REVISED - CHAPTER 4

Hindi ko na muling naka-usap pa si Shantall matapos ang nangyari kaninang lunch. Kahit na magkaklase kami ay hindi naman sya tumabi sa akin na syang nakagawian na namin sa tuwing nasa iisang klase lang kami, katabi nya sa buong klase ang dalawa sa grupo nina Lyka na kaklase din namin.

Buong klase, hati ang atensyon ko sa kanya at sa discussion. Imbes kasi na makinig ay dinadaldal sya nung dalawang babae na mula kina Lyka, hindi ko naman sila magawang suwayin dahil malayo ang upuan nila mula sa kinauupuan ko, isa pa ay siguradong mapapagalitan ako ng teacher namin kung tatayo ako at pupuntahan ko sya gayong nasa kalagitnaan kami ng discussion.

Nang uwian na ay hindi ko rin sya naabutan dahil nauna silang lumabas habang ako ay kinausap pa ng teacher namin para sa class project na ibinigay. Bilang class president ay obligasyon kong pangunahan ang lahat at unahin ang responsibilidad ko sa klase kaysa kay Shantall kaya naman wala akong magawa kung hindi ang maupo sa harapan ng teacher's table habang ibinigay nya ang iba pang instructions para sa project na gagawin namin.

"Kyline, nakikinig ka ba?"

"P-po?"

Napakurap ako nang pitikin nya ang daliri nya sa harapan ko. Bumuntong hininga sya at tumngin sa akin ng may pag-aalala.

"Okay ka lang ba? Kanina pa kita napapansin sa klase na hindi makapag-focus ng maayos. May problema ba?"

I forced a smile and nodded, "Okay lang po, ma'am, may bigla lang pumasok sa isip ko. Sorry. Tuloy na po kayo."

She doesn't seem convinced, pero nagpatuloy din naman sya.

The project was about for the upcoming intrams. Napagpasyahan ng school admins na lahat ng klase sa bawat strand ay pagsasama-samahin para gumawa ng kaniya-kaniyang booth. Three booths for each strand, at kumpleto sa senior high school strand ang school namin.

Anim na strand ang mayroon ang senior high school; GAS, HUMSS, STEM, ABM, TVL, at ang Sports strand. Ang para sa sports ay hindi na sasali sa mga booth dahil karamihan sa kanila ay representative sa Sports Fest, habang ang TVL isang booth lang ang kakailanganin dahil kakaunti lang din naman sila.

GAS, HUMSS, STEM, at ABM ngayon ang magkakaroon ng tigta-tatlong booth at kailangan kong makipag-coordinate sa iba't-ibang class presidents ng HUMSS classes para mapag-usapan ang mga booth na gagawin. Teachers na mismo ang nag-arrange para sa first meeting namin na mamaya ng hapon para makapaghanda kami agad.

Ibig sabihin lamang din non ay mas lalo ko ng hindi ko makaka-usap si Shantall tungkol sa nangyari kanina sa lunch. Ang ayaw ko pa naman sa lahat ay pinapatagal ang tampuhan namin o kaya ang hindi pagkakaintindihan, pero wala akong magawa dahil nagde-demand na ngayon ng oras ang responsibilidad ko bilang presidente ng klase.

Palihim akong bumuntong hininga at tumango sa teacher ko, "Sige po, ma'am. Noted. Didiretso po ako sa City Library pagkatapos na pagkatapos ng huling klase."

Ngumiti ang teacher ko at tumango.

"Good. Aasahan kita na i-lead ang lahat, Kyline. Alam kong isa ka sa mga running for valedictorian sa batch ninyo kaya alam kong kaya mo, huwag mo akong bibiguin."

And in an instance, naramdaman ko agad ang burden ng isang estudyante at teenager na binagsakan ng samut-saring responsibilidad. Ito ang mahirap kapag matalino ka at honor student, akala ng lahat ay madali lang pero hindi nila alam na nahihirapan ka rin sa time management at responsibility management. Mabuti na nga lang at wala akong maraming responsibilidad sa bahay na kailangan ding alalahanin kaya kahit papaano ay masuwerte pa rin ako. Nag-iisang anak lang din naman ako.

