4. SHE'S MY BODYGUARD

NANG makapasok sila sa loob ng elevator ay doon pa lang sila nakahinga nang maayos. Hinubad ni Cynthia ang suot niyang mask at shade at saka tumingin ng masama sa lalaking kasama niya sa loob ng elevator.

"Ito ba ang walang kwenta mong naiisip na ibigay sa ‘kin bilang bagong identity?" Naiinis nitong hinablot ang kwelyo ng suot niyang polo.

"S-Sandli lang naman… hindi pa tapos ang ganap! Masyado ka namang warfreak! Bitiwan mo na ang kwelyo ko!" sambit niya na medyo nanginig pa ang boses habang hawak ang mga kamay nito.

"Ayusin mo lang, ha!" Sabay bitiw nito sa kanyang kwelyo.

Maya-maya nga ay bumukas ang pintuan ng elevator kaya naman umayos sila ng pagkakatayo na animo'y walang naganap na kaguluhan sa pagitan nila. Nang bumaba ng elevator si Matthew ay sumunod na rin ito sa kanya.

Buong araw lang nakaupo sa loob ng opisina niya ang dalaga, at alam ni Matthew na naiinip na ito. Pansin niya ‘yon ngunit nagpapanggap lang siyang abala. Marami kasi siyang papeles na hindi pa nababasa at napipirmahan. Alam niyang kaunti na lang ay mauubos na ang pasensiya ng dalaga.

"Hanggang kailan ba ako ganito na narito lang sa opisina mo? Ano? Ganito na lang? Na magbabantay ako sa ‘yo araw-araw, at bubuntot ako sa'yo na parang aso? Ayoko nga!" singhal nito na napahalukipkip pa at napairap sa kanya ng todo.

Siya naman ay lihim na nangingiti. Para siyang kinikiliti sa tuwing nakikita niya ang pag-irap ng mga mata nito. Sa tuwing tatapangan din siya nito ng mukha ay mas lalo niya pang nakikita ang kagandahan ng dalaga.

"Eh ano ba sa tingin mo ang trabaho ng bodyguard? Siyempre kung nasaan ako, nandoon ka rin," sambit niyang kunwari ay napakaseryoso ng mukha niya.

"Ayoko na! I quit!"

"Oops… may pinirmahan tayong kontrata.” Pagpapa-alala niya kung saan ay  itinaas pa niya ang papel na ‘yon na kanilang pinirmahan.

"Eh di magdemanda ka! Hindi mo pa ako kilala at hindi mo alam kung ako ba talaga ang pangalang inilagay mo diyan kaya naman wala kang habol!" bulyaw nito sa kanya at tumalikod na.

Naiinis itong lumabas ng opisina niya at aalis na sana, ngunit nang may mapansing mga kalalakihan na naka-itim na ibang-iba sa mga lalaking nakita nito kanina, sigurado ang dalaga na hindi ito mga tauhan ni Matthew.

"Sa’n ang opisina ni Mr. Matthew Austria?" tanong ng isa sa mga lalaki.

Nagtanong din ang lalaking empleyado roon sa lalaking nagtatanong, "Bakit niyo siya hinahanap? May apointment po ba kayo sa boss namin?"

"Wala ka na ro'n! Sabihin mo na lang kung ayaw mong pasabugin ko ang bao ng ulo mo?" Sabay ipinakita nito ang hawak na baril na nakakubli sa loob ng suot nitong itim na jacket.

Nang makita ito ni Cynthia, mabilis itong napatalikod at binalak na lang na balewalain, ngunit narinig niya na bigla na lang lumabas si Matthew para lang tawagin siya.

"Cynthia!" sigaw ng binata.

Dahil doon, naagaw nito ang pansin ng mga armadong lalaki at lahat ay napatingin. Ngumisi ang isang lalaki na kanina lang ay hinahanap si Matthew.

"Oh, boy! Kanina ka pa namin hinahanap. Ikaw lang talaga ang kailangan namin... buti nagpakita ka na—hindi mo na kami pinahirapan," nakangising sambit ng lalaki sabay buka nito sa isang parte ng jacket na suot upang ipakita ang baril na nakasuksok sa baywang nito.

"Teka, sino ba kayo? Paano naman kayo nakapasok sa building na ‘to? Hanggang dito ba naman sa building ng kumpanya ko, naririto kayo?" matapang niyang tanong sa mga lalaki. Malakas ang loob niya dahil alam niyang naroon pa naman si Cynthia; alam niyang tutulungan siya nito.

