KABANATA 5

"Sean!" Narinig pa niya ang malakas na tawag ni Miguel sa lalaking kararating lang. Nakatalikod ito sa kanya kaya hindi niya makita ang mukha.

Simple lang ang suot ng lalaki. Nakasuot ito ng white polo shirt at naka-maong na pantalon. Kahit nakatalikod ito at wala namang kakaiba sa damit nito ay malakas na agad ang dating ng lalaki. Narinig niyang binanggit ng mga lalaki kanina ang pangalan nito.

Siya na ba iyong ka-blind date niya? Blind date pa nga bang matatawag iyon?

Hindi man lang niya naalalang itanong kay Sheena ang pangalan ng lalaking ka-date niya sa gabing iyon.

Mas lalong naging maingay sa bandang iyon habang binabati ang lalaki na tinatawag ng mga ito na "Sean". Sa tingin niya ay magkakabarkada ang mga ito.

Curious na curious na siyang makita ang mukha ng lalaki at akmang haharap na sana ito sa gawi niya nang biglang naharangan iyon ng isang babaeng lumapit sa grupo. Mas lalong hindi na niya makita ang mukha nito nang sumunod pa ang dalawang babae sa paglapit sa kinatatayuan nito.

Inalis na lang niya ang mga mata roon saka bumaling sa babaeng katabi na inalok siya ng makakain na nasa mesa. Kumakalam na nga ang sikmura niya dahil hindi siya kumain kanina.

Doon na ba mangyayari iyong sinasabing date nila? O dadalhin siya ng lalaki sa isang restaurant na sila lang?

Hindi pa sana siya kakain muna dahil baka nga kakain sila sa restaurant. Baka ando'n lang sila saglit para magpakita sa party ng kakilala nito at saka sila aalis.

Napatingin uli siya sa mga pagkaing nasa mesa sa harap niya.

Halos ang lahat ng iyon ay parang mga pulutan lang. Tumunog uli ang tiyan niya kaya't kumuha na rin siya at kumain. Baka naman kasi hihimatayin siya sa gutom kapag hindi niya lalagyan ng pagkain ang tiyan. Hindi pa naman siya sanay na nalilipasan ng gutom.

Ngumiti at nagpasalamat siya sa babaeng nag-alok ng pagkain sa kanya. Doon na nga natuon ang atensiyon niya. Tumatanggi lang siya nang abutan siya ng babae ng isang bote ng beer.

"Hindi ako umiinom," tanggi niya.

Panay pa rin ang kain niya. Mas mabuti na iyon kesa naman hintayin pa niyang pakainin siya ng date niya. Ang hapdi na kaya ng sikmura niya.

Isusubo na niya sana uli ang isang hiwa ng manok sa bibig nang maisipang tingnan na ang grupo ng mga lalaking pinuntahan nila kanina ni Miguel. Baka kasi makita niya na rin sa wakas ang mukha ng "Sean" na iyon.

Natigil sa ere ang manok na isusubo na niya sana nang makasalubong ng tingin ang lalaki na nakaupo paharap sa kanya. Pangiti-ngiti lang ito habang masayang nagkukwentuhan ang mga barkada nito sa tabi pero sa kanya naman nakatingin.

Natulala siya sa mukha nito. Kung may hitsura si Miguel ay mas lamang ang kagwapuhan ng lalaking hindi maalis-alis ang titig sa mukha niya. Malalantik ang mga pilikmata nito na parang sa isang babae, matangos ang ilong at wavy ang buhok na papahaba na.

At ang mga labi...

Saka lang siya nahimasmasan nang ang mga labi nito ay biglang ngumuso sa kanya na para bang pinapaliparan siya ng halik sa hangin kasabay ng pagkindat nito. Uminit agad ang mga pisngi niya saka iniiwas ang mga mata sa lalaki.

Imbes na isubo ang manok na hawak ay patay-maling ibinaba niya iyon saka parang natatarantang naghanap ng maiinom. Sakto namang inabutan siya uli ng babae ng beer kaya't agad na tinanggap niya na iyon. Para kasi siyang mabibilaukan bigla.

Kahit mapait ang lasa ng iniinom ay nangangalahati na ang laman ng bote nang ibaba niya iyon sa mesa.

Actually, nakainom na siya dati pero hanggang tikim lang kasi ayaw niya talaga ang lasa ng beer. Pinagbigyan niya lang si Mhariel nang minsang sumama siyang lumabas kasama ang mga barkada nito.

Biglang nag-iba ang timpla ng mood niya nang maalala ang babae.

Hindi mawala-wala ang pait ng lasa ng beer sa lalamunan niya kaya't lumingon-lingon siya para maghanap ng tubig. Muli ay nagtama na naman ang mga mata nila ng lalaki.

Hindi ba nito inaalis ang tingin sa kanya mula pa kanina?

