0003

Sa daming sinabi ni Cassian ay ang ‘You can’t divorce me, I will divorce you’ ang tumatak kay Ember. 

Mabilis niyang hinila ang braso mula sa pagkakahawak nito. Isa lang ang ibig sabihin sa mahaba nitong litanya, ayaw nitong matapakan ang pagkalalaki kaya kailangan siya ang maghintay kung ano ang gusto nitong kondisyon sa hiwalayan nila at magmukhang siya ang inayawan at hindi siya ang umayaw. 

Binalikan ni Ember ang pangyayari two years ago, noong minamasahe niya ang kamay nito at biglang gumalaw ang hinliliit nito. Sa sobrang gulat niya ay nabitiwan niya ang kamay ni Cassian at mabilis na tumakbo palabas ng kuwarto. Agad niyang tinawag ang mama ng asawa at sinabi ang magandang balita na nag-respond na kahit paano si Cassian. Punong-puno ng pag-asa ang puso niya at nang bumalik na siya sa kuwarto ng asawa ay tuwang-tuwa siya na nakitang gising na ito.

Nang pumasok ang mama nitong si Vivienne Montgomery ay saka lang nakitaan ng recognition ang mga mata si Cassian. Nang hanapin nito ang girlfriend na si Lauren dahil ang isa ang huling nasa memorya nito ay doon napalingon sa kaniya ang mother-in-law. 

Ipinaliwanag naman agad ni Vivienne kay Cassian na si Ember ang asawa nito at hindi si Lauren dahil tumakas ang isa bago ang kasal. At galit… Galit ang nakita ni Ember sa mga mata ng asawa pagkatapos malaman ang mga nangyari. 

At ang galit na nakita ni Ember sa mga mata ni Cassian ay balewala sa tanong nito sa ina kasunod na kung bakit kailangan ipakasal pa ito sa iba ay si Lauren lang ang mahal nito. Tiniis niya ang kahihiyan na nararamdaman nang oras na iyon, ang importante ay gising na ang lalaking mahal niya. 

“It would be the same…” mahinang usal ni Ember at humakbang palayo kay Cassian. “Ang importante lang naman ay tapusin na ang walang kwentang pagsasama natin para pareho na tayo maging malaya at masaya, ‘di ba?”

“Walang kwenta?” pagak na natawa si Cassian. “At mula pa talaga sa ‘yo ang salitang ‘yan, Ember?”

“But that’s the truth!” Asar na napapadyak si Ember. “We know that what we have is a loveless marriage from the start. I was just obligated to do my duty being my mother’s daughter. Now I want divorce and you want it too… Why not settle it once and for all? Huh? Isa pa…” Pilit siyang ngumiti para magmukhang kaswal lang sa kaniya ang mga sinasabi. “We never shared a bed, Cassian. Madali para sa atin ang maghiwalay bukas agad.”

“Loveless?” tanong ni Cassian na tiningnan si Ember mula ulo hanggang paa. “Never shared a bed?” dagdag niya. “Iyan ba ang dahilan kaya nakikipaghiwalay ka?” 

Tinitigan ni Cassian ang asawa. Kung tutuusin ay wala na siyang pakialam sa dahilan nito sa diborsyong hinihingi. Mula pa noong malaman niyang ito ang asawa niya ay hindi na siya natuwa sa ginawa ng ama na ipakasal siya rito kahit si Lauren ang dapat bride niya. Kung tinakasan siya ni Lauren dahil akala hindi na siya babalik sa dati ay okay na ‘yon sana. Hindi na dapat natuloy ang kasal at gawin si Ember na bride niya. 

At kung bakit naman sinigurado ng mga magulang nitong sina Ember at Lauren makasal siya sa isa sa mga ito? Simple lang, dahil sa perang mamanahin sa kaniya sakaling hindi siya nagising mula sa comatose. Alam niya iyon. Hindi siya tanga. 

