الفصل الثاني: حضن الظلام

الضلمة مكنتش عادية، كانت تقيلة لدرجة إن ليلى حست إنها بتغرق في مية سودة. حاولت تصرخ بس صوتها مطلعش، وكأن الهوا نفسه اتسحب من المكان. الحاجة الوحيدة اللي كانت حاسة بيها هي إيد "آريوس" اللي لسه قابضة على دراعها بقوة، وبرودتها كانت هي اللي مخلية ليلى حاسة إنها لسه موجودة.

​فجأة، بدأت خيوط نور أزرق رفيعة تظهر من تحت رجليها، وبدأ النور يفرش في المكان لحد ما كشف عن "قاعة" أغرب من الخيال. مكنتش قاعة في سرداب، دي كانت كأنها "قصر" منحوت جوه جبل من المرمر الأسود. الحيطان كانت بتلمع كأنها مرايات، والسقف كان عالي جداً ومنقوش عليه نجوم بتتحرك وكأنها سما حقيقية.

​ليلى سابت دراع آريوس وبدأت تتلفت حواليها برعب: "إحنا فين؟ وأبويا.. هو لسه في البير؟"

​آريوس كان واقف وراها، عبايته السودة كانت بتمسح الأرض وراه، وشكله في النور الأزرق ده كان مهيب ومرعب أكتر.

آريوس بصوت هادي: "إحنا في 'عرش الصدى'.. المكان اللي اللعنة مابتقدرش تدخله. هنا، أنتي في حمايتي.. بس برا السور ده، أنتي ملك للمقبرة."

​ليلى بصت له بعيون مليانة دموع: "أبويا

قالي ارمي الفانوس وتعالي.. كان عايزني أموت يا آريوس؟"

​آريوس قرب منها بخطوات بطيئة، وكل خطوة كان ليها صدى مرعب في القاعة:

"أبوكي مش عايز يموتك، أبوكي 'جوعان'. اللي بيتحول لصدى بيفضل يحس بجوع لروحه اللي ضاعت، وأنتي أقرب روح لروحه. هو مش بينادي عليكي عشان يضمك.. هو بينادي عليكي عشان 'ياكلك' ويرجع بني آدم تاني."

​ليلى جسمها اتنفض من الكلمة، وحست بكسرة قلب ملوش وصف. آريوس شاور بإيده، وظهر كرسي ضخم منحوت من خشب قديم وعليه فرو غريب:

"اقعدي.. أنتي محتاجة تفهمي العهد اللي أبوكي مضى عليه. السلالة بتاعتك يا ليلى، مش بس حراس.. أنتم كنتم 'سجانين' لينا من مئات السنين. والعهد بيقول إن السجان لازم يدفع التمن لو فكر يفتح الباب."

​ليلى قعدت وهي مش حاسة بجسمها، وسألت بهمس: "والتمن هو قلبي؟ زي ما قولت تحت؟"

​آريوس وقف قدامها بالظبط، ووطى لمستوى وشها، وعينه الزرقاء كانت بتلمع بشوق غريب:

"قلبك ده هو 'المفتاح'.. لو نبض ليا، اللعنة هتتكسر وأبوكي هيرتاح. ولو فضل ينبض للبشر اللي بره.. المقبرة هتاخده وتآخدك معاه."

​ليلى بصت في عينيه، وحست لأول مرة

بـ "جاذبية" تخوف، وكأن في مغناطيس بيشدها لآريوس رغم الرعب اللي فيه: "يعني إيه ينبض ليك؟ أنت عايزني أحبك؟"

​آريوس ضحك ضحكة قصيرة ومرة: "الحب ده كلام للي بيمشوا تحت الشمس.. أنا عايز 'ولاءك'. عايزك تكوني ملكي، جسد وروح، مقابل إن أبوكي ميفضلش وحش للأبد."

​فجأة، سمعوا صوت "خبط" قوي على بوابات القاعة من بره، وصوت ريح عاتية بتصفر، وكأن في جيش بيحاول يقتحم المكان.

