الفصل العشرون .... حكايتي أولها رصاصة

(وكيل النيابة) لا ياحاجة أنا هبعث لنفسي الرسالة دي وكمان هعمل لقطة شاشة للفون ولو سمحتي عشان متحفظش على التليفون كدليل حافظي على الرسالة وعلى الفون وده رقم معاذ اللي جت منه الرسالة صح

(أم معاذ) أيوة رقم ابني معاذ تمام حاضر حضرتك فيه حاجة ثاني ولا أروح

(وكيل النيابة) وقعي على أقوالك واتفضلي مع السلامة بس ليا طلب شخصي من حضرتك

(أم معاذ) خير يا فندم

(وكيل النيابة) مش عاوز حد حتى لو أقرب الناس لك يعرف أي حاجة عن الموضوع ده لو سمحتي

(أم معاذ) حاضر يافندم

صوت خطوات وباب يغلق

(وكيل النيابة) لازم أروح أقعد شوية مع الباشا رئيس المباحث ونوضع خطوط نكمل عليها موجها كلامه لكاتب الجلسة اقفل يابني المحضر على ذلك وابعث أستدعاء للسيدة نادية السيد أم امل

(كاتب الجلسة) تمام يافندم

صوت خطوات وعم سالم بيحضر القهوة في مكتب الأستاذ رامي

(الأستاذ رامي) اقعدي ياحاجة نوزن دماغنا بقهوة عم سالم ونشوف حكاية محمد أخو أمل يبقى أخو معاذ جوزها ازاي نفهم الحكاية

(أم أمل) هقول لحضرتك مش حضرتك عرفت أن رياض اللي بتقولوا عليه الباشا ده يبقي الأب الحقيقي لمحمد

(الأستاذ رامي) لحد دلوقت تمام ايه حكاية معاذ ده بقى

(أم أمل) معاذ هو كمان ابن رياض باشا

(الأستاذ رامي) آه يعني محمد ومعاذ ولاد رياض لكن الأمهات مختلفين

آه كده فهمت دأنا دماغي زنت من كلامك والله الحمد لله

(أم أمل) هو حضرتك فهمت أيه غير كده!

هو ينفع كنت أسيب أمل تتعرف على معاذ من صغرها وتحبه وكمان كان قاعد ليل نهار عندنا مع محمد وأنا عارفة أنهم ممكن يكونوا في علاقة محرمة

(الأستاذ رامي) وحضرتك عرفتي ازاي أن محمد ومعاذ أخوات

(أم أمل) هقول لحضرتك أم معاذ جارتي ومعاذ ومحمد كانوا مع بعض في المدرسة

وكانوا بيجو أذاكر لهم مع بعض إنجليزي حضرتك عارف أنا أصلا مدرسة أنجليزي المهم في يوم معاذ طلب مني أوقع شهادة الشهر بتاعة الدرجات بتاعته بدل مامته عشان كان درجاته وحشة في العربي مع أنه ماشاء الله تبارك الله ممتاز جدا في اللغة الإنجليزية ولما قلت له خلي بابا يوقعها وأقنعه ميقولش لماما وأوعده أنك بإذن الله هتعوض الدرجات دي الشهر الجاي الولد عيط وانهار في العيط ومحمد زعل مني عشان كنت سبب إن صاحبه ينهار بالشكل ده مع إني معرفش هو عيط ليه المهم فهمت من معاذ أن أبوه طلق مامته من زمان وأنه حتى ميعرفش شكله أيه

(المحامي رامي) وعملتي أيه حضرتك

(أم أمل) ولا حاجة عشان أصالحه وافقت أني أوقع باسم مامته المرة دي لكن يوعدني يتشطر والمرة الجاية مامته توقع له فوافق وفرح جدا وأخدت الشهادة عشان أوقعها وأول حاجة وقعت عيني عليها أسمه بالكامل معاذ رياض الفولي

كنت هقع من طولي لولا مسكت في الترابيزة وحتى محمد لاحظ وكمان معاذ والولد لأنه حساس قالي خلاص ياطنط مش مهم توقعي خلاص أنا هوديها لماما واضرب منها وخلاص وعلقة تعدي

(الأستاذ رامي) ووقعتي الشهادة

(أم أمل) أيوة وقعتها

بس الفضول كان هيقتلني عشان كده روحت زورت أم معاذ من غير موعد وبصراحة الست رحبت بيا جدا رغم استغرابها من الزيارة وقلت لها أنا جاية اتعرف عليك عشان محمد ابني صاحب معاذ ابنك وأنهم حبايب جدا ومش بيفارقوا بعض خالص وحبيت أطمنها أن معاذ ابنها في عنيا زي محمد بالظبط وكمان حكيت لها حكاية توقيع الشهادة واستحلفتها بالله ما تقول لمعاذ وتعدى الموقف وتقرب منه أكثر عشان لا يخبي عنها شيء مرة ثانية