Pero itong si Ember? Pagkatapos nitong pumayag maging asawa niya, ngayon ay sasabihin sa kaniya na maghiwalay sila tutal naman ay hindi sila nagsama bilang mag-asawa sa tunay na kahulugan ng salita. Tama pa ba ang takbo ng utak nito? Talagang handang magpagamit lang sa mga magulang? 

Totoo na walang nangyari sa kanila kahit minsan ni Ember dahil hindi ito kagaya ni Lauren na laging nakaayos at nakakaakit. Napakasimple ni Ember manamit at ang salamin nitong makapal dahil malabo ang mga mata ay nakadagdag sa pagiging nerd nito kaya mas mukha itong dapat galangin at hindi pagnasaan.

Sa madaling salita ay hindi maganda si Ember sa paningin niya una pa lang kaya wala siyang interes dito. At ngayon na parang siya pa ang pagmamalakihan nitong hiwalayan ay nakakainsulto sa pride niya. 

“Oo!” mataas ang pitch ng boses na sagot ni Ember at tumingala pa na parang proud na proud sa sinabi. “Sabihin na natin na ‘yang bagay na hindi tayo nag-sex kahit kailan ang dahilan ko. Ano rin sa ‘yo? Alangan naman na palibhasa may Lauren ka na pinagbibigyan ka lagi ay ako okay lang na tumanda ako na tigang.”

Napalunok si Ember sa sinabi. Napangiwi dahil mukhang atat pala siyang maka-experience ng sex kaya nakikipaghiwalay. Pero kanina pa siya nasasaktan kaya gagawin niya ang lahat para tapusin na ang paghihirap ng kalooban sa lalaking hindi man lang siya nagawang subukan mahalin. 

Inis na nilapitan ni Cassian si Ember na agad napaatras dahil ayaw mahawakan ng isa. Sa muling paghakbang paatras si Ember ay may naapakan itong gumulong at dahilan para muntik siyang mabuwal kung hindi siya naagapan saluhin ni Cassian. 

Nakaawang ang mga labi ni Ember. Kunot-noong nakatitig kay Cassian kahit blurred lang  ito sa tingin niya dahil natanggal ang salaming de grado mula sa mga mata niya. Itinayo siya ni Cassian at nang maramdaman niyang nakaapak na pareho ang mga paa sa sahig ay pilit niyang inaaninag sa sahig kung saan napunta ang salamin niya. 

Si Cassian ay hindi maunawaan ang sarili na nakatingin sa asawang sigeng tingin sa sahig at hinahanap ang salamin. Dinampot niya ang salamin nito at hinawakan ang braso para isuot muli rito ang salamin sa mga mata nito. 

Ngayon niya lang natitigan si Ember na malapitan. May kakaibang ganda pala ito. At bigla hindi niya alam kung bakit parang tinatablan siya habang nakatitig sa mga mata nito. Sa tagal nilang nagsama ng asawa ay bago niya lang napansin na natural ang pink nitong mga labi at ang mga mata ay golden brown. Naka-brace ito na hindi niya alam kung kailan aalisin ng dentista nito.

Last year, siya ang nagsabi sa assistant niya na dalhin si Ember sa dentista at ipaayos ang ngipin. Wala naman problema talaga sana ang mga ngipin ni Ember maliban sa sungki-sungki. Dahil asawa niya ito at ayaw niya makantyawan ng mga kaibigan ay sinabi niyang magpaayos ito ng mga ngipin. 

Hindi matatawaran ang ganda ni Lauren pero maganda rin pala si Ember, hindi nga lang nag-aayos gaya ng kapatid nito kaya hindi halata. 

“What?” tanong ni Ember na umistorbo sa iniisip ni Cassian. “Alam ko naman na hindi ako maganda kagaya ni Lauren at tama ang lagi kong naririnig sa mga kaibigan mo na hindi ako bagay sa gaya mo…” Malungkot siyang ngumiti. “At kung nakakahiya sa ‘yo na ako ang parang nakipag-divorce ay sige na, lahat sa agreement ay gawin na lang natin na puro pabor sa ‘yo.”