الفصل الثالث: فخ العهد القديم

ليلى كانت واقفة بتبص للجذور اللي بدأت تلتف حوالين جسم أبوها زي التعابين، وصوت الشجرة كان بيزن في ودنها كأنه

آلاف الوشوشات المكتومة. لسه هتتكلم، لقت آريوس بيشدها لورا بعنف وهو بيرفع سيفه الأزرق اللي بدأ يطلع منه "شرار" أسود المرة دي.

​آريوس بصوت حاد وزي الرعد: "أوعي تصدقي اللي بتسمعيه يا ليلى! الشجرة دي مش عايزة بديل.. الشجرة دي عايزة 'الدمين' مع بعض. لو حد فينا دخل، التاني هيفنى في لحظتها.. دي خدعة من العهد القديم عشان يخلص من الحارس والوريثة في وقت واحد!"

​ليلى اتصدمت: "يعني إيه؟ يعني مفيش فايدة؟ يعني أبويا هيفضل كدة؟"

​آريوس ماردش عليها، بص للأرض اللي بدأت تتشقق وتطلع منها "جثث" قديمة، بس مش جثث عادية، دي كانت عبارة عن "حراس" سابقين للمقبرة، عيونهم مطفية وبيتحركوا كأنهم عرايس ماريونيت.

​آريوس بضحكة مريرة: "شايفة دول؟ دول اللي صدقوا كلام الشجرة قبل كدة. العهد مبيتكسرش بالتضحية يا ليلى.. العهد بيتكسر بـ 'التمرد'."

​آريوس بص لليلى نظرة أخيرة، وفجأة، غرز سيفه في الأرض بكل قوته، الشرار الاسود اللي في السيف بدأ ينسحب ويدخل في

الأرض، والزلزال اللي حصل المرة دي كان أقوى من أي مرة فاتت.

​آريوس صرخ بوجع: "ليلى! دلوقتي! الدم اللي في عروقك.. النبض اللي سرقته منك.. ارميه كله في الشجرة! ماتحاوليش تنقذي أبوكي، حاولي 'تخربي' السجن!"

​ليلى مكنتش فاهمة، بس حست بنبض قلبها بيزيد لدرجة إن صدرها كان هيتفرتك. حطت إيدها اللي عروقها منورة على جذع الشجرة، وبدل ما تديها حب أو تضحية، بدأت تطلع كل "الغضب" اللي جواها.. غضبها من الليلة اللي أبوها سابها فيها، وغضبها من آريوس اللي جرجرها لهنا، وغضبها من اللعنة دي.

​النور اللي طالع من إيدها اتحول من السماوي للون الأحمر القاني، وفي لحظة، الشجرة بدأت "تصرخ" بصوت بشري مرعب، والجذور اللي كانت ماسكة أبوها بدأت تتحرق وتسيح كأنها بلاستيك.

​الخطر هنا: الشجرة لما بدأت تتحرق، بدأت "تنهار" فوقيهم. آريوس مسك ليلى وضبطها تحت جسمه وهو بيحاول يصد الحجارة اللي بتقع، وفي وسط الفوضى دي، جسم أبو ليلى وقع من قلب الشجرة على الأرض.. بس مكنش بيتحرك.

​ليلى زقت آريوس وجريت على أبوها: "بابا! رد عليا!"

​آريوس قام وهو بينهج، وبص وراه لقى الحراس القدامى بدأوا يتحرروا من سيطرته وبدأوا يهجموا عليهم وهما "بيصرخوا" من الوجع بعد ما الشجرة اتحرقت.

​آريوس: "إحنا عملنا اللي محدش عمله قبل كدة.. كسرنا الشجرة، بس كدة فتحنا أبواب 'الجحيم' اللي تحت المقبرة.. ليلى، شيلي أبوكي، لازم نخرج من الممر ده قبل ما المقبرة تبلع نفسها!"

الغبار كان مالي المكان بعد انهيار الشجرة، وليلى كانت بتكح وهي ساندة أبوها اللي كان فاقد الوعي تماماً. بصت لآريوس اللي كان واقف بينهج وسيفه مطفي في إيده، وعينيها كانت بتطلع شرار غضب حقيقي.

​ليلى بصوت عالي وهستيري: "أنت كداب! أنت كنت عايز تورطني في لعبة مالهاش آخر! قولت لي لازم حد فينا يضحي بنفسه عشان التاني يعيش.. كنت عايزني أستسلم لمصيري وأنا خايفة، ولا كنت بتختبرني؟ أنت طلعت أرعب من المقبرة دي يا آريوس!"