"Kayong lahat, ang tapang ng amo niyo, ‘no? Dumapa na ang ayaw madamay! Huwag niyo nang subukang pindutin ang emergency alarm ng buong building! Tahimik kaming aalis, basta makipagtulungan lang kayo!"

"Ito lang amo niyo ang kailangan namin! Hindi kami mananakit ng iba… pangako!" sabat naman ng isa pa sa mga kasama ng lalaking gustong kumuha kay Matthew. Mabilis namang dumapa ang lahat ng mga empleyado na nandoon dahil na rin sa pagsenyas ni Matthew na sumunod na lang ang mga ito.

"Hindi kami papayag na kunin mo ang boss namin!" sigaw pa ni Sebastian, kasama nito ang ilan pang mga bodyguard niyang mga lalaki.

"Huwag na kayong manlaban pa! Dadanak lang ang dugo sa buong building na ‘to; hindi niyo naman maililigtas ang amo niyo. Kaya kung ako sa inyo, makinig na lang kayo!" Nakangisi pa rin ang isa pang armado na nakatutok na ang baril kay Matthew.

Agad na lumapit ang isa sa mga kasama nito upang kunin si Matthew. Hindi naman na nanlaban pa si Matthew, hanggang sa makalabas sila ng lobby papuntang elevator upang makababa silang lahat. Ang dalawang armado ay nakatutok ang baril sa nakararami, habang hawak naman ng isa pang lalaki si Matthew sa leeg at may nakatutok na baril.

"Ano’ng gagawin natin? Tumawag na kayo ng mga pulis!" sigaw ni Sebastian.

"Sir, ano na? Pababayaan na lang ba natin si boss?" tanong naman ng isa sa mga bodyguard.

"Mga inutil!" Pinagsisipa naman ni Alfred ang mga tauhan ni Sebastian. "Hinayaan niyong makuha ang presidente at may-ari ng kumpanya?! Mga walang kwenta!" sigaw pa nito habang galit na nakatingin sa mga lalaking armado. Ngunit maya-maya lang ay may tumawag dito at nangingiting kinausap ang nasa kabilang linya ng telepono.

NAGULAT na lang ang lahat ng naroon nang may makita silang isang mabilis pa sa hangin na tumatambling. Huminto lang ito sa mga kasamahan ng mga armadong lalaki na gustong kumuha kay Matthew. Paghinto ay mabilis na kinarate nito ang mga lalaki. Ilang siko, sipa, sapak sa mukha, at tadyak ang inabot ng mga lalaking iyon mula sa dalagang si Cynthia. Sa ilang saglit ay wala nang malay ang ilang tauhan nito.

"Sige… barilin mo siya, at babarilin din kita," mahinahon lang na salita ni Cynthia sa lalaking may hawak kay Matthew. 

Nakatutok ang baril nito sa leeg ni Matthew ngunit nakatutok naman ang baril na hawak ni Cynthia sa lalaki.

Napabuga muna ng hangin ang lalaki bago ito nagsalita, “Mauuna naman yatang mamatay ang lalaking ‘to kaysa tumama sa akin ang bala ng baril mo!"

“Oo nga, pero tinitiyak ko sa ‘yong hindi magmimintis ang balang ‘to papunta diyan sa bumbunan mo!”

"Ano’ng deal ang gusto mo? Noong nakaraan ka pa nanggugulo sa operasyon namin!"

"Pakawalan mo siya at umalis na kayo!"

Napahalakhak muna ang lalaki bago ito nagsalita, "Boy, maswerte ka sa nakuha mo’ng babae!" Sabay tulak kay Matthew palayo sa katawan nito. Tinangka pa nitong barilin siya, ngunit mabilis na pinaputukan ni Cynthia ang kamay nito kaya’t agad na nabitiwan nito ang hawak na baril.

“Sinabi ko na sa ‘yo… hindi magmimintis ang bala ko!” Sabay lapit ni Cynthia sa kanya.

"Humanda kayo, magkikita pa tayo!" sambit ng lalaki nang makasakay na sa elevator upang makatakas.

"Hoy! Hindi ‘boy’ ang pangalan ko ha! Bwisit ‘to!" sambit ni Matthew na animo'y matapang, ngunit alam naman ng lahat na nagpapanggap lang.

“Sir, patatakasin ba natin ‘yong lalaking ‘yon?” humahangos na sigaw ni Sebastian nang makitang nagsara na ang pintuan ng elevator.

“Tama na, wala na nga eh… hayaan na natin ang mga pulis na humuli sa kanya,” sambit naman ni Matthew na hinila na ang sekretarya pabalik sa kanilang opisina.