5. TLBAHM

[Amelia]

NAPAPIKIT SIYA NG malakas na ilapag ng amo niya ang lata ng softdrink sa ibabaw ng mesa.

"Nagtatago po-ibig ko pong sabihin, nagtago 'yong ipis dito sa ilalim..." napalunok siya dahil tila nanunuri ang mga mata nito habang nakatingin sa kanya. "H-Hinabol ko para... para patayin 'yong ipis." Ngumiti siya rito pero sa tingin niya ay baka nagmukhang ngiwi ang kinalabasan no'n.

"Such a liar." Pinilig nito ang ulo.

Nang muling tumingin ito sa kanya ay napatayo siya sa kaba dahilan para makalimutan niya na nasa ilalim siya ng mesa. "Aaaarrraayyy." Napadaing siya sa sakit ng ulo ng mauntog siya.

"Simula pagkabata ko, wala pa akong nakita maski isang ipis o langaw sa pamamahay ko."

Gumapang siya paalis sa ilalim ng mesa. Nang makatayo ay humawak siya sa tuktok ng ulo niya at saka yumuko sa lalaking nasa harapan. "Pasensya na po, Sir Damon. Hindi na po mauulit." Nakangiwing sambit niya.

Hindi niya magawa na tingnan ang lalaki dahil sa palagay niya ay nanunuri na naman ang mga tingin nito, na pinakaayaw niya sa lahat ng uri ng tingin sa mundo. Pakiramdam niya kasi ay iba ang sinusuri nito sa kanya na hindi niya mabatid kung ano.

Hindi na 'to muli pang nagsalita at iniwan na siya. Akala niya ay matatawag na naman siya na bobita nito. Mabuti nalang at hindi. Napabuga siya ng hangin at hinawakan uli ang masakit na ulo. Napangiwi siya dahil nakapa niya na mayro'ng bukol 'yon.

Ikalawang araw palang niya at sa dalawang araw na 'yon ay nagalit narin niya 'to ng dalawang beses. Baka mapagalitan pa siya ni Miss Neil pagnalaman 'to.

Bakit kasi bumaba rito sa kusina ang amo niya? Akala niya talaga ay hindi ito lumalabas ng kwatro maliban pagkakain lang.

Mahina niyang kinutusan ang sarili. "Tanga mo naman, Amelia, malamang gusto uminom ng softdrinks kaya bumaba."

Mahina siyang nagpapadyak ng paa dahil sa inis sa sarili. "Kaasar naman, dalawang beses ko na siyang nagagalit." Buong araw niyang dinala ang kahihiyan sa araw na 'yon.

Ngayon ay may bago na siyang idadagdag sa mga dapat niyang gawin simula ngayon, at 'yon ang hindi na galitin o inisin ang amo niya. Hindi na dapat siya makagawa ng bagay na ikakagalit o ikaiinis nito sa kanya. Baka mamaya hindi nito dagdagan ang sahod niya at wala pa siyang makuha na bonus dahil inis sa kanya.

'Sayang ang bonus, Amelia' Aniya sa utak.

Kailangan lang niya magtiis. 'Yong tipong papasok sa tainga ang mga salita nito at ilalabas niya sa kabila. Hindi niya kailangan damdamin dahil walang mangyayari kung gagawin niya 'yon. Hindi na siya makakahanap ng ganito kalaking sahod para sa walang pinag-aralan na tulad niya.

Pumikit siya at pilit na sinisiksik sa utak ang lahat ng pwede maitulong ng trabaho niya sa pamilya niya.

Tama. Para sa pamilya niya na hirap na hirap ay gagawin niya ang lahat. Susundin at tutuparin niya ang mga plano niya.

Siya yata si Amelia. Ang babaeng walang inaatrasan!

MALAKAS na tawa ni Nelson ang maririnig sa buong kusina. Napabusangot nalang siya dahil nagawa pa nito na tawanan siya sa mga ikinuwento niya tungkol sa nangyari kagabi at kanina.

Kanina niya pa gustong-gusto na batuhin 'to ng patatas na hawak niya dahil naaasar siya sa paraan nito ng pagtawa.

