CHAPTER I

ROUGJAN AISLINN ALLEJO

Busy ako sa paghahanap ng enrollment form sa loob ng bag ko nang magvibrate ang cellphone ko.

"Hello, may problema?" kaagad na sagot ko sa tawag ni Kuya Allerick.

"Sa tuwing tatawag ba ako ay problema sinasabi ko?" Hindi ko na lang pinansin ang sinabi niya

"I'm in a hurry, Kuya baka nando'n na sina Louise."

"Umuwi ka kaagad."

"Yeah, I know. I gotta go. Nakita ko na si Alec," saad ko nang matanaw si Alec sa 'di kalayuan. "See you," huling sabi ko bago ibaba ang tawag.

"Rouge!" Patakbong lumapit sa akin si Alec nang makita ako kaya naman may ilang students ang napalingon sa direksyon namin.

"Wala pa sila?" Umiling lang siya saka kumapit sa braso ko.

"May free taste ro'n, ginawa ng mga senior high school students." Napapikit na lang ako nang hilahin ako ni Alec papunta sa isang stall na marahil ay itinayo rin ng mga senior high students.

"Hi! Good afternoon po, you can have this," saad ng babae saka iniabot sa akin ang maliit na cup, ice cream ang laman no'n.

"Thank you!" Nagulat na lang ako nang hilahin ulit ako ni Alec paalis sa stall. Kahit kailan talaga.

"Ano yan? Patikim.” Nagulat ako nang sumulpot sina Aillard sa harapan namin, kasama niya sina Dieosh at Luminous pero Louise ang nickname niya. Ibinigay ko kay Aillard ang cup. Ayoko naman talaga, hinila lang ako ni Alec.

"Ayaw mo na?" Tumango lang ako saka hinanap ulit ang enrollment form, kailangan ko iyon dahil enrollment ngayon for second year college.

"Ano bang hinahanap mo r'yan?" Napatingin ako kay Louise, hindi siya nakauniform ngayon.

"Yung enrollment form. Bakit hindi ka nakauniform?" tanong ko.

"Sira ka talaga, p'wede raw ang hindi naka-uniform saka ipinasa kahapon yung form, 'di ba?"

"Huh? Hindi ko naipasa yung akin."

"Pumunta ka muna sa registrar office para humingi ng kopya ulit, kanina pa kami rito. Bakit ngayon lang kayo?" ani Dieosh.

"Late na akong nagising. Naka-enroll na kayo?" Lahat sila ay tumango.

"Tara na, samahan ka namin sa office," saad ni Dieosh na nauna maglakad kaya sumunod kami. Bakit nga ba hindi ko naipasa kahapon yung form?

"Saan tayo after nito? Gusto ko sana sa Starbucks," ani Aillard na nauunang naglalakad sa amin ni Louise.

"Sa restaurant na lang, 'di ba may bagong bukas na restaurant yung pinsan mo, Louise?" tanong ni Dieosh.

"Meron, hindi ko lang sure kung bukas sila, Saturday ngayon eh."

"Nandito na. Rouge, ikaw na lang pumasok, ang sungit ni Mrs. Elrado," pabulong na sabi ni Alec kaya bahagya akong natawa.

"Saglit lang," saad ko bago pumasok ng office.

"Good afternoon po," bati ko kay Mrs. Elrado na pinagtaasan lang ako ng kilay. "Can I request for a new copy of enrollment form for incoming second year college?"

"It was given and passed yesterday. Why are you requesting for a copy?"

"Ma'am I forgot—." She cut my sentence as she drops a bundle of paper in front of me.

"I don't need your excuse, get one and get out," Itinago ko na lang ang inis ko saka kumuha ng isang papel.

"Thank you, Ma'am, lalabas po ako kahit hindi niyo po ako utusan." I plastered a smile before stepping outside.

"Pinagalitan ka?" Umiling lang ako saka ipinakita ang form na kinuha ko. Matapos kong magfill-up ng form ay pumunta naman kami sa admin's office para mag-enroll.

