Kabanata Sixteen

Sobrang dilim pa ng paligid at ramdam ko ang malamig na simoy ng hangin ng umaga nang magising ako dahil sa sakit ng tiyan na nararamdaman ko na sa sobrang sakit ay halos nakabaluktot na ako sa pagkakahiga.

“Shit! Ang sakit ng tiyan ko!” ani ko sa aking isipan na halos gusto kong sumigaw kaso hindi p’wede. Baka pati mga tao rito ay mabigla kapag bigla akong sumigaw ng dahil lang sa kabag. Hindi ko ini-expect na magiging issue sa akin ang hindi pagsuot ng panty sa panahon na ito kahit walang bentelador sa panahon na ito ay kakabagin pa rin pala ako.

Kahit pinipilipit na ako sa sakit dahil sa kabag ay naglakad ako patungong kusina para maghanap ng mainit na tubig para mag-hot compress at t’saa. Nang makarating sa kusina ay iginala ko ang aking mga mata ngunit ngayon ko lang napansin na wala man lang thermos sa panahon na ‘to. Bigla akong napasapo ng aking noo sa sobrang pagkadismaya.

“Kung kailan emergency saka pa pahihirapan ng ganito,” nanghihinang angal ko.