Chapter 11

"BAKIT ngayon ka lang?" Kalmado man ang tono ay naroon pa rin ang pagsasalubong ng mga kilay ni Angelo.

Hindi ako makatingin sa kaniya ng matagal dahil inaagaw ang atensyon ko ng notebook na hawak niya. Bakit nasa kaniya ang writer notes ko? Nalaman na kaya niyang ako ang totoong cameyofan at hindi ang kapatid kong si Sheena?!

"I'm asking you, bakit ngayon ka lang?" pag-uulit ng kaharap ko sa tanong. Nakaupo siya sa silya ng karinderya at magkakrus ang mga braso. Hindi ko maiwasang mailang sa paraan niya ng pagtingin sa akin.

Hindi ako 'to! Bakit ako naiilang sa isang tulad lang niya?! Hindi ito ang Rose na kilala ng lahat!

"Traffic, eh." Nilabanan ko ang mga matatalim niyang paningin sa akin.

Ikinagulat ko nang iabot niya sa akin ang notebook na hawak niya. Parang tanga ko naman iyong kinuha. "Pinapunta mo ako rito para ibigay lang itong notebook?" Napasinghal ako. Ano bang trip ng hunghang na 'to? Kung ito lang naman pala ang purpose kung bakit niya ako pinapunta rito, bakit hindi niya na lang ipinagpabukas?!

Dahan-dahang tumango si Angelo, blangko pa rin ang ekspresyon. Hindi na magkasalubong ang kaniyang mga kilay tulad kanina. Gayunpaman ay ramdam ko pa rin ang tensyon sa pagitan namin.

"Akala ko ba may sasabihin ka? Akala ko ba gusto mo akong makausap?" Ako naman ang nagsalubong ang mga kilay.

"Mukhang wala ka namang balak sabihin, eh."

Taka ko siyang tiningnan. "Sabihin ang alin? Teka nga, pinapunta mo ako rito dahil sabi mo may gusto kang pag-usapan. Tapos ngayon bigla kang naging ganiyan? Sinasayang mo lang ang oras ko, tss."

"Wala ka ba talagang sasabihin?" Magkakrus pa rin ang mga braso ng hunghang. Kung tingnan niya rin ako ay para bang gusto niya akong hatiin sa gitna. Ano bang problema ng isang 'to?

"Ano bang sasabihin ko? Eh, 'di ba ikaw ang dapat na may sabihin kasi ikaw ang may kailangan sa akin?"

Hindi umimik si Angelo. Hinilot nito ang sintido saka tumingin sa relo niya. "Ihahatid na kita."

"Hindi na," agad kong tanggi.

"Ihahatid na kita, huwag ka nang makulit." Hinila ako ni Angelo palabas ng karinderyang iyon. Sinamaan ko naman siya ng tingin dahil marami nang taong nakatingin sa amin. Nakakahiya, pisti!

Nang makarating kami sa kotse ni Angelo ay napatigil siya sa pagbukas ng pinto nito dahil may humawak sa braso niya. Natigilan naman ako nang makilala kung sino ang humawak sa braso ni Angelo.

Ikinagulat ko nang bigla-bigla ay suntukin ni Onyx si Angelo. Hindi naman na nakailag ang huli. Sobrang bilis ng mga pangyayari, sa loob ng isang kurap ay nangyari ang bagay na iyon.

"Onyx! Anong ginagawa mo?!" Agad kong hinila palayo ang kumag.

"Siya na ba ang bago mo, Rose? Kaya ba hindi na tayo pwedeng bumalik sa dati?" Maluha-luha akong tiningnan nito.

Napatingin na lamang ako kay Angelo na may dugo na sa gilid ng labi. Sinamaan ko ng tingin si Onyx dahil doon. "Hindi ka ba nag-iisip? Paano kung kaibigan ko lang 'yung tao? At saka ano naman ang pakialam mo kung magkaroon ako ng bago?"

Tiningnan ako ni Onyx sa paraang hindi ko maintindihan. Naroon ang sakit at naroon din ang pait. Hindi ko gaanong mapaliwanag. Ang masasabi ko lamang ay mukhang nasaktan siya nang sobra, ebidensya ay ang mga dumadaloy niyang luha.