"Wait, punta lang muna akong C.R," saad ko pagkalabas ko ng office.

"Ako rin," ani Louise kaya tumungo kaming dalawa sa banyo, sumunod din si Alec sa amin habang sina Aillard ay naghintay sa labas.

"May extra kayong sanitary pads? Nakakainis, meron pala ako ngayon," ani Alec kaya kaagad akong kumuha ng dala kong napkin sa bag.

"Salamat," aniya saka pumasok sa isang cubicle.

"Rouge, patulong nga rito." Napakunot ako nang marinig ko ang boses ni Luminous mula sa loob ng cubicle.

"Bakit?" Binuksan ko ang pinto saka bumungad sa akin ang nakatalikod na si Louise. "Ayaw maisara?" pagtutukoy ko sa zipper ng skirt niya.

"Oo, nakalimutan ko kasing papalitan ng zippe—." Napahinto kaming dalawa nang maitukod ni Louise ang kamay niya sa pader ng cubicle.

"Ano 'yon?" nagtatakang tanong ko dahil iba ang reaksiyon ng mukha niya.

"Gumalaw yung pader."

"Huh? What do you mean?" Itinaas ko ang zipper niya saka hinawakan ang pader at itinulak iyon dahilan para tila unti-unting umusog ang pader na hinawakan ko. "Mukhang may pinto rito."

"Eh bakit naman may pintuan dito sa loob ng cubicle?"

"Malay ko," sagot ko.

"Parang dito." Itinulak niya ang pader hanggang sa naramdaman kong tila gumagalaw ang inaapakan namin.

"What the heck." Kaagad kaming napahawak sa isa't-isa nang malaglag kami mula sa inaapakan namin kanina.

Pagbagsak namin ay dilim ang bumalot sa paligid namin.

"Rouge." Nagulat na lang ako nang marinig din si Alec na narito. "Ang dilim."

"Hello? May tao r'yan?"

"Aillard?"

"Rouge? Nandito rin kayo." Ilang segundo lang ay may biglang bumukas na ilaw mula sa 'di kalayuan. Sa ngayon ay kahit papaano ay naaaninag ko na ang paligid.

"Anong nangyari?" tanong ni Dieosh nang lumapit sila sa amin.

"Tingnan niyo." Lahat kami at napatingin sa itinuro ni Alec. Isang tren.

"Silipin natin." Naunang naglakad si Aillard habang kami ay nasa likuran niya. Maya-maya'y sunod-sunod na bumukas ang ilaw mula sa loob ng tren, may ilang mga estudyante ang nakasakay roon.

"Good afternoon, students of A****n University. Welcome to Veil Subway," saad ng isang matangkad na lalaking nakasuot ng corporate attire at may maskarang tumatakip sa mata niya.

"Ano po ang mayro'n dito?" tanong ko.

"You can come inside. I will discuss later," aniya saka inilabas ang isang baril kaya bahagyang napalunok ako. Tumingin si Aillard sa amin bago naunang pumasok.

"Tabi tayo," ani Alec saka humawak sa braso ko.

Sa bandang likuran kami magkakasunod na umupo. Magkatabi sina Aillard at Dieosh sa unahan sa bandang kaliwa habang sa kanan naman si Luminous. Sa tingin ko ay kaparehas lang naming mga grade 11 ang mga nasa loob ng tren dahil medyo pamilyar ang ilan sa kanila.

"Please wear your seatbelts for your safety. I know all of you have a question, but you'll get your answers later." Kaniya-kaniyang kabit ng seatbelt ang iba kaya naman ikinabit ko na rin ang akin. Nakita kong parang nanginginig pa si Alec kaya hinawakan ko ang kamay niya.

"Calm down."

"As we invade this queer Veil University. Where the law is in your possession. The start of the thrill adventure will now begin." Maya-maya'y muling binalot ng kadiliman ang buong paligid hanggang sa maramdaman kong umaandar na ang tren na sinasakyan namin.

