Chapter 3

Chapter 3

Napabalikwas si Lovely nang tumunog ang telepono.

"Hello, Lovely? Daraanan na kita diyan. Ngayon din. Magbihis ka ng maganda, magpabango ka. Kailangang maging maganda ka, may lakad tayo at ako ang taya sa gabing ito. Kumilos ka na, ha?"

Sunud-sunod na himig ni Annica, at hindi na nakasagot pa si Lovely.

Natawa na lang siya.

Kabisado na niya ang kaibigan, ganoon ito kapag nangursunada...

Hindi titigil hanggang hindi napagbibigyan.

Kumilos na siya, namili ng damit na isusuot.

Pinili niya ang isang damit na bihira niyang isuot dahil nga wala siyang hilig na maglalabas.

Humarap sa salamin. Inayos ang mukha. Naglagay ng bahagyang make-up. Nagwisik ng pabango.

At nang masdan niya ang sarili sa salamin, siya man ay medyo humanga.

Walang magsasabing biyuda na at may isang anak.

Narinig niya ang sagitsit nang gulong ng kotse sa labas.

Dumungaw siya.

Alam niyang si Annica na iyon.

Bumaba na siya.

Kaya nang bumusina si Annica, siya na ang nagbukas.

Mula ulo hanggang paa ang tingin ni Annica sa kanya.

"Amiga," pumapalatak na sambit ni Annica na inikutan pa siya.

"Ang ganda-ganda mo. Ang beauty mo, nagmumura. Kung ganyan ka ba lagi, edi may nakakasama na ko gabi-gabi."

"Pagbibigyan lang kita ngayon, hoy." tugon ni Lovely.

"Hindi ako pwedeng gabi-gabi. Marami akong inaasikaso."

"Oh sige, sige na. Pero ako ang nagsasabi sayo, di mo malilimutan ang gabing ito." himig ni Annica sabay hatak sa kamay ng Amiga.

Kotse na ni Annica ang ginamit nila.

Panay ang kwento ni Annica, panay din ang hitit ng sigarilyo.

"Saan mo ba ko dadalhin?" untag ni Lovely.

"Sa paraiso, Amiga." tugon ni Annica na sinabayan nang tumataginting na halakhak.

"Pupunta tayo sa paraiso at mamimili tayo ng kaligayahan. Magsa-shopping ng men."

Ibig nang mangiti ni Lovely sa mga naririnig niya sa kaibigan.

Hindi pa man, kinikilabutan na siya.

---

AVENIDA. Kanto ng Recto.

Dahan-dahang itinigil ni Annica ang kotse sa madilim na bahagi ng kalye.

At mula doon, itinuro niya sa kaibigan ang mga nagkikisigang mga lalaki.

Na sa tingin ni Lovely, puro teenagers, puro bata.

Naggagandahan ang mga damit.

Panay ang himas sa mga buhok nila, tinitiyak na hindi magugusot.

"Mamili ka na kung sino ang gusto mo?"

"M-mamili? Kanino? Saan?"

"Kung sino ang gusto mo. Puro pogi yan."

"A-ano ang gagawin ko?"

"Hindi mo pa nga pala alam ang gagawin. Bababa ako. At manood ka, ha?"

Bumaba si Annica.

Kekembot-kembot na naglakad, palapit sa mga poging teenagers.

Napansin naman siya agad, lapitan ang mga ito.

Nag-uunahan pa.

May kumikindat, may nagpapapungay ng mga mata.

Kiliting-kiliti naman si Annica.

Umaaringkingking.

"Hi, I'm Jowel. Remember me?" simula ng isa.

"Von is my name," sundot ng ikalawa.

"Ako ba ang hinahanap mo." dugtong pa nito.

"If you need my services, come, i'll show you the heaven and hell." sabay kindat ng pangatlo.

Nakipagbiruan si Annica, may patapik-tapik pa.

Dinig na dinig ni Lovely mula sa kotse ang halakhak ng Amiga niya.

Nakikita niya ang pakikipagbiruan nito sa mga lalaki.

Lalaking ang hanapbuhay ay ibenta ang sarili sa tamang halaga.

Nakikita rin ni Lovely kung paano umakbay si Annica.

Kung paanong dikitan at hagurin ng mga kamay ang bewang nito.

Ang kanyang...

Nangalog ang baba ni Lovely, pati tuhod.

Hindi niya kaya. Ngayon lang niya natuklasan ang gawain ng kanyang kaibigan.

Dahan-dahang binuksan ni Lovely ang pinto ng kotse.

Lumabas siya.

At lihim na tumalilis.

Ayaw niya. Hindi siya papayag.

Iiwan na niya ang kanyang Amiga, tutal, sanay naman ito sa gabing gawain.

Hindi ito maaano.

Nang sa paglingon niya, biglang sumulpot ang isang lalaki sa kanto.

Nagkabanggaan sila.

Sa sobrang lakas at pagkabigla, napaupo si Lovely.

Agad naman siyang tinulungan nito, abot ang hingi ng dispensa.

"S-sorry, di ko sinasadya. P-pauwi na kasi ako. Galing ako doon." sabay turo sa kanto kung saan, naroon nga ang mga call boys na kausap ni Annica.

"Raraket sana ako, kailangan ko ng pera. Magbabakasakali para kumita. May sakit kasi ang Nanay ko. Kailangan ng gamot." sunud-sunod na himig nito.