​آريوس حاول يقرب منها ويمد إيده: "ليلى.. افهمي.. العهد كان لازم يتواجه بصدق عشان يتكسر، لو مكنتيش صدقتي إنك هتضحي، الشجرة مكنتش هتفتح.."

​ليلى قطعت كلامه وهي بتزقه بعيد عنها بكل قوتها: "ماتلمسنيش! أنت زيك زي اللعنة دي.. بتلعبوا بمشاعر الناس عشان أهدافكم. أنا جيت هنا عشان أنقذ أبويا، مش عشان أكون قطعة شطرنج في إيدك."

​ليلى شالت دراع أبوها وحملته على كتافها بجهد رهيب، وبدأت تمشي وسط الرماد وهي بتعرج من التعب، وكل خطوة كانت بتمثل وجع في صدرها لأن "نبض آريوس" اللي جواها كان بيضطرب مع غضبها.

​آريوس وقف مكانه وصوته فيه نبرة وجع: "هتروحي فين؟ المقبرة مابقتش مستقرة، والجحيم اللي انفتح تحتنا هياكلك أنتي وهو في ثانية!"

​ليلى ماردتش عليه، فضلت ماشية وهي بتنهج ودموعها نازلة من القهر، لحد ما فجأة رجلها خانتها من كتر التقل ووقعت على ركبها وهي شايلة أبوها. حاولت تقوم تاني وهي بتصرخ من العجز، لكن في لحظة، حست بإيدين قوية بتترفع من تحت باطها وبتبعد حمل أبوها عنها.

​آريوس شال الأب بـ إيد واحدة كأنه ريشة، وبالإيد التانية سند ليلى وقومها. ليلى حاولت تعافر وتزقه، بس هو كان ثابت زي الصخر.

​آريوس بصوت هادي وواطي جداً وهو باصص في عينيها: "أنا كدبت.. فعلاً. كدبت لأني كنت خايف لو قولتلك الحقيقة ماتقدريش تواجهي الشجرة بالقوة دي. أنا حارس مقابر يا ليلى.. مابعرفش أتعامل مع البشر غير بالخوف والعهود. بس وحياة كل نبضة قلب سرقتها منك، مكنتش عايز أشوفك بتنتهي جوه الشجرة دي."

​ليلى بصت له وهي بتنهج، وغضبها بدأ يهدأ قدام نظرة عينيه اللي كانت باينة فيها "كسرة" مكنتش متوقعة تشوفها في كيان زيه.

​آريوس كمل وهو بيقرب وشّه منها: "حقك تلوميني.. وحقك تمشي. بس مش هسيبك تشيلي الحمل ده لوحدك. أنا اللي بدأت معاكي الطريق، وأنا اللي هخرجك منه.. حتى لو هتسيبيني بعدها."

​آريوس عدل وضعية أبوها على كتفه، ومد إيده التانية لليلى وهو بيمسح دموعها بطرف صباعه برقة غريبة: "قومي يا ليلى.. المقبرة بتهد، ومفيش وقت للزعل دلوقتي. إحنا لازم نخرج لبر الأمان، وبعدها اعملي فيَّ اللي أنتي عايزاه."

​ليلى فضلت ساكتة لحظة، وبعدين حطت إيدها في إيده بضعف، ومشيوا سوا وسط الضلمة اللي بدأت تتلاشى مع أول خيوط فجر غريب طالع من بعيد.

كانوا ماشيين في ممر ضيق جدرانه بتعرق مية سودة، وصوت انهيار "شجرة

الأرواح" لسه بيسمع في الأرض تحت رجليهم كأنه زلزال بعيد. آريوس كان شايل أبو ليلى على كتفه وكأنه شايل جبل من الهموم، وليلى كانت ماشية جنبه، إيدها في إيده بس قلبها لسه شايل منه.

​فجأة، الممر خلص ولقوا نفسهم قدام "بوابة حديد" قديمة جداً، وراها كان باين خيال شجر النخيل والبيوت المهجورة بتاعة أطراف "دهشور". ليلى أول ما شافت النور الباهت بتاع الفجر، حست بقلبها بيدق فرحة: "البوابة! إحنا وصلنا

يا آريوس! هنخرج!"

​آريوس وقف مكانه، ومسك إيدها بقوة خلتها تلف وتنظر له. ملامحه في ضي الفجر كانت باينة متعبة، والدم الأزرق اللي على صدره نشف وساب أثر زي الوشم.

​آريوس بصوت واطي: "ليلى.. أنتي اللي هتخرجي. البوابة دي بتعدي اللي في عروقهم دم بشري بس. أنا لو خطيت بره السور ده، جسمي هيتحول لرماد.. أنا ملك المكان ده، والسجن بتاعي ملوش أبواب لبره."