"Ayos ka lang?" tanong ko kay Alec dahil ramdam kong bahagyang humihigpit ang hawak niya sa kamay ko.

"Medyo nahihilo ako. Ang bilis ng tren." Pinisil-pisil ko ang kamay niya upang kahit papaano'y kumalma siya, kahit ako ay medyo nahihilo rin sa bilis ng andar ng tren.

"Bzzk. Bzzk." Nagulat ako dahil sa pagvibrate ng cellphone ko kaya naman kinuha ko iyon sa bulsa saka yumuko para hindi makita ang liwanag mula sa phone ko. Kailangan kong magmessage kay Kuya dahil iba ang pakiramdam ko rito.

"Kahit anong gawin mo ay hindi gagana ang cellphone mo sa lugar na 'to." Napa-aray ako nang may humila sa buhok ko paitaas, mahigpit iyon. "Mabuting sumunod ka na lang," bulong niya sa tenga ko bago bitawan ang buhok ko.

"Ayos ka lang?" rinig kong tanong ni Aillard mula sa harapan namin.

"Oo," sagot ko habang bahagyang inaayos ang buhok ko. Makalipas ang ilang minutong nakabibinging katahimikan na nangibabaw sa aming lahat ay unti-unting natanaw namin ang liwanag sa unahan.

"Woah," rinig kong sabi ng karamihan.

Natatanaw namin ngayon sa unahan ang napakataas na pader kung saan may nakasulat na ‘Veil University’. Paglingon ko sa bintana ay isang bangin lang ang nakita ko, parang dati itong iisang lupa pero marahil ay dahil sa mga lindol kaya naghiwalay, tanging riles lang ng tren ang nagdudugtong sa mga ito.

"We are now on Dark Labyrinth. You need to pass through the labyrinth for you to survive. If you want to die because of starving, it's your choice. You may now unbuckle your seatbelts. Goodluck on your journey, students." Maliwanag na ang paligid namin, puro puno at matataas na pader. Isa-isang bumaba ang mga estudyante sa tren kaya naman sumunod na rin kaming bumaba dahil mukhang wala kaming choice kung hindi ang sumunod.

"Ano na ang gagawin natin?" tanong ni Louise.

Inilibot ko ang paningin ko sa paligid pero halos wala na ring daanan pabalik, maging ang dinaanan ng tren kanina ay unti-unting naglaho dahil nawala na ang riles doon. Ang ibang mga students ay nakikita kong pumapasok na sa loob ng tinawag ng lalaki na Dark Labyrinth.

"Papasok tayo r'yan?" tanong ni Dieosh.

"Ayoko, hindi natin alam ang mayro'n diyan," natatakot na sabi ni Alec.

"Pero ano ang gagawin natin dito?" tanong naman ni Louise.

"Wala tayong ibang choice kung hindi pumasok sa loob niyan." Ilang sandali lang matapos magsalita ni Aillard ay naramdaman namin ang tila paglindol.

"Sh*t. Tingnan niyo, sumasara na!" gulat na sabi ni Dieosh kaya naman kaagad kaming tumakbo.

"Bilis!" sigaw ko habang tumatakbo sa papasarang higanteng pinto ng Dark Labyrinth.

"Muntik na tayo ro'n," ani Louise na hinihingal pa.

"May ballpen kayo? Ilabas niyo para kung sakaling may umatake sa atin ay handa tayo," saad ni Aillard.

"P'wede na ba 'to?"

"Bakit ka may ganiyan?" tanong ni Alec nang makita ang maliit na kutsilyo na hawak ni Louise.

"Lagi akong may dala nito for self-defense, late kasi tayo umuuwi," paliwanag niya.

"Ako na ang hahawak niyan," ani Dieosh saka kinuha ang kutsilyo kay Louise. Tahimik at tanging mga tunog lang ng pag-apak namin sa mga tuyong dahon ang maririnig sa paligid.

