الفصل السادس: في حضرة المدير

طول الأسبوع اللي سبق الفرح، كان القصر بيتحول لساحة احتفالات، بس داخل أروقة الشركة، الجو كان مختلف تماماً. مراد العزايزي كان حاسم، سحب من ليلى جزء كبير من صلاحياتها، وحطها "تحت التدريب" المباشر لياسين السيوفي.

​ياسين كان بيتعامل معاها بمنتهى الجدية اللي بتوصل للبرود. ماكانش بيشوفها "صاحبة شركة"، كان بيشوفها "متدربة" متهورة محتاجة تتأدب.

​يوم التلات، ليلى دخلت مكتب ياسين، كانت حاطة ملفات الصفقة الأخيرة على مكتبه، صوت الكعب بتاعها كان بيخبط في الأرضية، بس ياسين حتى ما رفعش عينه من اللاب توب.

​"التقارير اللي طلبتها يا ياسين." قالتها ليلى وهي بتحاول تفرض وجودها.

​ياسين سحب الملفات، قلب الصفحات بهدوء قاتل، وبعدين رماهم على المكتب ببرود: "التحليل ده سطحي جداً يا ليلى. الصفقة دي لو مشيت بالطريقة دي، الشركة هتخسر سمعتها قبل فلوسها. إنتي لسه بتفكري بعقلية 'الهاوية'، مش بعقلية حد بيدير كيان بحجم العزايزي."

​ليلى وشها احتقن بالدم: "أنا شايفة إن التحليل منطقي، والظروف الحالية للسوق..."

​قاطعها ياسين بصوت هادي بس حاد زي السكينة: "أنا مش بسأل عن رأيك، أنا بسأل عن نتايج. وأنا هنا عشان أعلمك إزاي توصلي للنتايج دي، مش عشان أسمع مبررات."

​بص لها نظرة سريعة، نظرة فيها عتاب خفي على "قلة الأصل" اللي حصلت قدام جده، وكمل ببرود: "وبما إننا في الشركة، فخلينا نركز في الشغل. بلاش تخلطي المشاكل الشخصية ولا 'ردود الأفعال الصبيانية' اللي حصلت في بيت جدك بشغلك هنا. أنا مش مجبر أتحمل خيبات أملك في حياتك الشخصية خلال ساعات العمل."

​ليلى سكتت، حست إن الكلام كان موجه لكرامتها أكتر من شغلها. "إنت بتقول كدة عشان جدي أجبرك عليا؟"

​ياسين ساب اللاب توب، وسند بضهره لورا، وبص لها بثبات غريب: "أنا هنا عشان أنفذ اتفاق مع مراد العزايزي، وده شغلي. إنتي بالنسبة لي دلوقتي "مشروع" مطلوب مني أطلعه للعالم صح قبل ما تلبسي فستان الفرح.. فستان الفرح ده بالنسبة لي "إجراء" هتممه يوم الخميس، زي أي صفقة تانية.. ما يهمنيش تحبيه أو تكرهيه."

​قام وقف، خد الجاكت بتاعه، وعدى من جنبها وهو بيقول بصوت واطي: "خلصي التقرير ده، وعاوز نسخة جديدة على مكتبي قبل ما تمشي.. وده تكليف، مش طلب."

​خرج وسابها في المكتب، كانت حاسة إنها بتتحول لأصغر كائن في الشركة، وياسين اللي كان بيسندها ويشيلها من أسبوع، بقى دلوقتي هو "السجان" اللي بيحاصرها في مواعيد الشغل والالتزامات

نزلت وراه بخطوات سريعة للممر، وصوت كعبها بيخبط في الرخام كأنه رصاص: "استنى هنا! إنت بتديني أوامر بأنهي صفة؟ إنت موظف عندي.. ما تنساش نفسك!"

​ياسين وقف مكانه، ببطء شديد لف وشه ناحيتها، عيونه كانت باردة بشكل يخلي الواحد يرتجف. اتنهد وقال ببرود: "مفيش مشكلة يا ليلى. لو ده اللي يريحك ويخليكي تشتغلي من غير ما تتناقشي في كل كلمة.. ممكن أبلغ مراد بيه دلوقتي، وتخدي أوامرك منه هو شخصياً.. هو اللي يحددلك جدولك، وهو اللي يراجع وراكي."

​ليلى اتنرفزت، الدم جري في عروقها، وقالت بصوت عالي وعصبية: "إنت بتهددني يا ياسين؟ بتهددني بأبويا؟"

​ياسين قرب منها خطوة واحدة، وسع المكان حواليها وبقت هي محاصرة بينه وبين الحيطة، صوته كان واطي بس تقيل: "لا.. مش تهديد. بس أنا راجل بيحب يخلص شغله بأحسن صورة. لو هتعطلي مصلحة الشغل بحجة إنك 'متضايقة' إني بوجّهك، فخلاص، خلينا نرجع لأصل الموضوع: خدي أوامرك من صاحب الشركة.. مراد بيه."

​ليلى حست بمرارة في حلقها، وانهارت دفاعاتها وقالت بضعف خفي: "إنت عارف كويس.. إنت عارف إن بابا هو اللي غصبني عليك عشان تدربني، وهو اللي غصبني عشان نتجوز. إنت ليه مستسلم لكل ده؟ ليه مش راجل وتدخل تقولهم إحنا مش مناسبين لبعض؟ ليه مش راجل وتنهي المهزلة دي وتريحنا من بعض؟"

​ياسين سكت فترة، سكون خلاها تحس إنها كشفت جزء كبير من ضعفها قدامه. بص في عيونها مباشرة، ملامحه كانت خالية من أي تعبير، وفجأة قال: "مقدرش أرفض.. لأسباب كتير."

​ليلى بصتله باستنكار: "أسباب إيه؟"

​ياسين كمل ببرود: "من ضمنهم شكلك قدام الناس، وفرحك اللي بيبوظ قبلها بيومين.. إنتي متخيلة الفضيحة هتبقى عاملة إزاي؟ الناس مش هترحمك، ولا هترحم اسم العزايزي."

​سكت لحظة، وكأنه بيدرس تأثير كلماته عليها، وبعدين ارتسمت على وشه ابتسامة جانبية غامضة، ابتسامة خالية تماماً من أي دفء، وقال بصوت هامس ومخيف: "ده سبب واحد من الأسباب.. وبعدين، مبروك يا عروسة."

​سابها واقفة في الممر، مذهولة من بروده،