الفصل الخامس....... "حين يناديك المجهول"

كانت الشمس بدات كتميل نحو الغروب، وهادك الأشعة البرتقالية اللي كتدخل من شرجم ديال الدار كانت كترسم على لحيوط لون دافئ، كيبان بحال إلا الدار كلها لابسة توب هادئ قبل ما يهبط الليل.

فالمطبخ، كانت لالة مينة واقفة قدّام الطابلة، كتوجد العشاء بيديها اللي تعودو يخدمو بلا كلل، وهي كتغني بصوت خافت ما كيتسمعش مزيان، غير كيعطي للمكان حياة بسيطة ومريحة . وكل شوية كانت كتشوف في الساعة، كأنها كتعد الدقائق بقلق الأم اللي كتسنى ولادها يرجعو للدار.

خرج الأب من المكتب وهو شاد النظارات بيدو، وكيبان عليه لعيا تاع نهار كامل من الخدمة، ولكن رغم هاد الشي كان فوجهه داك الهدوء اللي كيعرف كيفاش يخفف أي توتر. وقف فمدخل الصالون، وابتسم وهو كيسول:

— باقي ما جاوش؟

هزات لالة مينة كتافيها وقالت وهي كتحاول تبان عادية:

— ريان قال غادي يوصل دابا... أما ليان الله أعلم، فقاش تدخل .

ضحك سي حمد وهو كيحرك راسو يمين ويسار بحال واحد لي كيعرف بنتو مزيان.

— هادي من صغرها والوقت عندها ما عندو حتى قيمة.

قبل ما يكمل الهضرة، سمعو صوت الباب كيتحل، ومن بعد دخل ريان بخطوات هادئة، وكأنه جا لعالم آخر مختلف على صخب النهار كيبان عليه حتى هو باغي يهبط شوية من ضغط الخدمة حط السوارت فوق الطابلة

— السلام عليكم.

ردو عليه بجوج.

— وعليكم السلام.

قرب من الأم، باس راسها.

— الله يعاونك الوليدة.

ابتسمات وهي كتقول:

— الله يعاونك حتى نتا، كيف داز النهار؟

— طويل... ولكن الحمد لله.

كلس فالصالون، وحيد الساعة من يدو، وطلق زفرة خفيفة بحال إلا لقى أخيراً فرصة يرتاح فيها. الأب، اللي كان كيراقبو من بعيد، قال وهو كيشير ليه بابتسامة خفيفة

— شنو درتي فالمشروع الجديد؟

رفع ريان عينيه وقال بهدوء ديالو المعتاد:

— باقي خاصو شوية ديال الخدمة، ولكن الأمور مزيانة.

هز الأب راسو بإعجاب، وفي عينيه داك النوع ديال الفخر اللي ما كيتقالش ولكن كيبان بوضوح.

— ديما كتقول الأمور مزيانة، حتى لو كانت الدنيا مقلوبة.

ابتسم ريان ابتسامة خفيفة.

— القلق ما كيصلح والو.

بتسم سي حمد وهو كيسند ظهرو علي الكرسي

— هاد البرود ديالك غادي يجيب ليا الضغط شي نهار.

وقبل ما يجاوب، صون تلفون لالة مينة. شافت الشاشة، ولقاو فيها الاسم ديال ليان.

— ليان.

جاوبات بسرعة.

— فينك آ بنتي؟

جاها صوت ليان من جيها لخرا  ضحكتها كانت باينة حتى فتلفون:

— خمس دقايق ونكون فالدار.

الأم عقدات حواجبها وهي كتجاوبها بنبرة فيها شوية عتاب وحنان فنفس الوقت:

— هادي قلتيها قبل ربوع ساعة.

— هاد المرة بصح.

قطعات الأم الخط وهي كتهز راسها وكتضحك.

— ديما نفس الهدرة.

ريان، اللي كان كيسمع من بعيد، خرج تلفونو من جيبو وقال:

— غادي نعيط ليها.

ضحك الأب.

— خليها تعيش حياتها شوية.

رد ريان وهو كيدير الاتصال:

— هيا تعيش حياتها، وتخلينا حنا نموتو من الجوع.

عيط ليها جاوبات من أول رنة.

— نعم؟

— فين وصلتي؟

— قلت لماما خمس دقايق.

— هاد خمس دقايق ديالك نتي مكتساليش .

— نتا حتى نتا بديتي؟

— واش كلتي؟

سكتات.

ابتسم ريان لأنه فهم الجواب قبل ماتقولو.

— فهمت.

— ريان، راك مبرزيط.

— جاوبي.

تنهدات

— لا... ما كلتش.

— كنت عارف.

— كنت خدامة.

— واش الخدمة أهم من صحتك؟

ما جاوباتش ، وسكت الصوت فتلفون شوية. من بعد قال ريان بنبرة هادئة ولكن حازمة، فيها نوع من القلق اللي كيتخبّى ورا البرود:

— دوزي كول ليك شي حاجة  قبل ما توصلي حيت راه باينة مجياش حتا لتشوف تشوف.

