الفصل الرابع....... "حين يبتسم الوجع"

بعد ما غلقات المكالمة مع ريان، ورجعات قدام الطابلة.

شدات القلم، ولكن هاد المرة ما عرفاتش منين تبدا.

تنهدات وهي كتقول:

- هاد الإنسان غادي يبقى كيعاملني بحال إلا مازال عندي عشر سنين.

ضحكات سلمى.

- بالعكس... باين عليكما متفاهمين.

هزات ليان كتافها.

- متفاهمين؟ راه كيأمر وينهى أكثر ما كيهضر.

- ولكن كيهتم بيك.

سكتات ليان.

اوما جاوباتش.

رجعات كتركز على الرسم، ولكن عقلها ما بقاش مع التصميم.

بعد دقائق، جمعات أدواتها، وشدات حقيبتها.

- باراكا علنا اليوم.

استغربات سلمى.

- ها؟ نتي؟ اللي كنتي باغى تبقي حتى الليل؟

ابتسمت ليان.

- إلى بقيت، غادي نضيع غير الوقت. ملي كيكون الراس عامر، الخدمة ما كتخرجش مزيان.

خرجات من المحل، وسدات الباب وراها.

وقبل ما تركب طومبيلتها، وقفات لحظة.

شافت فاللوحة الصغيرة اللي كانت معلقة فوق المحل.

الاسم اللي حلمت به سنين...

اليوم ولى حقيقة.

حتى إلى كان بسيط.

ابتسمت براحة.

- في يوم من الأيام ... غادي يعرفو الناس هاد الاسم.

ركبات طموبيلتها، ومشات.

....................

فجهة أخرى من المدينة...

كان ريان باقي فالمكتب ديالو.

كان قريب يسالي وقت الخدمة، ولكن هو مازال كيقلب فالرسومات والملفات.

دق واحد الموظف الباب.

- أستاذ ريان؟

- تفضل.

دخل وهو شاد ملف فيديه.

- بغيت غير نشكرك.

رفع ريان عينيه باستغراب.

- على شنو؟

- الغلط ديالي... كنت متوقع تطردني.

ابتسم ريان ابتسامة خفيفة.

- إلى كل واحد غلط طردناه، غادي نبقى نخدم بوحدي.

ضحك الموظف.

- بصراحة... الناس كيشوفوك صارم.

رد ريان وهو كيسد الملف:

- الصرامة فالخدمة ماشي معناها القسوة.

خرج الموظف، وبقي ريان بوحده.

جمع أوراقه، طفى الحاسوبو، وخرج.

...

فالطريق...

كان الراديو خدام بصوت منخفض.

ريان كان سايق بهدوء، وعينيه مركزين على الطريق.

وقف فالضو الأحمر.

ومن بعيد، لمح طفلة صغيرة كتشد يد باها وهي كتضحك.

بقى كيشوف فيهم ثواني.

وارتسمات ابتسامة خفيفة على وجهو.

ولكن ما عرفش علاش...

حس بشي فراغ فداخلو.

إحساس غريب كان كيجيه بعد المرات بلا سبب.

بحال إلا كاين شي حاجة ناقصة...

وشي حاجة نساها.

طلق زفرة خفيفة.

وملي شعل الضو الأخضر، كمل طريقو.

ما كانش عارف...

أن بعض الأسئلة كتبقى ساكتة سنين...

حتى كيجي نهار وتفرض الجواب ديالها.

.....................

وفالجهة الأخرى من المدينة...

كان إياد واقف قدام الواجهة الزجاجية ديال المكتب، شاد فنجان القهوة، وعينيه كيشوفو المدينة اللي عامرة بالحركة.

كان 27 من عمره طويل القامة، بنفس طول ريان تقريباً، ولكن شخصيتو كانت مختلفة تماماً.

شعره الأسود كان أطول بشوية، وكيخليه مرات يطيح على جبينو بلا ما ينتبه.

أما عينيه، فكانو فالبني الغامق... ولكن فيهم دفء وحيوية أكثر.

كان من النوع اللي كيدخل لأي مكان وكيخلي الناس ترتاح ليه بسرعة.

كيضحك بسهولة.

كيهضر بزاف.

وكيحاول ديماً ينشر الطاقة الزوينة وسط اللي دايرين بيه.

دخل عليه واحد من الموظفين.

- أستاذ إياد، الاجتماع جاهز.

دار ليه إياد بابتسامة.

- انا جاي.

سد الجاكيت ديالو وخرج.

أول ما دخل لقاعة الاجتماعات، وقف واحد من الموظفين وقال وهو كيضحك:

- ها هو الشخص اللي غادي ينقذنا اليوم.

ضحك إياد.

- مترفعوش سقف توقعاتكم بزاف، راه إلى طحت غادي نلومكم.

تعالت الضحكات داخل القاعة.

كان هاد هو إياد.

حتى فالضغط...

كان كيعرف كيفاش يخفف الجو.

---

بعد ساعة تقريباً...

سالا الاجتماع بنجاح.

خرج إياد وهو كيهضر مع واحد من الموضفين .

وفجأة...

وقف وسط الكلام.

حط يدو على راسو.

غمض عينيه لثواني.

تنفس ببطء.

- أستاذ إياد؟

حل عينيه بسرعة، وابتسم.

- غير شوية دوخة... ما كاين والو.

- متأكد؟

- متأكد.

كمل المشي وكأن حتا شي حاجة ما وقعات.

ولكن من الداخل...

كان عارف هاد الإحساس مزيان.

من سنوات وهو كيجيه بين الحين والاخر.

وكل مرة كيقول فنفسو:

"غادي يفوت "

---

فالعشية...رجع للفيلا أول ما دخل، سمع صوت الأم ديالو.

- إياد... جيتي؟

ابتسم.

- إييه، واش توحشتيني ؟

خرج الأب من المكتب وهو كيضحك.

- ساعة وهيا كتسناك فقاش تدخل .

قرب إياد وسلم عليهم.

كانت علاقتهم قوية.

ما كانش كيخبي عليهم أي حاجة...

إلا حاجة وحدة.

الألم اللي بدا كيجيه هاد الأيام كتر من قبل.

ما كانش باغي يقلقهم.

كلس معهم على طابلة، والحديث كان عادي.

ضحك، وسولهم على نهارهم، وسمع حكايات الأم بحال كل يوم.

ولكن وسط الضحك...

رجع داك الوجع مرة أخرى.

هاد المرة كان أقوى.

شد طرف طابلة بلا ما يحس.

تنفس بعمق.

لاحظ سي دريس التغيير.

- إياد... مالك؟

رفع راسو بسرعة، وابتسم ابتسامة صغيرة.

- غير صداع بسيط.

الأم شافت وجهو.

- وجهك شاحب.

- غير الإرهاق... غادي نرتاح ونولي بخير.

بقات كتشوف فيه، ولكن ما زادتش سولات.

أما هو...

فكان كيدعي غير حاجة وحدة...

أن النوبة تسالي قبل ما يحسو بيه.