Chapter 2: P1

Nanginig nang bahagya si Lorence. Matapos ang paulit-ulit na paghingi ng paumanhin, at nang makitang tila hindi na nagagalit si Gilbert yumuko ito at lumabas ng tanggapan.

Hindi pa rin malinaw kung ano ang tunay na nararamdaman ni Gilbert, tila kailangan niyang maging maingat sa mga kilos at salita mula ngayon.

Muling bumalot ang katahimikan sa loob ng tanggapan.

Pinunasan ni Gilbert ang kape na hindi sinasadyang natapon at ibinaba ang mouse upang i-scroll ang laman ng screen.

Binuksan niya ang impormasyon ng empleyadong si Mariposa.

Ang litrato sa ID ay kuha pa noong nasa kolehiyo sila, noong nagpumilit itong magpalitrato kasama siya.

Ibinaba niya pa ang screen hanggang sa seksyon ng katayuang sibil.

May asawa na.

Dahil sa presyur na dulot ng bagong talagang lider, buong departamento ay napilitang mag-overtime.

Alas-nuwebe na ng gabi nang matapos nila ang kanilang mga gawain. Lalo na ang mga project team leader na partikular na pinangalanan ni Gilbert.

Nakaharap silang lahat sa kanilang mga screen na may mga mukhang puno ng paghihirap at pagkabahala, at wala ni isa sa kanila ang naglakas-loob na magpaalam na umuwi nang maaga.

Tumunog ang telepono ni Mariposa. Ang tumatawag ay ang kanyang anak na si Mahalia na nagtatanong kung kailan siya uuwi.

Mahinang ibinaba ni Mariposa ang kanyang boses. "Haliya anak, matulog na muna kayo ni Lola. Mamaya pa makakauwi si Mommy." aniya.

Sa abatang boses sumagot si Mahalia,

"Sige po, Mommy. Huwag ka masyadong magpakapagod sa trabaho. Kaya naman po naming kumain nang kaunti ni Lola." anito.

Naramdaman ni Mariposa ang bahagyang pagsikip ng kanyang lalamunan.

Upang hindi tuluyang mawalan ng kontrol sa kanyang emosyon, dali-dali niyang ibinaba ang tawag.

Ngunit hindi pa rin siya makalma. Paulit-ulit na umaalingawngaw sa kanyang isip ang inosente at mapagmalasakit na mga salita ng kanyang anak kanina.

Si Mariposa ay may apelyido ng kanyang ina, samantalang ang ama naman niya ay may apelyidong Valeroso.

Matapos pumanaw ang ama ni Mariposa, dahil sa labis na pangungulila nila rito, nagpasya siya at nang kanyang ina na gamitin ni Mahalia ang apelyido nito.

Walang nakaaalam na si Mahalia ay tunay na anak ni Gilbert. Maging ang lalaki mismo ay hindi kailanman nalaman na mayroon siyang sariling anak na babae sa mundong ito.

Dalawang taong gulang na si Mahalia ngayong taon at may ilang problema sa kanyang kalusugan, kaya mula pa pagkabata ay madali na siyang magkasakit.

Sinabi ng doktor na ipinanganak siyang may maselang pangangatawan at nangangailangan ng maingat na pag-aaruga at gamutan, kaya malaki ang magagastos sa kanyang pagpapalaki.

Dinala ni Mariposa ang kanyang anak sa isang doktor ng tradisyunal na medisina sa ibang bansa. Ang mga reseta pa lamang ay umaabot na sa limang digit ang halaga bawat buwan, ngunit hangga't maibabalik ang kalusugan ng kanyang anak, handa siyang gumastos ng anumang halaga.

Matapos malugi ang pamilya Madrigal, ibinenta ni Mariposa ang lahat ng kanyang mamahaling bag, alahas, sasakyan, at mga bahay. Sa pamamagitan nito, bahagya lamang niyang nabayaran ang ilan sa kanilang mga utang.