​آريوس وشه اتغير وبقى شاحب: "الصدى مش هيسكت.. أبوكي جاب 'حراس العهد القديم' وجايين يطالبوا بدمك."

الهجوم بدأ، والصوت اللي بره مكنش مجرد خبط، ده كان صوت زئير بيخلي حيطان القاعة تترعش، وكأن الجبل نفسه بيحاول يطبق عليهم.

آريوس عينه نورت بلون أزرق فوسفوري مرعب، وطلع من إيده سلاح غريب.. سيف طويل كأنه مصنوع من برق متجمد. بص لليلى وقال بصوت ملوش نقاش: "ادخلي ورا العرش ده وما تطلعيش مهما سمعتي.. لو لمحوكي، مفيش قوة في الأرض هتقدر تمنعهم عنك."

​ليلى كانت بتترعش، جرت استخبت ورا الكرسي الضخم وهي بتسمع صوت "تكسير" البوابات. وفجأة، الباب الحديدي العملاق انخلع من مكانه وطار في نص القاعة كأنه ورقة.

​دخلوا "حراس العهد القديم".. أشكالهم كانت تجمد الدم في العروق. مكنوش بني آدمين ولا جن، كانوا عبارة عن "هياكل" من الضباب الأسود، ملامحهم ممسوحة، ولابسين دروع صدية متهالكة. وفي وسطهم، كان فيه خيال "أبو ليلى" اللي لسه محتفظ بملامحه بس عينه كانت فاضية تماماً وبتطلع دخان أسود.

​أبو ليلى بصوت ميت: "آريوس.. سلمنا البنت.. العهد لازم يكمل.. الدم لازم يسيل عشان السجن يفضل مقفول."

​آريوس وقف قدامهم كأنه سد منيع، ورفع سيفه اللي كان بيطلع شرار أزرق: "العهد انكسر يوم ما سحبتوا روح واحد بريء عشان يخدم قذارتكم. البنت دي دخلت حمايتي، واللي هيقرب منها، هقطعه لمليون صدى."

​واحد من الحراس هجم بسرعة البرق على آريوس، وبدأت ملحمة قتالية ليلى مكنتش مصدقة إنها بتشوفها. آريوس كان بيتحرك بخفة خرافية، سيفه كان بيقطع في الضباب الأسود وكأنه بيقطع في قماش، ومع كل ضربة كان بيطلع صوت صرخة توجع الودن.

​ليلى من ورا العرش، عينها جت في عين أبوها. شافت في عينه لحظة "ضعف" أو "رجاء"، وكأنه محبوس جوه الكيان الأسود ده وبيستغيث بيها. ليلى من غير تفكير، لقت نفسها بتسيب مكانها وبتقوم: "بابا! اخرج من وسطهم! أنت مش زيهم!"

​آريوس صرخ وهو بيصد ضربتين في وقت واحد: "ارجعي يا ليلى! ده مش أبوكي! ده فخ!"

​بس كان الوقت فات.. الخيال اللي شبه أبوها مد إيده الطويلة اللي اتحولت لمخالب سودة، وكان هيخطف ليلى، لولا إن آريوس رمى سيفه في الهوا وشق طريق وسط الحراس ورمى جسمه قدام ليلى.

​المخالب السودة "شرخت" صدر آريوس، ووقع على ركبته وهو بينزف "دم أزرق" بيلمع وسط الضلمة. الحراس وقفوا مرة واحدة لما شافوا دم "الحارس" بيسيل على الأرض، وكأنهم استنوا اللحظة دي من سنين.

آريوس وقع على ركبته، والدم الأزرق اللي بيلمع بدأ يسيل من صدره ويغرق الأرض. ليلى رمت نفسها جنبه، إيدها بترتعش وهي مش عارفة تعمل إيه. الحراس والكيان اللي شبه أبوها وقفوا يتفرجوا بشماتة، وكأنهم مستنيين اللحظة اللي "الحارس" يضعف فيها.

