CHAPTER 6

"Prepare your team, Agent Akihara. We're about to enter the club!"

NANG marinig iyon ni Ren ay palihim niyang sinulyapan ang iba pang kasamahan at patagong tumango sa mga ito, na ang ibig sabihin ay maghanda. Nasa loob sila ng club mga kasamahan ng gabing iyon at nagpapanggap bilang customers.

Pasimple niyang kinapa ang Calibre 45 na nakatago sa leather jacket niyang suot habang malikot ang mga mata na sinusuyod ang paligid. May ilang bantay rin ang club na nagkalat sa loob na pawang armado, kaya naman inihanda niya ang sarili sa mga posibleng mangyari.

Ilang saglit pa, ay nabulabog ang mga tao sa loob ng club nang pumasok ang NBI, kasama ang ilang pulis at nag-anunsyo ng raid. Si Ren at ang mga kasamahan naman niya ay maagap rin na nagsipagtayuan at tinututukan ang mga naroon.

"Raid 'to! Walang kikilos ng masama sa inyo at sumama kayo ng matiwasay!" malakas na sigaw ng NBI agent na kasama nila sa operasyong iyon. "Itaas niyo ang inyong mga kamay at ilagay sa likod ng ulo!" mariin pa nitong sigaw.

Sa labis na pagkabigla ay hindi nakahuma ang mga customers at empleyado ng Midnight Eden. Nahihintakutang tumalima ang mga ito at kaagad na itinaas ang kanilang mga kamay. Ngunit ang mga bantay ay agad nagpaputok dahilan upang magkagulo sa loob ng club. Nagkaroon ng palitan ng putok sa pagitan ng mga alagad ng batas at mga bantay.

Mabilis namang nailabas roon ang mga hinuling customer na sa kabutihang palad ay hindi na nanlaban. Marahil ay sa takot na masangkot ang iniingatang pangalan sa ganoong uri ng kaguluhan. Halos mayayamang negosyante ang parokyano ng club. Ang ilan pa nga ay pawang mga dayuhan lang. Maging ang mga kababaihan na ibinubugaw ay maingat din na nai-rescue at ligtas na nailabas roon.

Shit! Si Mr. Wong! mariing mura ni Ren habang nakikipagpalitan ng putok sa mga kalaban. Marahil ay naalarma na ito at naghahanap na ng paraan kung paano makatatakas. Maging ang nagsisilbing floor manager ay hindi rin niya makita roon.

Binalingan ni Ren ang isa niyang kasamahan. "Agent Reyes, hahanapin ko si Mr. Wong. Backup-an mo 'ko!" utos niya rito saka siya lumabas sa pinagkukublihang pader at tinalunton ang daan patungo sa ikatlong palapag. Habang ang tauhan naman niya ay nakasunod sa likuran niya.

Malikot ang mga mata ni Ren habang nakatutok ang baril sa pasilyo. Bawat sulok na madaanan ay hinahalughog niya. Ilang sandali pa nga ay namataan niya si Mr. Wong kasama ang floor manager at ilang mga tauhan na tumatakas at dumaan sa fire exit. Mabilis siyang humabol sa mga ito at naabutan niyang pababa na ang mga ito sa bakal na hagdan.

"Hindi ka makakatakas, Mr. Wong! Magbabayad ka sa batas!" malakas na sigaw niya sa mga ito dahilan upang lingunin siya ng mga tauhan nito at puntiryahin. Ngunit mabuti na lamang at mabilis siyang nakailag. Nakipagpalitan siya ng putok sa mga apat na bodyguard nito at dahil sa bihasa siya sa ganoong larangan, madali niyang napatumba ang mga ito.

Bakas ang takot sa mukha ni Mr. Wong nang maabutan niya ito. Maging ang babaeng manager na kasama nito ay bakas rin ang matinding takot. Tinutukan niya ng baril si Mr. Wong habang pababa siya ng hagdan. Samantalang ang tauhan naman niya ay nakaalalay sa kanyang likuran.

"Mr. Wong, sumuko ka na at pagbayaran ang mga kasalanan mo!" mariing utos ni Ren sa matandang Intsik na noon ay tila naestatwa dahil sa takot.

"Napakaraming buhay ng kababaihan ang sinira mo! Ikaw at ng mga kasamahan mo sa negosyo. Hindi na kayo naawa! Ang gusto lang naman ng mga babaeng 'yon ay makapagtrabaho pero ginamit mo sila sa mga kademonyohan mo! Dapat kang mabulok sa kulungan!" galit na sigaw niya habang nakatutok ang baril dito.

"H-have mercy on me! 'Wag mo ako huli! I'll pay you, just don't arrest me! I don't want to go to in jail!" pagmamakaawa pa nito sa kaniya. Sa narinig ay lalong nagpuyos ang kalooban niya sa galit.

"Patatawarin lang kita, Mr. Wong kung maibabalik mo sa dati ang mga buhay na sinira mo! Kaya mo ba, ha?!"

Subalit hindi na sumagot ang matandang Intsik at sa halip, mabilis itong bumunot ng baril at kaagad siyang pinaputukan. Pero maswerte niyang nailagan iyon, at mabilis siyang gumanti ng putok. Inasinta niya ito sa binti dahilan upang mapaluhod ito at mabitawan ang hawak na baril. Hindi na ito nakapanlaban pa. Maging ang babaeng kasama nito ay tila natulala dahil sa matinding takot. Kaagad niyang inaresto ang mga ito at isinakay sa mobile car ng pulis kasama ng mga nahuli.

"Good job to you and to your team, Agent Akihara! Dahil sa iyo, isa na namang illegal club ang naipasara natin. Bukod pa roon, ay nasagip natin ang mga kababaihang ibinubugaw ng hayop na Intsik na iyon!" saad ng Hepe ng kapulisan na katuwang nila sa raid na iyon. "Please, also tell to Mr. Vargas that Orion Strategic Services is very reliable because of having a great team." Nakipagdaop-palad pa hepe kay Ren pagkasabi niyon.

He gladly accepted the chief's handshake. "Thank you, Chief. We're just doing our job," tugon naman niya sa hepe.

"Anyway, mauna na ako sa iyo hijo, at kailangan nang masampahan ng kaso ang mga ito at nang maikulong na," wika nito na ang tinutukoy ay ang mga dinakip.

"Okay, Chief. Take care!" sagot n'ya rito saka sumaludo.