"Mag-ingat kayo sa inaapakan niyo, baka may mga trap dito," paalala ni Dieosh.

"Ano ba kasi ang trip nila at bakit may ganito?" reklamo ni Louise.

"Dead end," saad ko nang makitang walang dadaanan.

"Teka, baka may secret door din dito," saad ni Louise saka dahan-dahang lumapit sa pader kaya sumunod ako para hawakan at tingnan din ang mga pader.

"Meron dito," saad ko saka dahan-dahang pinindot ang nakausling bato dahilan para unti-unting bumukas ang pader na nasa harapan naming lahat.

"Mukhang mas madilim na rito. Rouge, pahiram ng phone mo," ani Aillard. Inilabas ko ang phone ko saka binuksan ang flashlight. Pagtapak ni Aillard sa loob ng nabuksang pinto ay unti-unti na namang gumalaw ang lupa at sumara ang pader na pinanggalingan namin kanina.

"Mag-ingat kayo," paalala ni Aillard.

Isa-isa naming tiningnan ang mga posibleng daraanan namin para makalabas sa labyrinth. Makailang ulit kaming nagpaikot-ikot sa loob dahil mahirap tandaan ang mga daang dinaanan na namin kaya naman nagpunit kami ng mga papel bilang tanda na dinaanan na namin ang lugar na 'yon. Sa paghahanap namin ng daan palabas ay may mga kalansay pa ng tao ang nakita namin dahilan para mas lalong matakot si Alec, hindi siya sanay sa madilim. Medyo mabaho rin kaya napatakip kami ng ilong.

"Mukhang ito na ang daan palabas," saad ni Dieosh na nasa unahan. Mula sa 'di kalayuan ay may naaaninag kaming liwanag, mukhang iyon na nga ang dulo.

"Tara, napapagod na 'ko, gusto ko na magpahinga," saad ni Louise, kahit ang mga paa ko ay nanlalambot na rin dahil sa pagod, hindi ko na matandaan kung gaano kami katagal sa paghahanap ng daan sa labas.

"Kaunting tiis lang, makakalabas na tayo rito."

Makalipas ang ilang minutong paglalakad ay naaninag na namin ang papalubog na araw, kasabay no'n ay ang realization na pare-parehas naming hindi alam kung nasaan ba talaga kami.

"P'wede bang magpahinga muna tayo saglit?" ani Alec na napaupo na sa damuhan.

"Magpahinga muna tayo ng kaunti rito," segunda ni Louise saka umupo sa tabi ni Alec kaya tumabi na rin ako.

As I rested my body because of weariness, I felt someone keeping an eye to us. I nonchalantly open my eyes and directly move my gaze straight up. I wandered my sight while keeping my head at its own pace. My peripheral vision caught someone. Sa kanan, isang babae ang napansin kong nagkukubli sa mga puno.

"Ayos lang ba ang pakiramdam mo?" Itinagilid ko ang katawan ko sa direksiyong kanan para tanungin si Alec.

"Ayos na," sagot niya. Sa pwesto ko ay medyo nakikita ko ang itsura niya. Hindi ko mai-describe ang suot niya dahil nakatago ang katawan niya. Kaagad na napukaw ng atensyon ko ang nasa likuran niya, mga palaso. Nakasuot din siya ng isang maskara na tumatakip sa buong mukha niya.

"May taong nagmamasid sa atin," bulong ko kay Alec. Kaagad siyang lumingon sa likuran niya dahilan para magtago ang babae.

"Tara na, lumakad na tayo. Mahirap na gabihin tayo dito sa gubat," saad ko nang tumayo ako para pagpagan ang sarili.

"Halika na, baka malayo pa yung lalakarin natin." Nauna nang naglakad sina Aillard habang ako ay nagpahuli.