​ليلى بصوت بيقطع من العياط: "ليه عملت كدة؟ أنت قولت إنك عايزني ملكك.. مش تموت عشاني!"

​آريوس مسك إيدها اللي كانت بتحاول تغطي جرحه، وضغط عليها بقوة خلتها تبص في عينه الزرقاء اللي كانت بتلمع بوجع مهيب.

آريوس بنهجة مكتومة: "أنا قولتلك تحت.. في السرداب.. إن قلبك لازم يوقف نبض للبشر، ويبدأ ينبض ليا.. فاكرة؟"

​ليلى هزت راسها وهي مش فاهمة، فكمل آريوس وصوته بيضعف:

"اللي حصل دلوقتي مكنش تضحية.. ده كان 'العهد'. لما رميت جسمي قدام الضربة، أنا ربطت حياتي بحياتك رسمي. دمي اللي سال ده هو اللي نقل 'النبض' ليكي. من اللحظة دي، أنا ماليش قلب ينبض يا ليلى.. قلبي بقيتي أنتي. لو قلبك وقف من الخوف، أنا هفني.. ولو دمي اللي في عروقك دلوقتي برد، المقبرة هتاكلنا إحنا الاتنين."

​ليلى بصت لإيدها، وشافت الدم الأزرق وهو "بيتسحب" جوه جلدها، وعروق إيدها بدأت تنور بلون سماوي هادي، وحست بضربة قلب قوية جداً في صدرها هزت كيانها كله، ضربة مكنتش تخصها، كانت ضربة قلب "آريوس".

​أبو ليلى (الخيال الأسود) زعق بصوت يهز الجبال: "غلطت يا آريوس! ربطت روحك ببشرية فانية؟ كدة موتك بقى أسهل مما نتخيل!"

​آريوس ابتسم ابتسامة تحدي رغم الألم، وبص لليلى وقال لها بهمس مرعب:

"وريهم يا ليلى.. وريهم إن النبض اللي سرقته منك مابقاش مجرد شعور.. ده بقى 'سلاح'. ارفعي إيدك يا ملكة المقابر.. واطرديهم بره بيتي!"

​ليلى حست بطاقة غريبة بتجري في جسمها، طاقة باردة وسخنة في نفس الوقت. قامت وقفت ببطء، وعينها بدأت تلمع بنفس لون عين آريوس. رفعت إيدها اللي عروقها منورة، وفي ثانية، طلع منها "موجة" من الضوء الأزرق خبطت في الحراس وفي خيال أبوها، وكأنها إعصار من النور طردهم بره القاعة وقفل البوابة وراهم بـ ١٠٠ قفل سحري.

​القاعة رجعت هادية، وليلى وقعت على ركبتها وهي بتنهج، وبصت لآريوس اللي كان مغمض عينه وجسمه بدأ يبرد: "آريوس.. قوم.. قلبي لسه بينبض، يعني أنت لازم تعيش.. قوم عشان خاطري."

الهدوء اللي ساد القاعة بعد انفجار النور كان مرعب، مفيش غير صوت أنفاس ليلى العالية وصوت "تكتكة" النار الزرقاء اللي بدأت تخمد في المشاعل اللي على الحيطان. ليلى بصت لآريوس اللي كان ممدد قدامها، وشه اللي كان دايماً بيبان قاسي ومهيب، دلوقتي بقى هادي وشاحب زي الرخام، والجرح اللي في صدره لسه بيطلع منه بخار أزرق خفيف.

​ليلى قربت منه ببطء، ومدت إيدها المرتعشة ولمست كتفه: "آريوس.. قوم.. أنت قولت إن قلبي بقى قلبك، وأنا قلبي هيقف من الرعب.. قوم عشان خاطر النبض اللي بينا."

​فجأة، ليلى حست بوجع غريب في صدرها، نغزة قوية خلتها تتني ضهرها. الوجع مكنش طالع منها، ده كان "صدى" للألم اللي آريوس بيحس بيه. في اللحظة دي فهمت إن "العهد" مش مجرد كلام، دي بقت رابطة دم حقيقية.