Hindi niya hinayaang tumagal uli ang tingin niya rito dahil naaasiwa na siya. Nakita niya nga ang maraming bote ng mineral water kaso nasa tabi ito ng inuupuan ng lalaki. Umayos siya ng upo saka humarap na lang sa ibang direksiyon.

Saka niya naalala ang pinadalang tubig ni Sheena. Agad na kinuha niya ang maliit na bote sa loob ng bag. Binuksan niya iyon saka nilagok ang buong laman ng isang tunggaan lang.

Iniiwasan na niyang mapatingin sa umpok ng mga lalaki. Nagmumukha na siyang tanga yata. May balak pa ba itong ituloy ang date nila? Ito nga ba talaga ang ka-date niya o baka nag-aassume lang siya?

Tatawagan na sana niya si Sheena para sabihin na aalis na lang siya nang biglang may tumayo sa harap niya. Wala sa loob na naibalik niya ang phone sa bag at dahan-dahang iniangat ang tingin. Hindi pa man niya nakikita ang mukha ng lalaking nakatayo sa harap niya ay alam na niya kung sino iyon dahil sa suot nito.

"Hi!" Nakangiting bati nito nang dumako na sa mukha nito ang mga mata niya.

Napalunok pa muna siya bago sumagot.

"H-hi," kiming sagot niya.

"Hi, Sean!" Malanding bati ng babaeng katabi niya. Masyado itong naging malikot nang makita ang lalaki sa harap nila.

"Hi, Trish!" Malandi rin ang tono ng pagsagot nito sa babae.

"You might want to sit beside me," alok ng babae.

Beside her? Napatingin siya sa inuupuan nila. Pangdalawang tao lang iyon. Pinapaalis ba siya ng babae nang pasimple para makatabi nito ang lalaki?

"Ahm, you can sit here." Tumayo na siya agad para ibigay sa lalaki ang espasyong katabi ng babae.

Lumaki naman ang awang ng ngiti ng babae na napatingin sa kanya na parang nagpapasalamat sa ginawa niya.

"Yeah, next time, Trish." Walang ano mang tanggi nito sa babae.

Natigil siya sa pag-alis nang bumaling uli ito sa kanya.

"Masyadong maingay dito. I can take you somewhere na malayo sa speakers para hindi natin kailangang magsigawan habang nag-uusap," nakangiting sabi nito sa kanya na kailangan pang ilapit sa tenga niya ang bibig nito dahil nga sa ingay na nagmumula sa speakers sa tabi nila.

Muntik na naman siyang mapatulala sa lalaki dahil mas lumalakas ang appeal nito kapag ngumingiti. Lagi na'y parang nanunudyo pa ang mga tingin nito. Saka dama niya ang init ng hininga nito sa balat niya habang nagsasalita ito. Muntik pa nga siyang mapakislot.

Nag-aalangan pa siya at gusto niya muna sanang maniguro na ito nga ang ka-date niya sa gabing iyon dahil baka naman kasi ibang lalaki.

"Why? Are you here with someone?" Inilapit pa nito uli ang bibig sa tenga niya para marinig niya dahil mas lumakas ang tugtog sa background.

Luminga-linga rin ito agad pagkatanong no'n sa kanya.

Tinanong siya nito kung may kasama siya. Ibig sabihin nga no'n ay hindi ito ang ka-date niya.

"Let's move somewhere because it's very noisy here." Iginiya na agad siya nito palayo roon bago pa siya makasagot.

Sumunod na lang din siya dahil masakit na nga sa tenga ang malakas na speakers na nakapwesto malapit sa kinaroroonan niya kanina.

Lumipat sila sa may dulo ng floor na iyon kung saan may isang mini bar na pinasadya yata para lang sa party na iyon. Walang ibang tao roon so pakiramdam niya ay exclusive lang ang lugar na iyon sa kung sino man ang host ng party.

May isang bartender doon na nilapagan agad sila ng maiinom. Hinintay niyang makaupo muna sila bago nagsalita.

"I'm not sure if tama ang napuntahan ko but I was supposed to be meeting someone for a blind date."

"Blind date?" Kita niya ang pagkasorpresa sa mukha nito. Maya-maya ay napangiti ito hanggang sa marahang napatawa.

Napakunot-noo naman siya kung bakit natatawa ito sa sinabi niya.

"Uso pa ba iyan ngayon?" Nakangiting tanong nito na kinuha ang isang wine glass na may laman saka inalok sa kanya.

Tinanggap niya ang inabot nito kahit wala siyang planong inumin iyon. Kumuha na rin ang lalaki ng maiinom nito saka tinungga iyon nang diretso.

"I'm not sure if one of my friends is here for a blind date," dugtong pa nito nang maibaba ang baso at nang hindi siya sumagot.

So nagkamali nga yata talaga siya ng punta!