4. Scared

Chapter Four

Joanne La Senza

Nanatili ako sa pagkakasandal sa pader hanggang sa matapos ang pakikipag-usap ng asawa ko sa cellphone nito. Pakiramdam ko ay unti-unting nadudurog ang aking puso sa sakit dahil sa aking narinig. Hindi ko akalain na ang pinagkatiwalaan kong lalaki ay may iba palang kinakalantari. Halos hindi ako makahinga sa paninikip ng aking dibdib dahil sa pigil na sakit at paghihinagpis. Ang luha ko ay muling tumulo, umaagos na para bang tubig sa talón na hindi napipigilan ang pag-agos. Kung mayroon lang pause button ang aking puso ay kanina ko pa pinindot para hindi ako nahihirapan.

Impit akong napaiyak upang hindi ako marinig ng aking asawa na nasa loob pa rin ng kuwarto. Mahirap na at baka lalo siyang magalit sa akin kung sakaling makita niya akong umiiyak. Nais kong umiyak. Nais kong sumigaw upang ilabas ang sama ng loob na kinikimkim ko sa dibdib ngunit hindi ko magawa. Natatakot akong makita ako ng asawa ko bilang isang mahinang babae at baka sabihin na naman niya sa akin na wala akong silbi kundi umiyak. Na baka nag-iinarte lang ako para kaawaan niya ako.

Nang masiguro ko na tahimik na ang silid ay tinuyo ko ang aking luha at humugot nang isang malalim na buntong-hininga upang pakalmahin ang aking sarili. Siniguro ko munang maayos ang aking awra bago dahan-dahan kong pinihit ang seradura ng pinto at marahan iyong itinulak. Dahil gawa iyon sa magandang klase ng kahoy ay walang tunog na lumikha nang isinara ko iyon.

Muli akong bumuga ng hangin ng humarap ako sa kama. Tulog na ang aking asawa. Ni hindi man lang ito nakapagbihis at suot pa rin nito ang damit na gamit nito noong pumasok ito sa opisina. Magulo ang ayos ng buhok at ang suot na kurbata ay niluwangan lamang para makahinga ito nang maayos. Malalim na rin ang paghinga niya kaya nasisiguro kong tulog na nga siya.

Hindi ko na namang mapigilang lumuha habang pinagmamasdan ang guwapo nitong mukha, nang maalala ko ang naging usapan nito kani-kanina lang sa cellphone nito.

Mahal, saan ako nagkulang at bakit kailangan mo akong lokohin ng ganito? Bakit ka naghanap ng iba? Hindi ba ako sapat sa'yo? May mali ba sa akin? Tahimik kong usal. Ayaw ko siyang magising at baka bigla na naman niya akong bulyawan. Kahit ganito pa ang pagtrato mo sa akin ay hindi ako susuko sa relasyon natin, mahal. Ipaglalaban kita dahil asawa kita at hindi ko hahayaan na mapasakamay ka ng iba.

Upang maging komportable sa pagtulog ang asawa ko ay tinulungan ko siyang tanggalin ang suot niyang medyas na hindi pa rin natatanggal. Marahan ang pagkilos ko upang hindi siya magising ngunit napapiksi ako nang bigla siyang napakislot. Tumigil ako sa aking ginagawa at tiningnan ito. Nakahinga ako nang maluwang dahil nanatili pa rin itong nakapikit at tulog pa rin. Nagpatuloy ako sa aking ginagawa at tuluyang tinanggal ang suot niyang medyas. Matapos niyon ay marahan kong tinanggal ang suot niyang kurbata at niluwangan ang butones ng suot nitong polo. Bahagyang nanginginig ang aking kamay dahil sa takot na magising ko siya.

Napasinghap ako nang makita ko ang medyo mabalahibong dibdib ng aking asawa. He is still muscular and gorgeous as ever. Ang sarap niya pa ring haplusin! Hindi ko mapigilang komento at kumilos ang aking kamay upang sana ay haplusin ang dibdib ng aking asawa ngunit kaagad kong napigilan ang aking sarili. Nag-init ang pisngi ko kaya agad akong tumayo mula sa pagkakaupo ko sa kama.

Napagpasyahan kong punasan siya upang maging presko ang pakiramdam nito at maging komportable ito sa pagtulog dahil masakit para sa akin na makita siya sa ganoong ayos.

Iniwanan ko siya saglit upang kumuha ng pajama's na pamalit at inilagay iyon sa mesa na katabi ng kama saka ako pumunta sa banyo at kumuha ng maliit na bimpong pampunas saka maliit na palanggana upang paglagyan ng maligamgam na tubig. Maligamgam ang tubig na inilagay ko sa palanggana dahil may heater naman ang banyo. Pagkatapos niyon ay bumalik ako sa kuwarto upang punasan si Earl.

Ganoon pa rin ang posisyon na nadatnan ko mula nang iwan ko siya sandali. Marahil ay lasing na lasing ito at hindi ko alam kung gaano karami ang nainom niya. Ganoon pa man ay nagpatuloy ako sa aking balak

Bukas kapag hindi na siya lasing ay mabait na ulit siya sa akin. Hindi na niya ulit ako sasaktan ng pisikal at pagsabihan ng kung ano-ano. Ganito lang siya palagi sa akin kapag siya'y lasing. Kaya ngayong gabi kailangan ko siyang tulungan upang makatulog siya ng maayos. Kaya naniniwala ako na babalik pa rin siya sa akin at hindi niya ako iiwan.

Matapos kong ilapag ang maliit na palanggana sa mesita na katabi ng kama ay marahan kong nilapitan si Earl at sandaling pinagmasdan. Napakaguwapo talaga ng asawa ko at hindi ako nagsasawang pagmasdan ang maamo niyang mukha. The urge to caress his face churned inside me, but my hand stopped midway before it landed on his handsome face. Dahan-dahan kong hinaplos ang kanyang pisngi habang walang sawa itong pinagmasdan. Nang magsawa ay saka ko inumpisahan ang pagtanggal sa butones ng suot niyang polo na may mahabang manggas. Puno ng pag-iingat ang kilos ko upang hindi siya magising. Bahagya pang nanginginig ang kamay ko sa takot pero hindi ako tumigil.

Bawat butones na binubuksan ko ay nae-expose ang malapad na dibdib niya, lalong nanginig ang kamay ko. Ngunit sa pagkakataong ito ay hindi na takot ang nararamdaman ko kundi pananabik. Pananabik na hawakan siya at haplusin ang malapad at matigas na dibdib niya na siyang aking panangga sa lamig kapag ako'y kanyang niyayakap.