Kabanata 3

SIERRA

"BAKIT ko po ibibigay, Mayor?" Pagtatanong ko pa kaya sumandal naman siya sa pader ng makalabas kaming dalawa sa elevator. 

"For the updates, doon na lang kita ime-message kapag may nabago sa schedule ko," aniya kaya napatango naman ako at mabilis na kinuha ang cellphone sa bulsa. 

Binigay ko naman sa kanya ang account ko at tumango na lamang siya. Nang ayos na ang lahat ay yumuko ako ng kaunti at nagpaalam na. 

"Sige po, Mayor. Alis na po ako, ingat po sa biyahe." Paalam ko pa at akala ko ay hindi niya ako sasagutin pero palihim na lang akong napasinghap ng tumalikod na ako sa kanya. 

"Take care too, Ms Madrigal." 

Ayun na lamang ang huling narinig ko bago mawala ang yabag ng paa niya, kaya lumingon ako saglit kung si Mayor Caleb ba talaga ang narinig ko. Nang mawala na siya sa paningin ko ay mahina kong sinampal ang sarili ko. 

"Pagod lang 'yan, Sierra. Hindi 'yan sasabihin ni Mayor." 

Pagbaba ko ng tricycle ay sumalubong sa akin si Papa na ngayon ay nasa tapat ng pintuan kaya kumaway ako sa kanya at pinakita ang supot ng Jollibee na ikinailing naman niya.

"Bakit nag-uwi ka pa, Sierra? Sana ay inipon mo na lang 'yan," aniya kaya napanguso naman ako at kumapit sa braso niya. 

"Treat ko sa inyo ni Mama, Pa. Since unang araw ko kay Mayor Caleb. Hayaan niyo kapag nakasahod ako ay gagala naman tayo," nakangiting saad ko kaya bumitaw ako kay Papa para magmano naman kay Mama. 

"Nag-uwi ka pang bata ka. Ikaw talaga, minsan ay isipin mo rin ang sarili mo." Isa pa si Mama kaya napaismid na lamang ako at hindi na lang sila pinansin. Inilabas ko na ang nasa supot at nagsalo-salo na kami. 

Habang nginunguya ko ang fries ang nagtanong naman ang dalawang kaharap ko kaya uminom muna ako ng coke bago sila pakinggan. 

"Kumusta naman ang unang araw mo kay Mayor Caleb, nasungitan ka ba?" Natatawa ngunit may pag-aalala sa boses ni Mama kaya peke akong huminga ng malalim na akala mo ay may malaking nangyari na hindi maganda sa akin. 

Kaya ang kaninang seryosong mukha ni Papa ay mas naging seryoso pa kaya natawa na ako nang malakas. Mukhang sineryoso nila ang reaksyon ko. 

"Joke lang po. Okay naman po, Ma. Ang suplado lang ni Mayor, hindi man lang akong inaya na magla-lunch na." Pagkukwento ko kaya napailing naman sila. 

"Masanay ka na, Sierra. Ganyan ang magiging routine mo araw-araw, may araw na malala ang init ng ulo ng Mayor natin kaya pagpasensyahan mo." Pangaral ni Mama kaya tumango naman ako. 

"Opo, Ma. Ganun na nga po ang gagawin ko para makapag-ipon na rin. Kapag sobrang init na ng ulo ni Mayor ay maihagis na lang siya sa loob ng ref para lumamig." Pagbibiro ko na lamang kaya mahina akong kinurot ni Mama. 

"Nagbibiro lang!"

"Oh siya, ikaw ay magpapahinga na. Ako na ang bahala dito, alam kong maghapon kang nakatingin sa monitor. Maaga na rin ang pasok mo bukas." 

"Sige po, good night po." Paalam ko na at umakyat na sa kwarto ko para magpalit na ng damit. 

Pagpasok ay kumuha na ako ng damit at tuwalya para maglinis ng katawan. Naghihilamos at sipilyo lang ako kaya madali na ito. Pagkatapos ng paglilinis ay deretso kama na ako at humiga na. 

"Ang sakit ng katawan ko," pagrereklamo ko at saglit na napapikit ng maramdaman ng katawan ko ang malambot na kama. 

Pero mabilis rin akong napamulat ng may nagnotif sa cellphone ko. Pagtingin ko ay sa F******k ko pala ito kaya binuksan ko ito at may nakita akong friend request.

Caleb Raixon Montemayor sent you a friend request.

Nang mabasa ko ito ay hindi na ako nagdalawang isip na inaccept, nang okay na ay nakita ko ang mga post niya na related sa opisina o kaya ay achievements niya bilang Mayor. Limited lang ang comment sa post niya. 

"Miski sa F******k ay suplado ka rin, Mayor." Naiusal ko na lamang at napapikit na dahil sa sobrang pagod.