​ليلى فرحتها انطفت في ثانية، وبصت له بذهول: "يعني إيه؟ يعني بعد كل ده هنسيبك هنا؟ أنت قولت إن قلبي بقى قلبك، يعني لو خرجت وأنت فضت هنا، هيفضل الوجع ده في صدري للأبد؟"

​آريوس نزل جسم أبوها بالراحة على الأرض قدام البوابة، وقرب من ليلى لحد ما مابقاش فيه بينهم غير أنفاس الفجر الباردة. حط إيديه الاتنين على وشها، وعينيه كانت بتلمع بنور أزرق حزين:

"الوجع ده هو اللي هيعرفك إن اللي عشتيه مكنش حلم. ليلى.. أنتي حررتي أبوكي، وكسرتي العهد.. وده أكبر نصر كنت أحلم بيه. خدي أبوكي واخرجي قبل ما الشمس تطلع، لأن لو الشمس لمستك وأنتي لسه هنا، اللعنة هترجع تطالب بيكي."

​ليلى كانت بتهز رأسها بالرفض ودموعها نازلة: "لأ.. مش هسيبك. أكيد فيه طريقة. أنت قولت إننا بقينا كيان واحد!"

​في اللحظة دي، أبو ليلى بدأ يفتح عينيه ببطء، وبص لآريوس وبعدين لبنته، وصوته طلع ضعيف بس صافي: "ليلى.. هو معاه حق. الحارس ملوش مكان وسط الأحياء.. ردت ليله بس يابابا هو دفع تمن حريتي بخلوده هو."

​آريوس ابتسم لليلى ابتسامة أخيرة، وزقها بالراحة ناحية البوابة:

"امشي يا ليلى.. وعيشي حياتك. وكل ما تحسي بقلبك بيدق زيادة من غير سبب، اعرفي إن 'آريوس' لسه بيفكر فيكي جوه ضلمته."

​آريوس شاور بإيده، والبوابة الحديد فتحت بصوت صرير يقطع القلب. ليلى كانت واقفة بين "الحياة" اللي بره، و"الخلود المظلم" اللي جوه مع آريوس.

ليلى كانت واقفة بتبص لآريوس وهي مش مستوعبة فكرة إنه هيفضل ورا البوابة، ومدت إيدها عشان تلمس الحديد، بس أول ما صوابعها قربت، طلع "شرار أسود" وريحة شياط قوية خلتها تسحب إيدها وتصرخ بوجع.

​آريوس بص لها بصدمة: "إيه ده؟ إزاي البوابة ترفضك وأنتي دمك بشري؟"

​ليلى بصت لإيدها، ولقت العروق المنورة باللون الأزرق بدأت تسودّ، والوجع اللي في صدرها زاد لدرجة إنها وقعت على الأرض وهي بتنهج: "آريوس.. أنا حاسة بنار في عروقي.. النبض اللي نقلته لي.. هو اللي مانعني أخرج؟"

​آريوس نزل على ركبته جنبها وهو بيحاول يفهم، وبص للسما اللي بدأت تشقشق بنور الفجر، وفجأة ملامحه اتغيرت للرعب الحقيقي:

"يا نهار أسود.. العهد القديم مكنش بينادي على بديل للأب بس.. العهد كان بيدور على 'حارس جديد' مع الحارس القديم. النبض اللي في عروقك يا ليلى مابقاش مجرد دم.. ده بقى 'قيد'. إحنا دلوقتي الاتنين مسجونين جوه، والبوابة دي مش هتفتح لنا غير لو رحنا لـ 'وادي الملوك المنسيين'.. أبعد نقطة في عالم المقابر."

​ليلى بصت له بذهول وهي ماسكة صدرها من الوجع: "يعني أنا مابقتش قادرة أخرج؟ وأبويا؟ هيفضل هنا يموت

بالبطء ده؟"

​أبو ليلى، اللي كان لسه فايق، بص لآريوس بغضب مكتوم: "أنت عملت فيها إيه يا آريوس؟ بنتي مكنش ليها ذنب في حروبكم دي!"

​آريوس قام وقف وبص للضلمة اللي بدأت ترجع تسيطر على المكان تاني رغم الفجر:

"أنا مكنتش أعرف إن قلبها هيقبل النبض بالقوة دي! ليلى مابقتش مجرد بشرية، هي دلوقتي 'نص حارسة'. وبدل ما نخرج من المقبرة، إحنا لازم ندخل لعمقها أكتر عشان نلاقي 'مفتاح الخروج' اللي ضاع من آلاف السنين."