​غمضت عينيها وحاولت تفتكر كلام أبوها عن "علاج الجروح اللي مابتخفش". افتكرت إنه كان بيقول إن دم الحراس مابيطهرش غير بـ "نفس بشري صافي".

​ليلى وطت على آريوس، وحطت إيدها اللي عروقها لسه منورة فوق جرحه، وغمضت عينيها بكل قوتها. بدأت تتخيل إن الوجع اللي في صدرها بيتنقل لإيدها، ومن إيدها بيرجع لجسم آريوس بس "صافي" من الخوف.

​ليلى بهمس: "مش هسيبك تضيع.. مش بعد ما بقيت الحاجة الوحيدة اللي رابطاني

بالحياة هنا."

​الجرح بدأ يلم ببطء، والنور الأزرق بدأ يرجع يملى عروق آريوس تاني. وفجأة، آريوس فتح عينه مرة واحدة ومسك إيد ليلى بقوة خلتها تتخض. عينه مكنتش زرقاء بس، دي كانت "بتشرق" بنور غريب، وبص لها بنظرة خلت روحها تتسحب منه.

​آريوس بصوت مبحوح: "أنتي عملتي إيه؟ أنتي كدة ثبتي العهد للأبد.. مابقاش ينفع ترجعي بني آدمة كاملة تاني يا ليلى."

​ليلى بصت له بتحدي ودموعها في عينيها: "مش مهم.. المهم إنك قمت. وبعدين، مين قال لك إن العالم اللي بره لسه فيه حاجة تخليني عايزة أرجع بني آدمة كاملة؟ أنا ماليش غيرك هنا.. أنت وأبويا اللي معرفش هو راح فين."

​آريوس قام وقف بصعوبة، وسند على دراع ليلى، وبص للبوابة اللي الحراس لسه بيخبطوا عليها من بعيد:

"أبوكي مابعدش.. هو مستني بره. والضربة اللي ضربها لي دي مكنتش منه.. دي كانت من 'اللعنة' اللي ساكنة جسمه. ليلى.. إحنا لازم نخرج من القصر ده ونروح لـ 'شجرة

الأرواح'.. هناك بس نقدر نفصل روح أبوكي عن العهد القديم، بس الطريق هناك كله فخاخ من ماضيكي أنتي."

​ليلى استغربت: "ماضيَّ أنا؟ أنا أول مرة أدخل هنا!"

​آريوس ابتسم ابتسامة غامضة وهو بيصلح عبايته السودة: "المقبرة دي مش بس مدافن.. دي مخزن لكل ذكرى حزينة عشتيها. والشجرة مش هتفتح لنا غير لو واجهتي أكتر ذكرى أنتي هربانة منها.. ذكرى الليلة اللي أبوكي سابك فيها."

​مد إيده ليها تاني، بس المرة دي مكنش بيأمرها، كان بيطلب مساعدتها: "هتقدري تواجهي يا ليلى؟ ولا النبض اللي بينا هيضعف؟"

​ليلى حطت إيدها في إيده بقوة:

"طول ما أنت معايا.. مفيش حاجة هتضعف."

آريوس فتح بوابة جانبية في القاعة، بوابة مكنتش موجودة من دقيقة واحدة، كأنها ظهرت من العدم بمجرد ما إيد ليلى لمست إيده. ورا البوابة مكنش فيه سرداب ولا قاعة، كان فيه ممر طويل من الشجر الميت اللي فروعه مشبكة في بعضها زي القفص، والأرض مغطاة برماد أبيض ناعم بيطير مع كل خطوة.

​آريوس بصوت حذر: "الممر ده اسمه 'طريق الصمت'. طول ما إحنا ماشيين، هتسمعي أصوات ناس عارفاهم، وهتشوفي خيالات من حياتك اللي فاتت. أوعي تقفي، وأوعي تسيبيني.. لو سبتي إيدي هنا، الرماد ده هيتحول لمرملة تبلعك في ثانية."