— حااااضر... رتاحيتي ؟

ابتسم.

— شوية.

قطعات عليه.

الأب كان كيراقب هاد المشهد كامل، وكيشوف كيفاش ريان كيهضر مع ليان، كيفاش كيتعصب عليها من غير ما يجرحها، وكيفاش كيبان بحال إلا شيل همها كثر ماكيبان قال:

— مرات كنحس بيك  ماشي خوها... بحال أب ثاني ليها.

رد ريان بكل هدوء:

— إلى خليتوها، غادي تعيش غير بالقهوة.

الأم ضحكات.

— عندو الحق.

...

وبعد حوالي عشرين دقيقة، تفتح الباب بسرعة، ودخلات ليان وهي هازة حقيبتها فكتافها وعينيها عامرين تعب النهار ولكن فيهم حتى حيوية معروفة عليها.

— السلام عليكم.

الأم وقفات وكتقول:

— أخيراً.

دورات ليان وجهها لريان.

— أكيد شكيتي بيا.

رد بكل برودة:

— لا.

سكت شوية، ومن بعد كمل:

— غير قلت الحقيقة.

خرجات ليه لسانها بحال شي طفلة والأب انفجر ضاحك قبل حتى ما يعلق.

— واش مغديش تكبرو شي نهار؟

جاوبات ليان بسرعة:

— إلى هو كبر اولا .

رد ريان:

— هادي مستحيلة.

تعالات الضحكات على طابلة العشاء، وتجمعو كلهم بحال إلا النهار ما بقى عندو حتى ثقل. ملي مدات ليان يدها للخبز، وقفها ريان بعينيه قبل صوتو:

— غسلي يديك.

فتحات عينيها.

—  اوف نسيت.

— عارف.

نفخات وهي كتنوض.

— الله يصبرني عليك.

ابتسمت الأم وهي كتشوفهم وفي قلبها فرحة صغيرة ما محتاجاش تفسير.

هم بالنسبة لأي واحد...

غير أخ وأخت كيتشاجرو كل نهار.

ولكن اللي كان واضح أكثر من أي حاجة...

هو أن كل واحد فيهم كان حافظ تفاصيل صغيرة علي الاخر بلا ما يحس.

كلسو كاملين علي  الطابلة، وبين الضحك، والحكايات الصغيرة، والسخرية اللي ما كتجرحش، كان الدار عامر بشي حاجة صعيب توصف: دفء بسيط وصافي.

ولكن هد  الدفء بالذات هو اللي ما كان حتى واحد فيهم كيتخيل أنه غادي يتبدل في يوم من الأيام.

.................

كان الظلام دامس...

والمطر كينزل بغزارة، حتى الأرض ولات غارقة فالماء.

صوت الرعد شق السماء بقوة.

برق خاطف ضوّى المكان لثانية...

وبان ظل طفل صغير كيجري.

أنفاسو كانت متقطعة.

ورجليه الصغار كيتعثروا وسط الغيس.

كل مرة كيدوي الرعد، كان كيزيد يجري بلا ما يلتفت.

وفجأة...

سمع صوت بعيد.

صوت ما كانش واضح.

بحال إلى شي واحد كينادي...

مرة بصوت منخفض...

ومرة بصوت عالي.

«"... آسر..."»

الطفل وقف.

دور وجهو ببطء.

ما كان باين لا شكون كينادي، لا منين جاي الصوت.

غير الظلام...

والمطر...

وصدى الاسم اللي بقى كيتردد.

«"... آسر..."»

مد الطفل يدو لقدّام...

بحال إلا باغي يشد شي حد.

ولكن...

قبل ما توصل يدو...

ضرب البرق بقوة.

واختفى كلشي.

.......

فتح عينيه دفعة وحدة.

كان كيتنفس بسرعة،او جبهتو كلها عرق .

بقى كالس فوق السرير ثواني، وهو يرجع أنفاسو لطبيعتها.

مد يدو للفيوز اللي حداه .

الضوات الغرفة شويا.

حط يدو على وجهو، وتمتم بصوت منخفض:

— نفس الحلم...

شافت عينيه في ساعة اللي فوق الطابلة.

كانت الثالثة و17دقيقة فجراً.

وقف، ومشى حتى لبالكون.

فتح الخمية بشوية.

المطر كان مازال كينزل...

بغزارة.

بقى كيشوف فيه وهو شارَد.

حط يدو على الزجاج البارد، وهمس بلا ما يحس:

— شكون... آسر؟

سكت.

هو بنفسو ما فهمش علاش خرج هاد الاسم من فمو.

وبقى كيحاول يتذكر وجه الطفل...

ولكن كل ما حاول...

كان الحلم كيهرب من ذاكرتو.

وفي اللحظة اللي رجع فيها للسرير...

بانت صورة فشاشة تلفون اللي كان شاعل.

إياد.