​فجأة، سمعوا صوت "طبول" جاية من تحت الأرض، وصوت زحف ملايين الهياكل العظمية اللي بدأت تطلع من المقابر اللي حواليهم.

​آريوس سحب سيفه اللي رجع ينور بقوة:

"استعدي يا ليلى.. الفصل اللي فات كان لعب عيال. المقبرة عرفت إننا كسرنا الشجرة، ودلوقتي بعتت لنا 'جيش الظلال'. إحنا مش هنخرج للفيوم ولا لدهشور دلوقتي.. إحنا داخلين لـ 'دهاليز الموت'!"

​ليلى وقفت ببطء، ومسكت الفانوس اللي لونه اتحول للون الأرجواني الغريب، وبصت لآريوس بتحدي رغم الخوف:

"طالما كدة كدة محبوسة.. يبقى اللي هيقرب من أبويا أو منك، همحيه من الوجود."

الأرض بدأت تتشقق تحت رجليهم، وطلع منها "دخان أسود" كثيف بدأ يتشكل على هيئة محاربين طوال جداً، من غير وشوش، ماسكين رماح مصنوعة من عضم بشري بيلمع في الضلمة. صوت الطبول كان بيضرب في دماغ ليلى كأنه زلزال.

​آريوس وقف قدام ليلى وأبوها، وزأر بصوت هز الممر: "ليلى! امسكي الفانوس وارفعيه للسما.. النور اللي جواه دلوقتي مش نار، ده 'روحك'.. لو خفتي، النور هيطفي والظلال هتاكلنا!"

​واحد من محاربي الظل هجم بسرعة البرق، آريوس صد ضربته بسيفه، بس المحارب كان قوي جداً وزق آريوس لورا. ليلى شافت محارب تاني بيقرب من أبوها اللي كان لسه بيحاول يسند طوله.

​من غير تفكير، ومن كتر الرعب على أبوها، ليلى صرخت صرخة دوت في المكان كله، وحست بحرارة مرعبة بتجري من قلبها لإيدها اللي ماسكة الفانوس. وفجأة، الفانوس انفجر منه "شعاع أرجواني" شق الضلمة زي السكينة، وضرب محارب الظل فحولّه لرماد في ثانية.

​آريوس بص وراه بذهول وهو بيقطع راس محارب تاني: "عاش يا ليلى! بس ما تستهلكيش طاقتك كلها.. لسه فيه مئات منهم جايين!"

​الظلال بدأت تحاوطهم من كل جهة، والمكان بدأ يضيق. ليلى حست بضعف، وركبتها بدأت تخبط في بعضها، الشعاع اللي طلع منها سحب قوتها. آريوس شافها وهي بتترنح، فجحر في الظلال وصنع "دايرة من النار الزرقاء" حواليهم عشان يعطلهم ثواني.

​آريوس قرب من ليلى، ووشه كان مليان عرق وتراب، مسك إيدها اللي كانت بتترعش وهمس لها بصوت حاد بس فيه حنية:

"بصي لي يا ليلى.. ما تبصيش ليهم. النبض اللي بيني وبينك مش بس وجع، ده 'مخزن طاقة'. خدي من نبضي أنا.. افتحي عقلك ليا واسحبي من قوتي."

​ليلى غمضت عينيها، وحست فعلاً بخيط من الطاقة الباردة بيتنقل من إيد آريوس لجسمها. حست بإنها بقت أقوى، وبصت للظلال بنظرة تحدي مرعبة مكنتش موجودة فيها من ساعة واحدة.

​ليلى بصوت قوي: "أنا مش هسمح للمكان ده ياخد مني حاجة تانية.. ولا أبويا، ولا حتى أنت!"

​ورفعت الفانوس تاني، بس المرة دي النور مطلعش عشوائي، ده طلع على هيئة "درع" كبير حوطهم هما التلاتة، وبدأوا يتحركوا وسط جيش الظلال وهم بيحرقوا أي حاجة تلمس الدرع ده.

​آريوس وهو بيفتح طريق بالسيف: "قدامنا فتحة 'سرداب التوابيت المنسية'.. لو دخلنا هناك، الظلال مش هتقدر تتابعنا لأن المكان ده محرم عليهم.. اجري يا ليلى!"

​ليلى كانت بتجري وهي سانده أبوها، وآريوس بيحمي ضهرهم، لحد ما نطوا كلهم جوه فتحة ضيقة في الأرض، والفتحة قفلت وراهم ب صخرة ضخمة، وساد الهدوء التام.. هدوء مخيف مسموع فيه بس صوت أنفاسهم المقطوعة.

يتبع..

تابع حسابي وادعمني بـ لايك وكومنت ليصلك كل جديد 📖🖤