وهنا الست انهارت في البكاء وكأني دوست على الجرح وقالت طيب ا زاي أقرب منه ولا أخد بالي منه اكثر وأنا له أب وأم وبشتغل معظم الوقت عشان أوفر له سبل معيشة إن شاء الله متوسطة بس المهم يكون في أمان ومن هنا قلت لها أومال أبوه فين زاد العياط وقالت اأها مطلقة من زمان وأن زوجها الله لا يسامحه قريبها واتجوزها وغدر بيها وبعث لها ورقة الطلاق بعد أشهر بسيطة من جوازهم وأنها لحد الوقت مش فاهمة هو كان اتجوزها ليه طالما هيطلقها بعد كام شهر ومن غير أي سبب وبعد كده أختفي تماما ومعدش تعرف عنه أي حاجة

وقعدت أصبر فيها وأقولها حطي همك على همي أهو أحنا الاثنين زي بعض مطلقات ومن يومها بقينا أصحاب جدا

(الاستاذ رامي) وهل قلتي ليها أن أبو محمد يبقى أبو معاذ

(أم أمل) لا طبعا ازاي ومحمد أسمه محمد محمود سالم حضرتك نسيت ولا أيه

(الأستاذ رامي) والله يا أم أمل أنا دماغي لفت ثاني من الحكاية دي ويظهر محتاج فنجان قهوة ثاني من ايد عم سالم وينادي عم سالم يارجل ياطيب اعملي فنجان قهوة ثاني تشربي يا أم أمل قهوة ثاني

(أم أمل) لا خلاص عشان أعرف أنام بالليل

(عم سالم) حالا يا بيه يكون عندك فنجان قهوة عمك سالم التمام

صوت خطوات عم سالم

(أم أمل) هو حضرتك مش هتروح بيتك تتغدى فات المدام استغيبت حضرتك

(الأستاذ رامي) مدام مين ياحاجة مفيش مدام ولا أولاد

(أم أمل) ياخبر أسفة معرفش ان حضرتك لسه متجوزتش

(الأستاذ رامي) لا اتجوزت وخلفت بس يظهر باب النجار مخلع

(أم أمل) مش فاهمة قصد حضرتك أيه

(الأستاذ رامي) دي حكاية طويلة عريضة اظن مش وقته خالص أحكيها وأنت في الظرف ده وأكيد حضرتك تعبتي النهاردة بما فيه الكفاية ويدوب تروحي ترتاحي شوية

(أم أمل) ولا تعبت ولا حاجة أهو نقعد ندردش مع بعض أحسن ما اروح واحط بوزي في بوز سيدة

(الأستاذ رامي) طيب صلي على النبي

(أم أمل) اللهم صل وسلم على سيدنا محمد وعلى آله وصحبه أجمعين أيه هو حضرتك هتحكي حدوته

(الأستاذ رامي) والله ياحاجة الحواديت أرحم من حكايتي

(أم أمل) ليه بس يا سيادة المستشار

(الأستاذ رامي) بقولك أيه ياحاجة متخلي البساط أحمدي

(أم أمل) مش فاهمة تقصد أيه حضرتك

(الأستاذ رامي) أقولك بلاش سيادتك وحضرتك وسيادة المستشار وقولي رامي علي. طول وأنا اناديك باسمك وخلاص بدل كل شوية أم أمل والحاجة وحضرتك وكده الا أنت اسمك ايه ياحاجة

(أم أمل) بلاش عشان هتضحك على اسمي

(الأستاذ رامي) طيب جربي قولي وأنا مش هضحك خالص

(أم أمل) اسمي الرسمي نادية وده اللي في شهادة الميلاد لكن اسمي اللي معروفة بيه وكان بابا الله يرحمه أطلقه عليا نزاجة

(الأستاذ رامي) ينفجر في الضحك وايش جاب نادية لنزاجة

(أم أمل) هعمل أيه أمي الله يرحمها كانت مصممة تسميني نادية على اسم أمها وأبويا كان مصمم يسميني نزاجة على أسم أمه واشتعلت الحرب بينهم وتم الاتفاق شهادة الميلاد تكتب نادية وينادوا عليا نزاجة بس

(الأستاذ رامي) خلاص ياست نزاجة ويضحك

(أم أمل) هنبدأ الحكاية بالضحك

(الأستاذ رامي) لا خلاص

(أم أمل) طيب احكي قصتك

(الأستاذ رامي) حكايتي تبدأ بطلقة رصاص

(أم أمل) مستغربة نعم ازاي مش فاهمة؟