"Yes, ma'am. I'll do my best para hindi kayo biguin." sabi ko at nagpaalam na.

Lumabas ako ng classroom at wala ng estudyante sa hallway dahil nagsisimula na ang sunod na klase. Excuse lang ang lahat ng class president ngayon dahil nga kinausap kami ng mga adviser namin para ipaalam ang tungkol sa intrams na apat na linggo pa naman ang layo.

Bumuntong hininga ako. Siguradong kakainin na nito ang oras ko, isama mo pa ang ibang activities at requirements sa iba't-ibang subject dahil pagkatapos ng intrams ay first semester exam naman.

"Hays, buhay nga naman ng estudyante." bulong ko.

Napagpasiyahan kong dumiretso na lang sa library since isang oras pa naman bago ang sunod na klase ko. Tig-iisa't-kalahating oras ang mayroon kami bawat klase at ginugol ko na ang kalahating oras sa pakikinig sa instructions ni Ma'am Diaz kanina.

Sa library, kahit na hindi na ako mag-iwan ng ID at mag log sa logbook ay ayos lang dahil kilala naman na ako ng librarian namin, pero dahil yun ang protocol ay ginagawa ko pa rin. Dahil araw-araw akong nandito ay parang nireserve na ni Mrs. Pagdilao ang table kung saan ako palaging pumupuwesto. Paano ba naman kasi ay sa tuwing nagpupunta ako dito, walang naka-upo sa puwestong yon.

Inilapag ko ang bag ko at naupo, as usual ay dapat maingat at tahimik mong hihilain ang upuan dahil ang tunog nito ay maaring maka-istorbo sa iba. Nang maka-upo na at komportable na sa posisyon ko ay kinuha ko sa bag ang cellphone ko at binuksan ang data nito para sana makapag-search ng mga ideya ng booth na tugma sa strand namin nang mag-pop ang isang notification.

Kumunot ang noo ko nang makita ang pangalan ni Shantall at ang icon ng F******k. Nagtatakang pinindot ko yon at agad naman akong dinala nito sa isang status update na kaka-post isang minuto pa lang ang nakakaraan.

Si Shantall ang nagpost at kasama nya sina Lyka, iilang picture ito na kuha sa may isa pang gate ng school na matagal ng hindi ginagamit. Sa pagkaka-alam ko ay ito ang gate na ginagamit bilang entrance at exit noong bagong gawa pa lamang ang school. Kumunot ang noo ko nang mabasa ang caption,

"It's not that bad to try something new."

Nanlisik ang mga mata ko at kaagad na umakyat ang dugo sa ulo ko nang mabasa ang mga comment mula sa mga kapwa bulakbol na estudyante nina Lyka. Hindi sya pumasok sa sunod na klase!

Dali-dali kong binuksan ang messenger application ko at nagpadala ng message sa kanya, pero dahil hindi na sya online ay hindi nya agad mababasa yon. Sunod ko namang pinuntahan ang contacts at hinagilap ang pangalan nya saka mabilis na i-dinial yon.

Marahas akong bumuga ng hangin nang patayan nya ako ng call. Sunod-sunod na akong nagpadala ng message sa kanya at wala syang sinasagot ni isa. Nagsimula akong mainis ng todo hanggang sa napagpasyahan kong puntahan si tita sa room nya since dito rin naman sya nagtuturo.

Nagsisimula ng maimpluwensyahan si Shantall ng mga taong walang magawang matino sa buhay nila at dapat itong putulin agad. I wouldn't let anyone ruin her.

Over my dead body.

Sa mga sumunod na klase ay hati pa rin ang atensyon ko sa discussion at kay Shantall. Nagtagumpay naman akong masabi kay tita Shantell ang ginagawa nya dahil na rin sa teacher sya, tinanong nya ang teacher namin sa General Math at sinabi nitong hindi nga pumasok si Shantall. Bakas ang galit sa mukha ni tita kanina.

Nang matapos ang huling klase ay agad akong dumiretso sa city library, as my adviser instructed me to do. May iilan ng nauna sa akin nang makarating ako doon at masigasig nila akong binati na sinuklian ko lang na matipid na ngiti. Hanggang ngayon ay lumilipad pa rin kasi ang utak ko sa kung nasaan si Shantall.

