حين افترق الدم

كانت ليلة من ليالي الشتاء اللي البرد فيها كيدخل حتى للعظم.

السماء كانت غارقة فالسواد، والمطر كيهبط بقوة، كيضرب فسطوح الديور والزناقي الخاويين بلا رحمة. كل مرة كيشق البرق في السما، كيبان كلشي للحظة... ومن بعد كيرجع الظلام يبلع المكان.

وسط داك الجو، كانت خطوات صغيرة كتجر راسها بصعوبة.

طفل صغير، ما كيتجاوزش ست سنين، كيمشي وسط الزنقة بوحدو.

حوايجو غرقانين بشتا شعره لاصق فوجهو، ورجليه الصغار ما بقاوش قادرين يهزوه. كان كيرتعش... واش من البرد ولا من الخوف، حتى هو ما كانش عارف.

وقف فجأة سمع شي حاجة.

التفت لوراه بسرعة ما كاين والو.

غير الظلام..

والشتا...

وصوت الرعد.

رجع كمل طريقو، ولكن هاد المرة بخطوات أسرع.

- م... ماما...

خرجت الكلمة من فمو ضعيفة، مخنوقة بالبكا.

ولكن ما جاوبو حد.

عض على شفايفو وهو كيحاول ما يبكيش، غير الدموع سبقوه وهبطو من عينيه، واختالطو بماء الشتا اللي مغرق وجهو.

الرعد دوا مرة أخرى.

الطفل شهق بخوف، وسد ودنيه بيديه الصغار.

وفجأة...

حس بحال إلا شي حد كيتبعو.

دار بسرعة.

ملقا والو.

بقى كيشوف فالظلام، ونفسو كتطلع وتهبط بسرعة.

خطا خطوة...ورجع خطوة للور.

ومن بعد جرى.

جرى بلا ما يعرف فين غادي، كيتعثر ويرجع يوقف، حتى خانوه رجليه وطاح فوق الأرض الفازك .

بقى تما ثواني.

كيبكي بوحدو.

وسط ليلة ما كان حتى واحد عارف شنو وقع فيها بالضبط.

رفع راسو بشوية...

ومن بعيد، لمح ضو خافت خارج من شرجم ديال واحد الدار

بقى كيشوف فيه.

بحال إلا كان آخر حاجة بقات ليه فهاد الدنيا.

وقف بصعوبة، وبدا كيمشي ناحيتو.

خطوة...ورا خطوة...

حتى وصل قريب للدار.

وقبل ما يمد يدو للباب، تحل فجأة.

رجع الطفل للور بخوف.

خرج راجل، كان باغي غير يشوف مال الباب الخارجي كيتزدح مع الريح، ولكن من لمح داك الجسد الصغير واقف قدامو، تجمد فبلاصتو.

- يا لطيف...

الطفل بقى كيشوف فيه عينيه عامرين خوف الراجل قرب خطوة.

الطفل رجع خطوة لور

وقف الراجل فبلاصتو.

- ما تخافش آ وليدي...

ما جاوبوش.

- شنو كدير هنا بوحدك؟

طفل مدواش

- فين والديك؟

الطفل رمش بعينيه.

فتح فمو باش يهضر...

ولكن حتى كلمة ما خرجات.

وفجأة، خرجات مرا من ورا داك الراجل.

- مالك واقف فالباب...

سكتات.

عينيها وقفو علي داك الطفل.

ثواني طويلة دازو وهي كتشوف فيه بلا ما تتحرك.

ومن بعد قربات بسرعة.

- يا ربي السلامة... راه غارق فالماء!

حيدات لكاب اللي كان فوق كتافها، ولفات بيه الطفل.

الغريب... أنه ما قاومهاش بقى غير كيشوف فيها.

شي حاجة فوجهها خلاتو ميتحركش.

ولو غير شوية.

الراجل شاف مرتو، ومن بعد رجع شاف الطفل.

- دخليه... غادي يموت بالبرد.

شداتو المرا من يدو.

كانت يدو باردة بشكل خلا قلبها يتقبض.

دخلاتو للدار.

وقبل ما يتسد الباب، الطفل دور راسو لباب للمرة الأخيرة.

شاف الزنقة المظلمة.

المطر.

والطريق اللي جا منها.

وبين ضوء البرق اللي شق السما للحظة...بان ليه خيال واقف بعيد.

تجمد.

رمش بعينيه... رجع الظلام... والخيال اختفى.

- آ وليدي؟

شدات المرا يدو أكثر.

الطفل رجع شافها.

- دخل... ما تخافش.

دخل وتسد الباب من وراه.

بلا ما يعرف...

أن ديك كانت آخر ليلة غادي يشوف فيها حياتو لقديمة.

وأن شي حد...فمكان آخر...كان غادي يقضي سنين طويلة كيقلب عليه.

ـــــــ ــــــــــ ـــــــــــ ــــــــــ ــــــــــــ ـــــــــــــ ـــــــــ ــــــــ ـــــــــــ ــــــــ ـــــــــ ــ