Muli kong ibinalik ang tingin sa lugar kung ng saan ko nakita ang babae. Sa pagkakataong ito, nagtama na ang paningin namin ng babae.

"Rouge, may problema?" tanong ni Aillard saka lumapit sa akin.

Umiling lang ako kay Aillard saka sumabay na sa paglalakad nila. Tahimik na tahimik pa rin ang buong paligid, mga huni ng ibon at ihip ng hangin na humahampas sa dahon ng mga puno ang namumutawing tunog. Nang lumingon ulit ako sa likuran ay hindi ko na nakita pa ang babae.

Ilang minutong paglalakad ang iginugol namin sa paglalakad hanggang sa makarating kami sa harap ng isang arko kung saan nakaukit ang 'Veil University', mukhang may kalumaan na ang arkong iyon dahil pansin ko ang ilang lumot at masangsang na amoy.

“Welcome, new students. Welcome to Veil University." Matangkad na babae ang bumungad sa amin. She was wearing a classy white dress. Kitang-kita na hindi siya Pilipino dahil sa tindig nito. "I will guide you to Administration Building, please follow me," magiliw na saad niya saka naunang naglakad.

"Where are we?" tanong ni Louise sa babae habang naglalakad kami.

"No questions please. Ms. Fhairry will discuss later." Nanatili lang kaming walang imik habang naglalakad, pinapakiramdaman ang buong paligid. Masyadong tahimik kaya nakakapagtaka.

"Sobrang laki dito," puna ni Alec.

Nagpatuloy kami sa paglalakad hanggang sa makarating kami sa harap ng isang gusaling may tatlong palapag, sa itaas nito ay may nakasulat na 'Administration Building'

May sinabi pa ito pero hindi ko naintindihan hanggang sa tuluyan niya na kaming iwan kaya nauna si Aillard na buksan ang pinto.

"Good afternoon, miss," bati ni Aillard nang buksan niya ang pinto, lumingon siya sa direksyon namin at sumenyas na pumasok.

"Good afternoon, welcome to Veil University. I am Ms. Fhairry." Tumayo ang isang matandang babae. "Please take your seats, children." Bahagyang napakunot ang noo ko. Mukha ba kaming grade 1 sa paningin niya?

"Ma'am, what’s this place? Kailangan na po naming umuwi," saad ni Louise.

"It is your new school with a twist," nakangising sambit nito na lalong ikinakunot ng noo ko. "Here in Veil University, you will take all of the available general subjects for college. Your program doesn't matter here. Dito kayo mag-aaral."

"What do you mean? For sure hinahanap na kami ng mga pamilya namin that’s why we need to go home," alma ni Alec.

"Maybe, once you're six feet under the ground," sagot nito na ikinainis ko na.

"Seriously, miss?" sabat ko. Tumingin siya sa akin saka umirap.

"There's no way out, if you want to escape, wait for the right time." Yumuko siya at binuksan ang drawer sa ilalim ng table. "Here's your key, 3 rooms, 3 bathrooms. Serpent Blood Camp. Get out."

"Are you serious, Ma'am? We're staying here?" reklamo ni Louise.

"You’re not just staying here, you’ll live here."

"Saan namin makikita ang k'warto namin?" tanong ni Aillard saka kinuha ang susi na nasa ibabaw ng lamesa.

“Seryoso ka ba sa tinatanong mo?” ani Louise na mukhang nagalit sa itinanong ni Aillard. “Gusto kong umuwi ngayon.”

“We have no choice for now, Louise.” Hinawakan ni Dieosh ang kamay ni Louise saka binulungan.

"Your friend is right, living here is your only option,” nakangiting turan ng babae. “Anyway, diretsuhin niyo ang likuran ng building na ito at may makikita kayong arch, sa kaliwang side ay makikita niyo ang tatlong building, sa pangatlo.”

"Thank you po, we're going now," paalam ni Dieosh kaya nauna na akong lumabas habang nakasunod si Alec.

