CHAPTER 4

SABRINA POV

Limang araw na ang lumipas mula noong gabing iyon. Habang abala ako sa pagrepaso ng mga financial report sa executive office ng Vanguard Group sa BGC, unti-unti namang bumabagsak ang mundo ni Caleb Salvador.

Hindi ko na kailangang mag-utos o maglagay pa ng hidden camera para lang sirain ang mga plano niya. Sarili niyang mga desisyon, pati na ang panghihimasok ng pamilya niya, ang unti-unting nagdala sa kanila sa ganitong sitwasyon. Ayon sa secretary ko, sunod-sunod nang umaatras ang mga pangunahing local investors sa hotel project nila. Akala siguro ng pamilya Salvador ay magiging maayos ang lahat dahil nakuha nila si Alexa Tauzon, pero hindi nila alam na baon din sa utang ang ama nito sa iba't ibang bangko. Ngayon, nagsisimula nang maningil ang mga ito. Sa madaling salita, ang pamilyang ipinagmamalaki nilang magiging katuwang nila ay isa palang ticking time bomb na puwedeng sumabog anumang oras.

Umupo ako sa swivel chair at pinagmasdan ang mga dokumento ng Salvador & Associates. Kitang-kita sa mga report na unti-unti na silang nalulugi. Ang mga materyales na binili nila para sa proyektong ipinagmamalaki ni Caleb ay nakasalalay sa mga utang na hindi na nila kayang bayaran. Mas lumala pa ang sitwasyon nang biglang ihinto ng mga bangko ang credit lines nila.

Maya-maya, bumukas ang p***o ng opisina ko at pumasok si Marcus, ang pinagkakatiwalaan kong chief operations officer. May hawak siyang tablet at bahagyang nakangiti habang papalapit sa mesa ko.

"Boss Sabrina, mukhang nagpapanic na ang mga tao sa kabilang kampo," bungad ni Marcus habang inilalapag ang tablet sa ibabaw ng mahogany desk. "Nakatanggap na ng formal notice ang kumpanya ni Architect Salvador mula sa tatlo nilang pangunahing investors. Umatras na silang lahat. Kung magpapatuloy ito, baka sa susunod na linggo ay mapilitan na silang mag-file ng corporate bankruptcy."

Tiningnan ko ang screen ng tablet kung saan nakalagay ang balita tungkol sa pag-atras ng mga investors. Hindi ko napigilang mapangiti nang bahagya.

"Kumusta naman ang huling malaking global investor na pinag-uusapan natin?" tanong ko habang humihigop ng itim na kape.

"Nakahanda na ang lahat ng kailangan nilang papeles, Ms. Del Monte," sagot ni Marcus. "Naghihintay na lang sila ng go signal mo. Pero may bago kaming balita. Sinubukan ng Salvador & Associates na kontakin ang Vanguard Group para humingi ng emergency funding. Desperado na si Caleb na makakuha ng pera kahit kanino para lang maisalba ang project at hindi mapahiya kay Alexa."

Tumango ako. Sakto ang timing. Pero ayokong basta na lang silang pabagsakin nang hindi man lang nila nakikitang may pagkakataon pa silang makabangon. Gusto ko muna silang bigyan ng pag-asa bago ko tuluyang ipakita sa kanila kung ano talaga ang naghihintay.

"I-set mo ang meeting," utos ko kay Marcus habang inaayos ang cuffs ng tailored charcoal gray blazer ko. "Sabihin mo sa kanila na handang makipag-usap ang Vanguard Group tungkol sa multibilyong pondo at pagbili ng mga natitira nilang shares."

Bahagyang napakunot ang noo ni Marcus. "Ikaw mismo ang makikipagkita sa kanila, Boss? Hindi ba posibleng malaman agad ni Architect Salvador kung sino ang nasa likod ng lahat ng ito?"

"Exactly. Iyon mismo ang gusto ko," sagot ko habang nakatingin sa bintana ng opisina ko. Mula sa 45th floor, tanaw ang halos buong siyudad. "Ayokong sa ibang tao niya malaman ang katotohanan. Gusto kong makita mismo ang mukha niya sa araw na matuklasan niyang ang asawa niyang minamaliit at tinapakan niya ang siyang may-ari ng kumpanyang puwedeng magpatigil sa lahat ng plano niya."

"Masusunod, Ms. Del Monte. Pero may isang espesyal na kondisyon sa draft contract natin bago nila makuha ang pondo, tama ba?" tanong ni Marcus bago tuluyang tumalikod para lumabas.

Tumango ako at bahagyang ngumiti. "Oo. May espesyal akong kondisyon para sa lead architect nila."

Pagkaalis ni Marcus, tumayo ako at lumapit sa salamin. Naalala ko ang mukha ni Caleb noong gabing pinaalis niya ako sa hotel sa harap ng maraming tao. Bumalik din sa isip ko ang mga pang-iinsulto ng biyenan ko at ang kayabangan ni Alexa. Limang taon akong nagpakumbaba at nagtago sa likod ng imahe ng isang asawang wala raw silbi. Binigyan ko sila ng limang taon para ipakita kung sino talaga sila. At ngayong nakita ko na ang lahat, wala na ang dating Sabrina na handang magtiis para sa kanila.

Kinabukasan, kumalat sa buong business district ang balita tungkol sa Salvador & Associates. Ang kumpanyang muntik nang malugi ay nakahanap daw ng isang malaking global investor na handang maglabas ng bilyun-bilyong piso para maisalba ang kanilang proyekto sa BGC. Para sa kanila, isa itong himala. Pero wala silang ideya na ang tinatawag nilang himala ay ang mismong patibong na inihanda ko para kay Caleb.

Tumunog ang intercom sa mesa ko.

"Ms. Del Monte, nakumpirma na po," sabi ni Marcus mula sa kabilang linya. "Nasa baba na si Architect Caleb Salvador kasama ang kanyang kasosyo. Handa na silang pumasok sa executive conference room para sa final negotiation ng funding contract."

Kinuha ko ang folder na naglalaman ng mga dokumento, hinawakan ang itim na panulat, at dahan-dahang naglakad papunta sa p***o.

Oras na para singilin ko sila sa lahat ng utang nila sa akin.