Ngayon, kapwa nangangailangan ng gamot ang ina ni Mariposa at ang anak niya, at siya lamang ang inaasahan ng buong pamilya upang kumita ng pera.

Kaya kahit na labis siyang nabigla nang makita si Gilbert, kahit gusto niyang tumakas, at kahit hindi mapigilan ang panginginig ng kanyang mga binti, hindi maaaring mawala sa kanya ang trabahong ito.

Kailangan niya ng pera.

Nang sagutin ni Mariposa ang tawag ni Mahalia, natawang sinabi naman ng katrabaho niya sa katabing mesa,

"Hindi ko akalaing ganyan ka pa kabata, pero ang laki na pala ng anak mo. Nasaan naman ang ama ng bata?"

Bagama't hindi nag-angat ng tingin ang mga tao sa paligid, lahat sila ay lihim na nakinig at itinaas ang kanilang mga tainga sa usapan.

Mahinang natawa si Mariposa at isinuklay ang kanyang buhok sa likod ng kanyang tainga. Kahit simpleng kilos lamang iyon, puno pa rin ito ng likas na alindog.

Bahagya niyang ibinuka ang kanyang mga labi at sinabi, "Hindi maganda ang kalusugan niya. Nasa bahay lang siya at kailangan niyang uminom ng gamot bawat buwan."

Biglang natahimik ang kanyang mga kasamahan. Alam nilang pareho na hindi maganda ang kalusugan ng anak ni Mariposa at ng kanyang ina.

Ibig sabihin, halos lahat ng miyembro ng kanilang pamilya ay may karamdaman, at si Mariposa lamang ang umaasaang kumita ng pera para sa kanilang lahat?

Napakatatag talaga ni Mariposa.

Matapos magkuwentuhan at magtsismisan nang sandali, wala nang nagtanong pa.

Lahat ay muling yumuko at nagtuon ng pansin sa kanilang trabaho, umaasang matapos agad ang mga gawain upang makauwi na sila sa kanilang mga bahay sa lalong madaling panahon.

Sa labas ng departamento, may isang pares ng makintab na sapatos na balat na nakahinto roon. Ang lalaking nakasuot ng pasadyang suit ay may hawak na cellphone, at mula sa kabilang linya ay naririnig ang isang boses na paulit-ulit na nangungulit.

"Hello? Kuya Gil? Kinakausap kita. Nagtatanong si Mama kung libre ka ngayong weekend at kung maaari kang dumaan para sa isang simpleng salu-salo."

Pagliko sa kanto, mahahabang hakbang siyang pumasok sa elevator. 

"Hindi." sagot niya nang malamig.

“Paano naman sa susunod pang linggo?”

“Hindi rin.”

Napakamot na lamang ng ulo si Harley Fuentes sa kabilang linya, hindi alam kung ano pa ang sasabihin.

Ang totoo, dahilan lamang ang pag-imbita kay Gilbert para kumain. Ang tunay na pakay ng ina ni Harley ay ipakilala siya sa isang babae at ipagkasundo siya sa isang blind date.

“Kakakuha mo pa lamang ng pamamahala sa kumpanya ngunit ganyan ka na kasipag magtrabaho? Wala ka na ba talagang oras kumain? Noong nakaraan, inanyaya ko sana si Mariposa na kumain, ngunit sinabi niyang abala siya. Kung hindi pa alam ng iba, iisipin nilang lahat kayo ay tumatakbong pangulo.”

Nang mabanggit na ang pangalan ni Mariposa, napagtanto ni Harley na naparami na ang kanyang sinabi.

Bigla na lamang itong lumabas sa kanyang bibig, paano niya makalimutan na ang kaharap niya ay si Gilbert, ang dating karelasyon ni Mariposa!

Nagngalit ang mga bagang ni Harley at tinapik-tapik ang kanyang bibig.

Matalik na magkaibigan sina Harley at Mariposa. Noong sila ay nasa kolehiyo pa, halos magkasama sila sa lahat ng oras upang maglaro.