Kabanata 1.2

“Gusto mo akong gamitin para makapaghiganti ka sa manloloko mong boyfriend at sa kapatid mo? Wala akong pakialam sa personal mong problema.” Pagpuputol ni Tyrone sa pagpapaliwanag ni Czarina sa kaniya.

“Listen to me first,” ani naman ni Czarina dahil hindi man lang siya pinapatapos ni Tyrone na magpaliwanag. “Okay fine, I know this is my personal problem but I need you to help me at tutulungan din kita.”

“Anong tulong naman ang ibibigay mo sa akin?” masungit pa ring saad ni Tyrone.

“Kapag nagpakasal ka kay Natalie sa tingin mo ba matatapos na ang lihim na relasyon nila ng boyfriend ko? My half-sister wants to marry you pagkatapos niyang sirain ang relasyon namin ng boyfriend ko. I don’t want her to be happy habang ako durog na durog sa ginawa niya. Kapag nakuha ko na ang gusto ko, kapag nabawi ko na ang kompanya sa kanila ng kaniyang ina, I will divorce you and you can do whatever you want. Kapag si Natalie ang pinili mong pakasalan, sa tingin mo ba papayag siyang makipaghiwalay sayo? I don’t think so.” Ngumisi lang naman si Tyrone saka siya sumimsim sa ice coffee na binili ni Czarina.

“Bakit naman kita pagkakatiwalaan? Nasa iisang pamilya lang kayo. Ngayon lang kita nakita at sa tingin mo pagkakatiwalaan kita kaagad? Kung pinadala ka ng pamilya mo rito para pumayag ako na makipagsanib pwersa ang pamilya niyo sa pamilya namin, wala kang mapapala sa akin. Alam ko naman kung anong kailangan ng pamilya mo sa pamilya namin—”

“Hindi lang pamilya namin ang may kailangan sa pamilya niyo, Mr. Fuentes.” Pagpuputol ni Czarina sa sasabihin ni Tyrone. Napataas naman ang kilay ni Tyrone sa sinabi ni Czarina. “Bakit hindi mo tanungin ang pamilya mo kung anong kailangan niyo sa amin? Alam ko naman na dalawa kayong pinagpipilian na magiging tagapagmana ng kompanya ng Lolo niyo. Kalaban mo ang pinsan mo sa posisyon ng pagiging CEO, tama ba? Sa tingin mo, ano ba talagang kailangan ng pamilya niyo sa pamilya namin para pumayag sila na ipagkasundo ka kay Natalie?” nagtiim ang bagang ni Tyrone dahil mas maraming nalalaman si Czarina kesa sa kaniya. Wala siyang planong magpakasal sa babaeng hindi niya mahal.

“Wala akong planong magtrabaho sa kompanya namin. Wala akong pakialam sa posisyon ng pagiging CEO. Wala akong pakakasalan sa inyo ng kapatid mo. Huwag mo akong idadamay sa problema mo at huwag mo akong gagamitin para lang makapaghiganti ka sa walang kwenta mong boyfriend.” Matigas na wika ni Tyrone saka niya iniwan si Czarina. Napabuntong hininga na lang si Czarina, akala niya ay magiging madali lang sa kaniya na kumbinsihin si Tyrone na pakasalan siya pero nagkamali siya.

Mapait siyang ngumiti at napapakamot na lang sa noo niya. Nanatili pa siya ng ilang minuto sa coffee shop bago umalis. Dumiretso siya kaagad sa bahay ng kaibigan niyang si Hailey.

“Are you okay? May ginawa na naman ba sayo ang m*****a mong stepmom?” tanong ni Hailey na ikinailing naman ni Czarina. Naupo silang dalawa sa lounge nang makarating sila sa pool area. “Then what happened?” kuryosong tanong ng kaibigan niya. Muling nagpakawala ng malalim na buntong hininga si Czarina.

“Austin is cheating on me,” mahina niyang sagot.