"Nananaginip ba ako?" tanong ni Alec na nasa tabi ko.

"I hope so," tugon ko rito habang sinusuri ang paligid.

Napapalibutan ng puno ang daanan, mula sa likuran ng Administration Building ay naglakad kami hanggang sa natanaw namin ang isang arko, gawa ‘yon sa bato at medyo mataas, kulay pula iyon. Mula naman sa malayo ay natanaw ko ang malalaking gusali sa bandang kaliwa at kanan. Sa harapan namin ay isang matayog na tower ang nasa gitna ng grassfield, may malaking orasan ito at isang pendulum, dambuhalang pendulum.

"Ang ganda…" komento ni Louise na akala mo’y hindi nagreklamo kanina sa office.

"Tara na, wala tayong choice sa ngayon," saad ni Aillard kaya naman sumunod kami, tama siya.

Nang makarating kami sa harapan ng tatlong building sa kaliwa ay nakita namin ang tatlong matataas na building na kanina ay natanaw ko na, sa pinakatuktok no’n ay may malaking banner, isang gray, blue, at maroon sa dulo. Sa ikatlong gusali ang Serpent Blood Camp ayon kay Ms. Fhairry kanina kaya pumunta kami ro’n. Room 164 ang room number namin pero inikot namin ang second floor para makita ang itsura. May sampung room ang second floor, marahil ay gano'n din sa iba. Maganda at elegante ang disenyo ng paligid at may elevator sa pagitan ng 5th and 6th room. Tahimik at nakakatakot ang pakiramdam habang binabaybay namin ang ikaapat na palapag.

"Wala bang tao—." Natigilan si Dieosh nang bumukas ang katabing pinto ng room 164, yung 163.

"Hi," bati ni Alec sa babaeng sumilip pero tiningnan lang siya nito saka isinarang muli ang pinto.

"Para tayong nasa hotel," saad ni Aillard nang buksan niya ang pinto.

"Mukhang komportable rito," ani Dieosh habang inililibot ang paningin sa loob ng silid. Isang mini table ang bumungad pagkabukas ng pinto, may vase sa ibabaw no’n.

Kulay puti ang pader, may mga appliances na mukhang mamahalin, mukhang kumpleto ang mga gamit.

"May pagkain yung ref," saad ni Aillard habang hawak ang isang tumbler na may lamang tubig. "Uhaw na uhaw na 'ko."

"Pahingi." Lumapit sa kaniya si Alec na sinundan naman ni Louise.

"Ayos ka lang? Parang may tinitingnan ka kanina ro'n sa gubat," tanong ni Dieosh na tumayo sa tabi ko.

"Ayos lang ako. May nakita lang akong babae kanina."

"Anong itsura?"

"Nakamaskara," sagot ko habang tinitingnan pa rin ang paligid.

"Rouge, tingnan mo 'to." Napalingon ako sa likuran ko, may hawak na gummy candies si Louise kaya kaagad akong kumuha ng isa.

"I-check natin yung mga kwarto," saad ni Dieosh saka umalis sa tabi ko.

"Tabi tayo matutulog. King size naman yung kama rito," ani Alec nang buksan niya ang pangalawang kwarto.

"Kakasya tayo," tugon ko.

"Kumpleto ang gamit rito," saad ni Aillard, mukhang nalibot niya na ang buong kwarto, nasa unahan ‘yon. "Sama-sama na lang kayo sa isang k'warto? Tabi na lang din kami Dieosh, may isa pang bakante sa dulo kung gusto niyo," saad ni Aillard sa tabi ko.

"Ayos na kami sa isang k'warto, may nakita kang mga damit?"

"Mayro'n, mabuti siguro kung magpalit muna tayo," tugon ni Aillard kay Louise.

Kagaya ng sinabi ni Aillard ay nagpalit kami ng damit sa kaniya-kaniyang k'warto, Mabuti na lang at may maaayos na damit ang laman ng closet kaya may nagamit kaming pamalit, isa-isa kaming nagpalit nina Alec at Louise sa loob ng mini dressing room.

