Chapter 1

“Good heavens! What are you doing here?” gulat na tanong ng baklang make-up artist ni Kara sa kanya nang pumasok siya sa dressing room.

Napakunot ang noo ng dalaga at lalo pang humaba ang nguso nito sa naging bati sa kanya. Nag-alala siya na baka hindi na itinuloy ang photoshoot kahit ngayon lang naman siya na-late sa trabaho.

“Why? Did they cancel the photoshoot?”

Mabilis na humakbang papalapit sa pinto si Miles at isinara iyon bago pinaupo ang dalaga na hindi pa rin nawawala ang kunot sa noo. Iniabot ni Miles ang kanyang cellphone kay Kara at nanlaki ang mga mata ng huli nang mabasa sa entertainment news na may video scandal siya.

“W-what s-scandal?” kinakabahang tanong ni Kara kay Miles.

“Oh dear, I think you have been secretly filmed,” malungkot na sagot ni Miles at saka nito iniabot kay Kara ang cellphone para ipapanood ang video.

Makikita sa video na natutulog si Kara sa kama na tanging bra lamang ang suot habang ang kalahati ng kanyang katawan ay balot ng kumot. Nang biglang may kamay ng lalaki ang yumakap sa  kanya na mahimbing pa ring natutulog. Maya-maya pa ay naupo ang lalaki ngunit patalikod sa camera at tumayo. Kitang-kita na walang suot na anumang saplot sa katawan ang lalaki.

Tila nanigas ang katawan ni Kara sa napanood.

Thug!

Dinampot ni Miles ang kanyang cellphone na nabitawan ng nanginginig na mga kamay ni Kara. Nakaramdam ng awa at pag-aalala si Miles sa dalaga. Sa lahat ng nakatrabaho niyang modelo, si Kara ang pinakamabait at kanyang paborito. Matino rin itong babae at mula sa may kayang pamilya kaya naman hindi na siya nagtaka nang ligawan at paibigin ito ng nag-iisang anak na lalaki ng Deschanel House of Couture, isa sa sikat na clothing line sa Paris.

“Miles, whatever the video suggested is not true! That’s not me!” naiiyak na sabi ni Kara.

Naunat ang kunot ng noo ni Miles. “Then you should talk to Victor now and explain your side.”

Tumango si Kara bilang pagsang-ayon sa sinabi ni Miles, habang mabilis naman siyang inalalayan ng huli para sumakay sa elevator upang umakyat sa opisina ni Victor Deschanel. Si Miles na rin ang kumausap sa sekretarya na mabilis namang tumalima at pinagbuksan ng pinto ang dalawang bagong dating.

Pagbukas ng pinto ay nagsimulang umalingawngaw ang boses ng ina ni Victor sa labas ng opisina dahilan upang mas manigas ang katawan ni Kara sa takot sa ina ng lalaki na kahit kailan ay hindi siya nagustuhan. Napahawak si Kara sa kanyang dibdib nang makita ang mukha ng kanyang boyfriend. Kung dati sa tuwing pupuntahan niya si Victor sa kanyang opisina ay masaya itong sumasalubong sa kanya, ngayon ay halos mangitim na sa galit ang asul na mga mata ng lalaki na para bang mangangain ng tao anumang oras.

“You have the nerve to show up your face here?” palusob na sabi ng ina ni Victor kay Kara at saka sunud-sunod na nagsalita ng French. Hindi na napigilan ni Kara ang kanyang mga luha sa mga masasakit na salitang sinabi ng ina ni Victor.

“V-victor, it’s not true. Please believe me,” pagmamakaawa ni Kara.

Magsasalita sana ang lalaki ngunit inunahan siya ng kanyang ina. “Leave this woman! She ruined Deschanel!”

“Mama!” pagsaway ni Victor sa kanyang ina.

“Break up with her or you will get nothing from us!” galit na sabi ng mama ni Victor dahilan upang manlaki ang mga mata ng lalaki.

Mabilis na humakbang si Kara papalapit kay Victor at saka niya niyakap nang mahigpit ang kanyang nobyo na nanatiling nakaupo sa kanyang swivel chair.

“Baby, please believe me the video is not true, that’s not me!” paliwanag ni Kara sa pagitan ng kanyang mga hikbi.

Tinanggal ni Victor ang mga braso ni Kara na nakayakap sa kanya. “Then explain to me how it happened?”

Umiling ang dalaga. Sa tono ng salita ni Victor ay alam ni Kara na hindi naniniwala sa kanya ang lalaki. “I don’t know! Maybe they used my face, that’s not me, baby!”

Inabot ni Victor kay Kara ang isang papel na nagsasabi na boluntaryo siyang nagre-resign bilang endorser ng Deschanel. “Sign this. It’s all I could do for you.”

Hindi makapaniwalang tumingin si Kara sa kanyang nobyo. “What do you mean?”

“I will clean this mess for you, but I am breaking up with you.” Ang kanina’y puno ng galit na mga mata ni Victor ay napalitan ng lungkot. “Please sign it, Kara! Don’t ruin my future too.”

Pakiramdam ni Kara ay binuhusan siya ng malamig na tubig sa narinig niyang mga salita  mula kay Victor. Nanginginig niyang dinampot ang sign pen sa mesa ng lalaki at saka pinirmahan ang resignation letter.

Pinawalan pa ni Kara ang isang malalim na buntong-hininga at hindi makapaniwalang tinitigan sa mata ang lalaking akala niya ay mahal siya.

“Leave this place, whore!” sigaw ng ina ni Victor.

Nang makita ni Kara na hindi talaga siya ipagtatanggol ni Victor sa ina, tumayo siya ng tuwid at saka humakbang ng malalaki upang mabilis na umalis sa lugar na iyon.