“What? That bastard, are you serious?” hindi makapaniwalang tanong ni Hailey. Tanging tango lang naman ang isinagot ni Czarina. Naupo si Hailey sa tabi ni Czarina saka niya ito niyakap. “How did you find out? Paano na ang kasal niyong dalawa? Itutuloy mo pa ba?” tanong niya. Hindi naman kaagad sumagot si Czarina. Kumawala na si Hailey sa pagkakayakap niya sa kaibigan niya saka niya ito tiningnan.

Tumingin lang sa kawalan si Czarina, hindi niya na rin alam ang gagawin niya. Paano niya ba sasabihin sa pamilya niya na niloloko siya ng boyfriend niya at ang babae nito ay ang sarili niyang kapatid? Paano siya paniniwalaan ng mga ito?

“Kilala mo ba kung sino ang babae niya? Nahuli mo ba sila?” tanong muli ni Hailey dahil wala pang sinasagot ang kaibigan niya sa mga tanong niya.

“Tinawagan ko si Austin para sana tingnan namin ang isusuot namin sa kasal namin pero sinabi niya na busy siya pero hindi ko sinasadya na makita siya sa hotel kasama si Natalie. Sinundan ko silang dalawa hanggang sa makapasok sila sa isang room.” Pagkwekwento niya.

“Kinausap mo ba sila?” naiinis na ring saad ni Hailey. Umiling naman si Czarina.

“Hindi ko na sila sinundan pa, wala akong lakas ng loob na kausapin sila. Ayaw kong magmukha akong kawawa sa harap nilang dalawa dahil kahit umiyak pa ako sa harap nila, wala namang pakialam sa akin si Austin dahil ang totoong mahal pala niya ay si Natalie. How ironic, right?” nasasaktan na wika ni Czarina. Akala niya ay nahanap niya na ang magiging kakampi niya sa buhay pero hindi pa rin pala, mag-isa pa rin siya. Pakiramdam niya, isinumpa siya para maging mapag-isa.

“Bakit hindi mo sabihin sa pamilya niyo ang tungkol sa panloloko nilang dalawa? Paano na ang kasal niyo ni Austin? Balak mo pa rin bang ituloy?” hindi sumagot si Czarina kaya napabuntong hininga si Hailey. “Kung totoo man ang hinala mo, wala na akong pakialam kung gaano na kalaki ang nagastos niyo para sa preparation ng kasal niyo. You don’t deserve this, umatras ka na sa kasal niyo.” Dagdag ni Hailey.

“I know that, wala naman akong plano na itali ang sarili ko sa lalaking niloloko lang ako.” Napatango si Hailey.

“That’s good to hear, mabuti na ring nalaman mo na ang tungkol sa panloloko niya bago pa man kayo ikinasal dahil kung kasal na kayo mahihirapan ka ng makawala sa kaniya. Wala kang magagawa kundi ang magtiis sa panloloko niya sayo. Kailan mo balak sabihin sa Daddy mo ang tungkol dito?”

“Hindi ko alam, pag-iisipan ko pang mabuti ang gagawin ko dahil sigurado akong magagalit sa akin si Tita Natalia kapag umatras ako sa kasal. Malaki na ang naitulong ng pamilya ni Austin sa bagong business na itinayo ni Tita Natalia.” Napairap na lang si Hailey dahil pamilya pa rin ni Czarina ang iniisip niya.

“Walang ginawa ang witch stepmom mo sa buhay mo. Sa tuwing may nagagawa kang hindi niya nagugustuhan, ikinukulong ka niya sa kwarto mo. Matuto ka namang lumaban para sa sarili mo, Czarina. Kailan ka pa matututong lumaban sa kanila? Kapag ba patay ka na?” naiinis na wika ni Hailey. Napabuntong hininga na lang si Czarina. Iniisip pa rin niya kung paano niya ba kukumbinsihin si Tyrone na pakasalan siya. Gusto niya bago niya i-cancel ang kasal dapat ay pumayag na si Tyrone sa alok niya.

Alam niyang kapag nagawa niyang kumbinsihin si Tyrone na pakasalan siya lalong magagalit sa kaniya ang stepmom niya dahil sa pang-aagaw na ginawa niya kay Natalie.