Chapter 42: THE THREAT

Si Matthew pa rin ang gumawa ng paraan na maprotektahan si Prim. Nagkaroon ng security si Prim sa tuwing papasok ito sa trabaho.

“Hindi ko kailangan ng bodyguard,” pagmamatigas na sabi nito.

“Kakailanganin mo ang magtatanggol sa iyo kung ayaw mong ipagtanggol ang sarili mo. Sa telenovela lang may mga babaeng api-apihan at hindi pang MMK ang kuwento mo,” sabi nito at sinimangutan siya ni Prim. Ibinato ang bag nito sa kanya.

“Siraulo! Nagagawa mo pa kong asarin na parang okay lang ang nangyari. Anong akala mo? Shooting ng live drama, buwisit ka!” Natatawa-tawa si Matthew na ibinigay ang bag nito.

“Tingnan ko nga.” Sinipat ni Matthew ang mukha ni Prim sa kaliwa’t kanan. Magaling na ang maliliit na galos nito. ”Ay, maganda pa rin talaga ang loves ko! Walang kupas kahit napaghampas ka ng bulaklak, maganda ka pa rin sa lahat ng bulaklak,” dagdag na sabi pa nito sa babae habang nasa kotse sila.