may pag-asa tayo!" sabay tili ng mahina.

Napakunot-noo si Fae habang palihim na nakikinig. 'Grabe, baka bading nga 'tong sinasabi nilang Mr. Gold…'

Napailing siya at kinilabutan sa nai-imagine na lalaki sa suit na tuwang-tuwa sa mga machong lalaki.

Biglang tinawag ang pangalan ng bading.

"Miss Lovely Mariposa, pasok na po."

"Omygas, bes good luck sa akin! Wish me chamba!" tili ng bading bago naglakad pa-sway sa interview room.

Naputol ang chikahan at naiwan si Fae, nakataas ang kilay, nag-iisip pa rin.

Pero bago pa siya makapag-isip ng maayos, biglang nagkaroon ng ingay sa labas. May mga staff na nagkakagulo at narinig niya ang sabi-sabi, "Nandito na si Mr. Gold!"

Nagbukas ang pinto ng waiting area at pumasok ang isang grupo — may manager at ilang empleyado. Tumigil ang grupo sa pinto, at saktong nasulyapan ni Fae ang isang pamilyar na mukha.

Nanlaki ang mata niya.

"Bakit siya nandito?" bulong niya sa sarili.

Hindi siya nakatiis — mabilis siyang lumapit.

"Richard, anong ginagawa mo rito?!" tanong niya, halatang gulat.

Napalingon ang manager, napakunot-noo at nagtanong.

"President, kilala niyo po ba ang aplikanteng ito?"

Nanlaki ang mata ni Richard, sabay tingin kay Fae. 'Tapos na,' naisip niya.

"President?!" gulat na tanong ni Fae at napatingin kay Richard.