But when our meeting started, kinailangan ko ng iwaksi ang lahat ng alalahanin sa utak ko at nag-focus sa agenda namin. Nakapag-text na rin naman ako kay mama ng mas maaga pa kaya hindi na sya mag-aalala.

Ang teacher chairman ng HUMSS strand ang syang nag-assist sa amin sa meeting. May pa-sandwich pa nga kaya hindi kami gutom dahil pwede kaming kumuha pa kung naubos na namin ang isa.

We have agreed na magkakaroon ng ten participants sa booth preparations, ang sampung estudyante na yon ay magmumula sa iba't-ibang section, 2 students per section. Iba rin ang mag-aasikaso sa mismong araw ng intrams, walong katao per booth naman ang napagkasunduan namin para sa booth operator. Sa props at decoration ay maniningil kami para doon sa mga HUMSS student na natira at hindi napili para makilahok para sa preparation at operation.

Mayroon na agad nakaatas na booth sa amin; confession, photography, at art booth. Ako ang naatasan para sa pangunahan ang confession booth at kami na ang bahala sa gimic na gagawin namin.

I raised my hand when an idea popped in my mind. Agad na tumango sa direksyon ko ang teacher. I stood and voiced out my idea.

"Ma'am, ang sabi nyo po ay anim na tao lang ang mag-ooperate ng booth. Pero ang idea ko po sa confession booth ay pwedeng may mag-confess anonymously, as usual. But to add a twist, pwede po naming gawan ng tula ang mga magco-confess. Kaya kakailanganin po namin ang mga student na magaling sa paggawa ng tula at baka sumobra pa po kami sa walo."

Napatango-tango ang ibang class president na kasama ko. At dahil sa city library ito ay may ibang tao rin kaming kasama, pati ang mga taong yon ay napatango at tumingin sa akin ng may paghanga sa mga mata nila.

Thankfully, Mrs. Ocampo considered my suggestion and told us na maari kaming magdagdag pa sa walong booth operator, basta hindi kami tataas sa fifteen katao. She gave us a date kung kailan kami pwedeng magsimula sa pagpa-plano bago at nagdagdag ng iba pang dapat naming i-consider sa paghahanda bago idineclare na tapos na ang meeting namin.

Isa-isang nagsitayuan ang mga kasamahan ko. Inayos ko muna ang mga gamit ko sa bag at siniguradong wala akong nakalimutan saka isnukbit ito sa balikat ko, sakto namang may lumapit sa akin si Joshua. Sya ang partner ko para sa confession booth.

"Hi," malumanay na bati nito.

I offered him a small smile and greeted back with a, "Hello,"

Nagsimula akong maglakad palabas ng library na sinabayan nya at nagsimula nang isang may kabuluhang pag-uusap. Section A sya habang ako naman ay nasa Section B, meaning mas mataas ang average nya sa akin noong junior high, considered din na mas matalino sya sa estadong yon.

"Ang ganda nung suggestion mo para sa booth natin. Pangungunahan ko ang paggawa ng tula na yan," sabi nya habang tumatawa.

"Marunong kang sumulat ng tula?" I asked in astonishment.

Hindi kasi halata sa kanya. Ni pagiging matalino nga ay wala sa hitsura nya, yung pormahan nya kasi ay parang isang bulakbol na estudyante at feeling bad boy.

Tumawa ito ng marahan, "Oo naman. Hindi lang halata pero mahilig ako sa mga tula."

"Oh." I nodded. "Pareho pala tayo kung ganon."

"Mahilig ka rin sa mga tula?"

Muli ay tumango ako at nagpatuloy kami sa pag-uusap. Hanggang sa sakayan ay magkasabay kami at hindi ko inaasahan na nasa iisang barangay lang pala kami, hindi ko naman kasi sya madalas makita kahit pa mahilig akong lumabas lalo na tuwing gumagala kami ni Shantall. Iyon pala ay bagong lipat pa lang sila at ilang phase din ang layo ng bahay nya sa amin. Sa may bandang dulo pala sila.

