PAG-IWAS

Malakas na humagulgol ng iyak si Lucy habang yakap-yakap ni Juvilina. Ang Baron naman ay pasimpleng sinulyapan si Estacie na kasalukuyang nagpapag-pag ng damit na may mga tuyong dahon dahil sa ginawa. Hindi man lang binigyang pansin ng dalaga ang bagong dating.

"Baron?" Pag-uulit ng Duke nang hindi sumagot ang tinanong.

Isang buntong hininga ang ginawa ni Estacie bago isinuklay ang mga daliri sa sariling buhok. Medyo nagulo yun dahil sa pagsabunot sa kanya ni Lucy kanina. Kahit papano ay nabawasan ang tinitimping galit niya sa babae. Tungkol sa sinabi niyang pagtatalik ni Lucy at ng Crowned prince, totoo yun. Nakita talaga niya-este ng totoong Estacie ang nangyari. Isang gabing iniyakan ng totoong Estacie ang kanyang nakita.

"Pasensya na Duke Arkhil. Hindi ko nagawang kontrolin ang mag-ina ko ng sumugod sila dito sa bahay ng anak kong si Estacie." Sa wakas ay nahanap na narin ng Baron ang sariling boses.

Pero lahat ng naroon kasama si Estacie ay literal na napa-tingin sa Baron.