"Anong nakakatawa, Nelson?" Hinugasan niya ang mga patatas na dala nito. Naluluha ang mata ni Nelson habang nakatingin sa kanya.

"Wala naman." Medyo nakatawa pa na sabi nito. "Sa sunod kasi pakiayos 'yong palusot."

"Wala na kasi akong maisip na palusot. Saka kahit sino naman kasi matatakot sa amo natin, ikaw hindi ka ba natatakot sa kanya?"

Natigilan ito. "Oo nga, nakakatakot talaga si Sir Damon. Galit man siya o hindi, nakakatakot talaga siya."

"Yan nga ang sinasabi ko sa'yo. Kaya nga nagtago agad ako. Nakakatakot kasi ang amo natin." Pagnaaalala niya kung paano 'to tumingin ay nakakaramdam siya ng kaba.

"Di'ba sinabi sayo ni tita Neil na wag ka magpakita sa amo natin. Dapat kasi nag-ingat ka. Mamaya kainin ka ni Sir ng buhay." Pananakot pa ni Nelson.

Napalunok siya.

"N-Nangangain si Sir ng buhay?" Ito ba ang dahilan kaya hindi dapat siya makita ng amo nila? Kaya ba nagbilin si Miss Neil na wag hayaan na makita o maabutan siya? Dahil isang uri si Sir Damon ng halimaw na kumakain ng tao?

Malakas na tumawa si Nelson. "Namumutla ka, Amelia. Binibiro lang naman kita." Tumigil 'to sa pagtawa at seryoso na tumingin sa kanya. "Hindi siya nangangain ng tao, Amelia. Pero halimaw si Sir Damon sa ibang paraan kaya mag-ingat ka nalang."

HINDI MAALIS sa isip ni Amelia ang sinabi ni Nelson sa kanya.

Halimaw sa ibang paraan? Sa anong paraan naman kaya? Ang akala niya no'ng una ay daig pa ng isang halimaw ang amo niya, pero sa nakikita niya ngayon ay hindi naman pala.

Balewala sa kanya ang pagalitan siya ng pagalitan nito. Ang mahala sa kanya ngayon ay magawa ng maayos ang dapat niyang gawin.

Kailangan na hindi na siya magkamali ngayon. Dahil sa kamay niya nakasasalay ang pangangailangan ng pamilya niya. Siya lang ang maaasahan ng mga 'to kaya hindi siya pwedeng bumigay nalang.

PUPUNGAS-PUNGAS pa siya habang naglalakad papunta ng kusina para uminom ng tubig. Alas dose palang ng gabi kaya antok na antok pa siya. Natigil siya sa paghakbang ng makarinig ng ingay mula sa kusina.

Medyo kabado pa siya na sinilip kung tama ba ang hinala niya.

Nanlaki ang mata niya at napaawang ang labi niya. Tama nga ang hinala niya na ang amo niya ang nasa kusina, ang nakapagpa-awang ng labi niya ay dahil hubad baro 'to!

Sanay na siya na makakita ng mga lalaki na walang suot na pang-itaas mapa-bata man o matanda, dahil sa kanilang lugar ay maraming palakad-lakad na mga lalaki ro'n na walang suot na damit dahil sa mainit na panahon at 'yong iba naman ay feeling matcho.

Pero iba ngayon....

Ngayon lang siya nakakita ng lalaki na maganda ang pangangatawan. May muscles ito sa tiyan na tinatawag ng mga kababata niya na ABS ba 'yon o TABS? Ah basta 'yon na 'yon. Matangkad talaga at matipuno ang katawan ng amo niya.

Masyadong malaki, parang bakulaw.

Napanganga na naman siya ng makita kung paano 'to uminom ng tubig. Umaalon ang lalamunan nito at bawat lagok ay napapalunok siya.

Hinawakan niya ang pisngi niya. Ano ba ang nangyayari sa kanya? Naiinggit yata siya sa paraan nito ng pag-inom.

Magaya nga 'yon bukas.

Wala ng laman ng ilapag ng amo niya ang baso na hawak sa mesa. Humawak din ang dalawang kamay nito sa gilid ng mesa at parang wala sa sarili na nakatingin sa kawalan. Napansin din niya na pawis ang mukha at katawan nito, maging ang paghinga nito ay mabigat.