​ليلى بدأت تمشي معاه، ورجليها بتغرس في الرماد البارد. فجأة، الهوا بدأ يهمس باسمها.. مش همس مرعب، ده كان صوت "ضحكة" طفلة صغيرة، وصوت "خبطة" معلقة في طبق، وريحة "أكل" بيتي دافي كانت بتملى المكان.

​ليلى وقفت لحظة، عينيها وسعت: "ده صوتي وأنا صغيرة.. ودي ريحة بيتنا القديم."

​آريوس شد على إيدها بقوة لدرجة وجعتها: "ما تسمعيش! دي مش ذكريات، دي فخاخ بتسحب طاقتك عشان تغذي الشجر ده. بصي قدامك يا ليلى!"

​لكن الضباب قدامهم بدأ يتشكل، وظهرت صورة "أبوها" بس وهو لابس هدوم الخروج وشايل شنطته، واقف قدام باب بيتهم في ليلة شتوية بتمطر. كان بيبص وراه بوجع، ودموعه نازلة وهو بيقول: "سامحيني

يا ليلى.. كان لازم أمشي عشان تعيشي."

​ليلى سابت إيد آريوس من غير ما تحس، وطلعت تجري ناحية خيال أبوها: "بابا! استنى! ما تمشيش تاني وتسبني!"

​آريوس صرخ بصوت هز الممر كله: "ليلى! لأ!"

​أول ما ليلى قربت من الخيال، وشه اتحول في ثانية لجمجمة سودة، وطلع من بقه دخان كثيف لف حوالين رقبتها وبدأ يخنقها. الرماد تحت رجليها بدأ يتحول لإيدين صغيرة بتشدها لتحت الأرض.

​في اللحظة اللي ليلى كانت بتفقد فيها الوعي، حست بدراع آريوس القوي بيحوطها، وسيفه الأزرق بيشق الضباب الأسود لنصين. آريوس شالها وضمها لصدره بقوة، ووشوش في ودنها وصوته كان مليان غضب وخوف حقيقي:

"أنا قولتلك قلبك بقا قلبي! لما بتضعفي كدة أنتي بتموتيني معاكي! فوقي يا ليلى.. الحقيقة ماتت، ومفيش غيرنا هنا!"

​ليلى فتحت عينيها، ولقت نفسها في حضن آريوس، والدم الأزرق اللي في عروق إيدها بدأ يغلي ويطلع حرارة دفت جسمها كله. بصت في عينه وشافت "لهفة" مكنتش موجودة قبل كدة، لهفة كيان خايف يخسر الأمل الوحيد اللي حسه من قرون.

​آريوس بص قدامه، وشاور بالسيف لآخر الممر، حيث ظهرت شجرة ضخمة جداً، ورقها مش أخضر، ورقها عبارة عن "كريستالات" شفافة بتلمع بنور أبيض بيخطف العين.

​آريوس بهمس مهيب: "وصلنا.. شجرة الأرواح. بس عشان توصلي لروح أبوكي اللي محبوسة جوه الجذور، لازم تدفعي التمن الأخير للعهد القديم."

​ليلى بصت له بتحدي وهي لسه في حضنه: "إيه هو؟"

​آريوس نزلها بالراحة، ووقف قدام الشجرة، وقال وهو مديها ضهره:

"العهد القديم بيقول: 'عشان تخرج روح من الموت، لازم روح تانية تدخل مكانها'. يعني عشان أبوكي يخرج ويمشي في نور الشمس.. لازم حد فينا يفضل هنا 'حارس'

للأبد.. يا أنا.. يا أنتي."

​وفجأة، الشجرة نورت نور قوي جداً، وصوت جرس عالي رن في المكان، والسمـا فوقيهم انشقت وبان منها خيال "أبو ليلى" وهو بيصرخ صرخة أخيرة قبل ما الجذور تسحبه لجوه.