"ILANG beses kong sinabi sa inyo na kailangan may schedule ang pagpunta ng mga media dito sa Munisipyo?" Ayan agaf ang narinig ko pagpasok ng opisina ni Mayor Caleb. 

Kaya tahimik akong umupo sa kinauupuan ko at inayos ang mga gamit kahit ayos na. Hindi na agad ako nakabati dahil sa masamang awra kay Mayor Caleb. Puno ng iritasyon ang boses nito kaya kinabahan na rin ako. 

Baka mamaya ay madamay ako.

Nang tingnan ko ang pinapagalitan niya ay tatlong babae ito at pare-parehong nakayuko kaya hindi ko maiwasang maawa. Agang-aga ay galit na Mayor Caleb ang sumalubong sa kanila. 

"Pasensya na  po, Mayor. Kami rin po ay hindi namin alam na may ilang reporter na po ang nasa labas. Hindi na po mauulit." Aniya ng isa kaya lahat kami ay nag-aabang ng isasagot ni Mayor Caleb pero isang malakas na buntong hininga niya ang narinig namin. 

Patay, mukhang magbubuga na ng apoy ang dragon. 

"Get out," mariin ngunit seryosong utos niya kaya nagkukumahog na lumabas ang tatlo at kaming dalawa na lang ang naiwan. Kaya ang ending ay ako na ang kinabahan. 

Tahimik ko lang pinapakiramdaman si Mayor Caleb, mukhang mainit pa rin ang ulo base sa paghinga at galaw niya. Halos mapatalon ako sa kinauupuan ko ng malakas niyang binagsak ang stapler sa lamesa niya at umupo. 

"Damn those reporter," bulong niya kaya palihim na akong napalunok dahil personal ko ng narinig ang pagmumura ni Mayor Caleb. 

"Sierra." 

Kinilabutan at the same time ay napatayo ako sa kinauupuan ko ng tawagin niya ang pangalan ko kaya napatingin ako sa kanya. 

"Bakit po, Mayor? May kailangan ka po?" 

"Makikisuyo ako, pakikanaw ako ng kape," aniya kaya tumango naman ako at mabilis na kumilos. 

Nang matapos na ang ginawa ko ay dahan-dahan ko itong nilapag sa harapan niya kaya tumigil siya sa pagsusulat at tinikman ito. Nakadalawang beses pa siya bago seryosong tumingin sa akin. 

May problema ba sa ginawa ko? 

"Masyadong matamis ang kape mo." Deretsahang saad niya kaya saglit akong nabingi at napakamot sa ilong. Akmang kukunin ko na sana pero nilayo niya ito. 

"Uulitin ko na lang po ang timpla, Mayor Caleb." Natatakot kong saad kaya mas lalo pa niya itong nilayo sa akin. 

"I guess Reina didn't inform you what I like and I don't like. This coffee is okay now, you can continue what you are doing," aniya kaya kagat labi akong tumango at imbis na bumalik sa pwesto ay lumabas ako para hanapin si Ate Reina.  

Nang makita ko siya sa kinauupuan niya ay lumapit ako na ikinagulat naman niya. 

"Ate Reina, sabi ni Mayor ang tamis raw ng kape ko. Ano bang tamang timpla niyon at saka ano yung mga bagay na gusto at 'di niya gusto?" Pagtatanong ko pa kaya napatango naman siya. 

"Hindi nga pala kita nainform kahapon. Pasensya ka na, tinapon ba ni Mayor ang kape na ginawa mo?" Pagtatanong niya kaya umiling ako bilang sagot dahilan para magtaka siya.

"Imposible? Eh nagtatapon ng kape 'yon kapag sobrang tamis at hindi niya nagustuhan ang lasa. Anyway, ito na nga. Tatlong kutsara ng creamier, isa't kalahating kutsara ng asukal at isang kutsara ng itim na kape. Dapat sakto lang ang init." Saad niya kaya sinulat ko naman. 

Marami pa siyang sinabi pero lahat ng 'yon ay sinulat ko para hindi na muling magreklamo si Mayor. Katulad na lamang ng ayaw niya sa kamatis, allergy siya sa sibuyas. Ayaw niya ng sobrang lamig na pagkain at hindi medyo mahilig sa matamis si Mayor. 

Nang ayos na ang lahat ay nagpasalamat ako kay Ate Reina dahil baka mamaya ay hinahanap na ako ni Mayor Caleb. Mabuti nga raw at hindi ako nasigawan sa ginawa ko. Pagbalik ko sa opisina niya ay  may kausap siya sa telepono at ibinababa ito.

"Sierra," pagtawag niya sa pangalan ko kaya napatingin ako sa kanya. 

"Sumama ka sa akin, may kakausapin lang ako."