"Bumalik na tayo sa dati, Rose. Please. Kahit anong gusto mo gagawin ko." Halos lumuhod ito sa harap ko.

Napakuyom ang mga kamao ko. "Ikaw ang nagbigay ng rason kaya tayo naging ganito, Onyx. You cheated, nalimutan mo na ba?" Mapait akong ngumisi.

"A-Ano? Hindi! Saan nanggaling iyan? Hinding-hindi kita lolokohin!"

"Ano pa bang aasahan ko? Walang manloloko na umaamin."

"Hindi mo man lang ba hihingiin ang side ko? Makikinig ka na lang ba talaga sa mga sabi-sabi?"

Muli ay nagpakita ako ng nakakalokong ngisi. "Eh, mukhang mas mapagkakatiwalaan ko sila kesa sa'yo, eh."

"Gano'n ba ang pagkakakilala mo sa akin, Rose? Oo, aaminin ko gago ako madalas pero hinding-hindi kita kayang lokohin."

Hindi ko na lang siya pinakinggan at sumakay na lamang ako ng kotse ni Angelo. Hinintay kong sumakay rin ang hunghang na si Angelo pero mukhang wala itong balak. Masama ang pagkakatitig nito kay Onyx sa labas ng kotse.

Ikinagulat ko nang biglang ngisian ni Angelo si Onyx. Ano bang nangyayari? May balak bang mag-away ang mga ito? Agad akong bumaba ng sinasakyan ko.

"Tayo na, Angelo." Hinila ko ito pero ayaw nitong magpatinag sa pagkakatitig kay Onyx. Parehas silang hindi mahiwat sa paglalabanan ng masasamang titig.

"Onyx, umalis ka na lang. Mag-usap na lang tayo sa ibang araw." Itinulak ko ito nang bahagya pero tulad ni Angelo ay mukhang wala rin itong balak magpatinag.

Palipat-lipat ko silang tiningnang dalawa.

"Ikaw pala 'yung ipinalit sa akin ni Rose?" nanunuyang tanong ni Onyx.

Nanlaki ang mga mata ko matapos iyong itanong ni Onyx. Ano bang nangyayari? Sandali!

"Eh, ano naman sa'yo kung ako nga?" mapanuyang pagtatanong rin ni Angelo.

Mas lalo kong ikinagulat ang sinabi ni Angelo na iyon. Ano bang nangyayari sa dalawang ito? Napatingin ako sa hunghang na Angelo ganun din naman sa kumag na Onyx.

Nang hindi makapag-pigil ay ako na ang kusang lumayo. Hindi ko alam kung anong trip nilang dalawa at balak pa yatang maglabanan ng titig buong magdamag. Pwes, huwag nila akong isama dahil busy ako pagbabasa at paggawa ng mga assignment.

Maglalakad na sana ako palayo doon pero ikinagulat ko nang parehas nila akong hawakan sa braso; si Onyx sa kaliwa at si Angelo sa kanan.

"Ano bang problema niyo?" magkasalubong ang kilay kong tanong. "Marami pa akong assignment na gagawin, uuwi na ako kaya pwede ba bitawan niyo akong dalawa?"

"Ako na ang gagawa ng assignment mo," pagsagot ni Onyx na kay Angelo pa rin nakatingin.

"Tara na, Rose. Ihahatid na kita." Mas nilakasan ni Angelo ang paghila sa akin dahilan para mapangiwi ako. Yawa namang buhay 'to oh! Hindi naman ako si Jugyeong para tratuhin ng ganito!

Malakas kong hinila ang braso ko dahilan para gulat silang mapatingin sa akin. Nakawala ako sa pagkakahawak nila. Inayos ko ang nagulo kong buhok saka sila ulit sinamaan ng tingin. "Kayong dalawa," Itinuro ko sila, "pwede ba patahimikin ninyo ang buhay ko?!"

Hindi ko na sila hinintay pang magsalita. Agad akong pumara ng taxi at sumakay doon.