Dahil nasa iisang barangay lang naman pala kami ay napagpasiyahan namin na sabay ng umuwi araw-araw para mas madagdagan namin ang oras na mapag-usapan ang tungkol sa booth. Napagkasunduan din namin na mag set ng meeting tuwing Sabado sa may milktea shop na nasa loob lang din ng barangay. Wala namang problema sa akin yon, madali lang din naman kausapin si Shantall. Alam kong maiintindihan nya na may makakasabay kami sa pag-uwi dahil sa intrams. Isa pa ay balak ko syang atasan bilang isa sa operators ng booths.

Nang makababa kami sa jeep ay inalalayan nya pa ako sa pagtawid dahil high way ang katapat ng entrance ng barangay namin. Tinawanan ko na lang sya dahil para naman akong hindi sanay tumawid dito gayong dito ako ipinanganak at lumaki.

Mauuna naming marating ang bahay namin bago ang sa kanila dahil nga nasa bandang dulo pa ang bahay nila. Dapat pala ay sasakay sya ng tricycle pero dahil kasabay nya ako ay naglakad na lang din sya.

We were just a few blocks away from our house at dahil naengganyo ako sa pakikipag-usap sa kanya ay hindi ko namalayan na nakalampas na pala kami sa bahay nina Shantall, hindi ko rin alam na inaabangan pala nya akong dumaan. Kung hindi lang nya ako tinawag ay hindi ko malalaman.

I faced her with a smile pero nabura ang ngiting iyon nang makita ang madilim nyang mukha. Akamang magtatanong ako kung anong nangyari nang may ibato syang bagay sa akin. Maliit lang yon pero masakit dahil sa beads nito. Kumunot ang noo ko nang makitang ang friendship bracelet namin ito na ginawa pa namin noong mga bata pa kami.

"Ano 'to?" nagtatakang tanong ko.

She scoffed. "Matalino ka nga, tanga ka naman. Hindi mo ba nakikita? Yung friendship bracelet natin."

Binigyan nyang diin ang salitang 'friendship' at 'natin' na mas lalo kong ipinagtaka. Ano ba ang problema ng isang 'to at parang binagsakan sya ng langit at lupa sa aura nya.

"Alam kong friendship bracelet natin ito, pero bakit parang binabalik mo ata sakin?"

"Tanggalin mo yung 'ata' dahil talagang ibinabalik ko na sayo yan." matigas nyang sabi.

"Bakit? Shantall, ano bang problema mo?" naiinis na tanong ko.

Sa pagkakaalam ko ay malayo pa naman ang buwanang dalaw nya para topakin ng ganito. At talagang hinagilap nya pa ang friendship bracelet namin gayong itinago na namin ito as a remembrance nang mag-high school kami at dahil ayaw naming masira ito. Ngayon, ano naman ang ipinuputok ng butsi nya?

"Problema ko?" nanlilisik ang mga matang tiningnan nya ako at may halong pagkamuhi na hindi ko alam kung saan nanggagaling. "Eh, ikaw eh. Masyado kang pabida, akala mo kung sino ka. Alam mo, tama nga sina Lyka. Habang tumatagal, ginagamit mo ang pagkakaibigan natin para kontrolin ako at pasunurin sa mga gusto mo. Ayaw mo akong makipag-kaibigan sa iba dahil selfish ka at gusto mo, ikaw lang ang kaibigan ko."

"Well, Kyline, hindi habang buhay ay ikaw lang ang magiging kaibigan ko dahil lumalaki ang mundong ginagalawa ko. At higit sa lahat, hindi ako katulad mo na loser at pakunwaring maintindihing tao, yun pala ay control freak. Mas gugustuhin ko na siguro na umiwas sayo kaysa pilitin mo akong kontrolin at blackmailin gamit ang pagkakaibigan natin kapag hindi ko sinunod ang gusto mo."

At pagkatapos nyang sabihin ang mga linyang yon ay tinalikuran na nya ako at naglakad palayo. Samantalang ako ay naiwang nagtataka dahil hindi ko maintindihan kung ano ang pumasok sa isip nya sumang-ayon kina Lyka na sinusubukan ko syang kontrolin.