"Gusto ko na umuwi," saad ni Alec na sumalampak sa kama.

"Wala talagang signal dito," saad ko habang sinusubukang i-dial ang number ni Kuya.

"Mabuti nadala mo yung phone mo pero siguradong wala talagang signal dito dahil doon pa lang sa subway station ay wala ng signal," saad ni Louise habang nagbibihis pa sa mini dressing room.

"Magpahinga muna tayo, inaantok na ako." Nahiga ako sa tabi ni Alec saka niyakap ang isang unan hanggang sa tuluyan akong lamunin ng antok.

Kinagabihan ay isang nakakikilabot na tunog ang gumising sa akin. Kaagad akong tumayo upang sumilip sa bintana. Nagliliparan ang mga ibon dahil na rin siguro sa pagkabulabog sa kanila.

"Rouge, gising ka na pala, kain na tayo. Nagluto sina Dieosh," saad ni Louise nang pumasok sa k'warto.

"Ang lakas ng tunog na 'yon." Nagkibit-balikat lang siya saka pumasok sa banyo.

Paglabas ko ay naabutan ko sina Aillard na naghahanda ng pagkain habang sina Dieosh at Alec ay nakaupo na.

"Nakita ko yung magazines nila, updated yung mga 'yon," ani Alec nang umupo ako sa tabi niya.

"Mabuti okay yung mga pagkain sa ref?" saad ko.

"Oo, malinis naman saka mukhang bagong lagay lang."

Matapos nilang maghanda ay isa-isa silang umupo, lumabas na rin si Louise sa kwarto kaya naman nagsimula na kaming kumain. Hindi ito ang unang beses na nagsama-sama kami sa isang k'warto pero iba ngayon ang pakiramdam ko.

"Sa tingin niyo, makakalabas tayo?" saad ni Alec.

"Sana," tugon ko.

"Sa sinabi ng babae kanina, mukhang seryoso siya," sabi naman ni Dieosh na kumukuha ng kanin.

"Hindi naman nila tayo mapapanatili sa lugar na 'to ng matagal."

"Unless may pera sila," tugon ni Louise kay Aillard. "Siguradong ang nagpapatakbo ng university natin noon ang nagpapatakbo ng university na 'to."

"Pero, ano kayang twist ang sinasabi ng babae kanina?" tanong ni Dieosh.

"Naalala niyo ba yung sinabi ng lalaki kanina sa tren?" tanong ni Louise.

"Where the law is in your possession," sambit ko mula sa mga sinabi ng lalaking nakamaskara kanina sa tren.

"Hindi ko nagets." Mahinang natawa si Alec.

"Baka wala silang rules…" tugon ni Louise, nagkibit-balikat na lang kami.

"8 o'clock ang first class natin, nakita niyo na ba yung schedules natin kanina? May mga pangalan tayo ro’n," ani Dieosh.

"Huh? Paano nila nalaman ang pangalan natin?" takang tanong ni Louise.

"Hindi ko rin alam."

"Kumain na lang muna tayo para makapagpahinga na ulit," saad ni Aillard saka tumuloy sa pagkain.

Matapos naming kumain ay si Dieosh na ang nagligpit ng pinagkainan, rotation na lang siguro ang gagawin namin para fair. Naupo ako sa couch para magpababa ng kinain pero nagulat ako nang makarinig ng isang kalabog mula sa pinto, lahat kami ay napatingin sa pinto, pinakikiramdaman ang nangyayari. Dahil sa curiosity ay tumayo ako upang lumapit sa sliding window para silipin ang pinto.

"Sh*t." Paghawi ko ng kurtina ay halos bumaliktad ang sikmura ko ng bumungad ang isang lalaking puno ng dugo ang nakaharap sa bintana kaya kaagad kong isinara ang kurtina.

"I got a terrible feeling about this university.”