Chapter 208

Ang kabanatang ito ay naglalaman ng mga sensitibong salita o tema kaugnay ng imbestigasyon, krimen, at mga operasyon ng mga ahensiyang tulad ng NBI, CIDG, at PNP.

Ang lahat ng tauhan at tagpo ay pawang kathang-isip lamang. Anumang pagkakatulad sa tunay na pangalan o pangyayari ay hindi sinasadiya.

NAKITA AT NARAMDAMAN ni Saskia na sinsero si Gerald sa ginawa nitong paghingi ng tawad sa kanya. Kaya sino ba naman siya para hindi magpatawad? At least, gumaan ang pakiramdam niya dahil may isa na namang tao ang nagkasala sa kanya sa nakaraan na kusang lumapit at humingi ng tawad.

Tinanaw pa niya ang mag-ina matapos magpaalam na uuwi na, dahil bukas ay hindi raw pwedeng mawala ang mga ito sa kasal nina Weston at Katrina, dahil kasama ang mga ito sa ginawang plano ni Weston.

Siya naman ay maghihintay na lang sa muling pagbabalik ni Weston para pakinggan ang paliwanag nito sa mga nangyaring malabo sa kanyang pang-unawa.

***

WALANG TULOG si Weston sa halos buong gabi dahil sa pinaghahandaang plano ngayong araw. Alas sinco na ng umaga, pero hindi pa rin siya natatapos sa pakikipag-usap sa kabilang linya sa mga taong sangkot sa mga plano niya simula pa kahapon pagkauwi niya.

At dahil alas otso magsisimula ang kasal nila ni Katrina mamaya, ay sinigurado niyang kumpleto at nailagay na sa mga tamang lugar ang mga hidden cameras, kung saan dadaan si Bastian. Naroroon na rin sa sekretong lugar ang mga NBI, CIDG, at PNP SAF para sa paghahanda.

Halos mag a-alas siete na siya nakapag-ayos ng kanyang sarili. Dali-dali siyang pumasok sa kanyang sasakyan at mabilis na pinasibad iyon. Dahil sa bilis ng kanyang pagpapatakbo ay halos mahigit sampong minuto lang ay naroroon na siya sa hotel. Kailangang mauna siyang dumating doon kina Bastian. Nakahinga siya ng maluwag ng pagdating niya sa hotel ay wala pa roon sina Katrina. Kaya malaya pa siyang nakakagalaw at nakikipag-usap sa mga taong kasabawat niya roon.

Makalipas ang tatlumpung minuto ay siya namang pagdating nina Katrina.  Sobrang lawak ng pagkakangiti nito na parang ngayon niya lang nakita sa buong buhay niya simula nung madalas na niya itong nakakasama.

Ang simula ng kasal nila ay tahimik at walang problema, simula sa processional, homily ng nagpapanggap na pari na siyang kasabwat niya rin, vows guidance, nuptial blessing, at final blessing. At nang sabihin ng pari ang “You may now kiss the bride” hinalikan naman niya ng pahapyaw si Katrina sa labi. Hindi nga niya naramdaman kung dumapo ba sa mga labi nito ang kanyang mga labi.

Habang nagaganap ang kasal sa loob, ay may command van na puno ng screen sa hindi kalayuan sa sekretong lugar sa hotel na kung saan, nakikita ng mga nagbabantay mula roon ang real-time feed na kasalukuyang nangyayari mula sa mga hidden cameras na ini-setup nila.

Pagkatapos na pagkatapos ng kasal nila ni Katrina ay agad silang pumunta sa katabing venue ng hotel wedding ceremony. Natuwa siya dahil sobrang kaunti ng bilang ng kanilang mga bisita, marahil dahil sa biglaan ang naging kasal nila at hindi nakapaghanda ang iba.

Narinig niya mula sa suot na earpiece ang pag-uusap ng mga agent ng NBI, CIDG, at PNP SAF.

“Team, nakatayo ang target habang nakikipagkamay sa ibang mga bisita. Ama ng bride. Kumpirmado. Handa na ba kayo?” dinig niyang sambit ng NBI agent. Natatanaw niya ito dahil naroon lamang ito sa may hindi kalayuan sa kanila, nagpapanggap na isa sa mga wedding organizer.

Sa kabilang linya, sumagot ang isang CIDG agent na nagpapanggap bilang photographer.

“Nakikita ko. Handa na kami. Magsabi lang kayo kung kailan kikilos.”

“Target in sight. Lahat ng exit ay may bantay na,” ani ng PNP SAF.

Pagkatapos na makamayan lahat ni Bastian ang mga bisita nila sa kasal, ay narinig niya mula sa suot na earpiece ang utos mula sa mobile command van.

“Green light. Simulan na ang operasyon. Siguraduhing walang masasaktan.”

Tumango ang agent ng NBI. Ang limang lalaking nagpapanggap na staff ng hotel, ay biglang lumapit dito, pagkatapos ay sabay-sabay na kumilos. Bago pa man mangyari iyon, ay ramdam na ni Weston ang mga nagdadamihang mga tauhan ng perimeter team na nakapwesto sa bawat sulok ng hotel, sa labas man at sa loob, armado, alerto at handang umaksyon kung may tatakas man o gagawa ng masamang hakbang.

“Mr. Bastian Gudo Almeda?” tawag pansin ng NBI agent kay Bastian, habang nasa likuran nito ang limang nagpapanggap na staff ng hotel.

Lumingon naman dito si Bastian habang hindi mawala-wala ang mga ngiti sa labi.

“Oo, ako nga.”

“Kami po ay mula sa National Bureau of Investigation, katuwang ang CIDG at PNP SAF,” sambit ng NBI agent kasabay ng pagpapakita ng ID at kopya ng warrant.

Napakunot-noo naman si Bastian, wari’y wala sa hinagap nito o hindi nito inaasahan na may mangyayaring ganoong senaryo sa araw mismo ng kasal ng kanyang unica hija. Pinaghalong pagkalito at pagtataka ang makikitang nakalarawan sa mabagsik nitong mukha.

“Inaaresto po namin kayo sa bisa ng warrant of arrest para sa mga kasong: human trafficking, large-scale drug trafficking, and money laundering, ayon sa Article 1** ng Revised Penal Code at RA 9***,” ani agent ng NBI.

Nagulat ang lahat ng mga bisita sa narinig, lalong-lalo na ang asawa ni Bastian, at higit sa lahat, ay si Katrina. Bigla itong napabitiw sa pagkakahawak sa braso niya at mabilis na itong lumapit sa ama.

“Da-Dad? W-What’s happening? Totoo ba ang lahat ng ito?” nanginginig at maluha-luha nitong tanong sa ama.

Nagsisimula na rin ang bulong-bulungan sa lahat ng mga bisitang nakasaksi.