الفصل التاسع عشر....معاذ ابني عايش ممتش

(وكيل النيابة) دخلها ياعسكري

صوت خطوات وسيدة تقول السلام عليكم ورحمه الله وبركاته

(وكيل النيابة) اتفضلي سمعت إن عندك أخبار جديدة في قضية معاذ

(أم معاذ) أيوة يافندم

(وكيل النيابة) افتح يابني محضر جديد اتفضلي قولي اسمك وسنك وعنوانك

(أم معاذ) رابحة عبد العزيز خمس وخمسون سنة شارع المحور عمارة محمود البدوي نمرة عشرة

(وكيل النيابة) خير يا أم معاذ ايه الجديد اللي عاوزة تقوليه النهاردة

(أم معاذ) أنا يا ابني سلمت أمري لله من يوم ما عرفت بموت ابني معاذ رغم أن قلبي حاسس أنه عايش ممتش

(وكيل النيابة) مش فاهم ازاي عايش هو أنت مستلمتيش الجثة

(أم معاذ) لا يابني روحت المشرحة لما استدعوني استلم الجثة بس برده مش جثة ابني فلم استلمها

(وكيل النيابة) متأكدة من كلامك معنى كده أن جثة ابنك لسه مفقودة

(أم معاذ) أيوة يافندم

(وكيل النيابة) أكيد المباحث بتدور على الجثة ولما يوصلوا لها هيبلغوك

(أم معاذ) بس فيه حاجة حصلت بتأكد أن معاذ عايش مش ميت

(وكيل النيابة) وايه الحاجة دي ممكن تكلمي على طول بدون مقدمات

(أم معاذ) حاضر يافندم من أسبوع تليفوني رن لقيت رقم معاذ ابني اللي بيرن

فتحت التليفون فورا وقلت ألو لكن محدش رد

(وكيل النيابة) وارد يعني حد يكون لقى الفون وحب يعرف بتاع مين رن على أخر رقم كلم صاحب الفون ده مش دليل على أن ابنك مازال حي يرزق

(أم معاذ) لا حصل حاجة ثانية

(وكيل النيابة) حصل أيه اتكلمي من فضلك

(أم معاذ) من ثلاثة أيام جرس الباب رن روحت اشوف مين فتحت الباب ملقتش حد وأنا داخلة اتعترت في ظرف دخل من تحت عقب الباب

(وكيل النيابة) هي ايه حكاية الأظرف اللي من تحت عقب الباب دي

كملي يا أم معاذ كملي

(أم معاذ) فتحت الظرف لقيت فيه فيزا وورقة مكتوب فيها رقم

(وكيل النيابة) معاك الفيزا

(أم معاذ) أيوة أهي حضرتك

(وكيل النيابة) بتاعة مين الفيزا

(أم معاذ) اسم معاذ عليها

(وكيل النيابة) تقصدي فيزا مرتب ابنك معاذ وارد تكون تجديد لفيزا مرتبه هي البنوك دلوقت بتبعث الفيزا لحد البيت وإذا المندوب لم يجد صاحب البيت بيدخل الظرف من تحت عقب الباب فعلا

(أم معاذ) لا مش فيزا مرتب معاذ

(وكيل النيابة) وأنت عرفتي منين

(أم معاذ) الفضول أخدني نزلت لأقرب ماكينة صراف آلي ودخلت الفيزا فيه

(وكيل النيابة) وأنت تعرفي الرقم السري بتاعها

(أم معاذ) حضرتك لم تأخد بالك أنا قلت في أول كلامي أن الفيزا كانت في الظرف ومعها رقم في ورقة

(وكيل النيابة) تمام والرقم شغل الفيزا

(أم معاذ) جربته فتح الحساب بس لقيت مصيبة

(وكيل النيابة) واضح إن حضرتك بتبالغي كثير مصيبة أيه في ماكينة صراف آلي خاصة ببنك

(أم معاذ) المصيبة المبلغ اللي في الحساب

(وكيل النيابة) ليه كان كام

(أم معاذ) عشرة مليون

(وكيل النيابة) كام! ليه هو ابنك كان شغال في أيه

(أم معاذ) في السياحة يافندم

(وكيل النيابة) هي كل واحدة اسألها ابن شغال في أيه تقولي في السياحة طيب ما أنا عارف عاوز إجابة محددة شغال في كذا في السياحة مهي السياحة مجالها واسع

(أم معاذ) معرفش غير كده ابني اتخرج من سياحة وفنادق سافر شرم الشيخ عشان يشتغل في السياحة بيعمل أيه معرفش يا فندم

(وكيل النيابة) سحبتي حاجة من الفلوس

(أم معاذ) لا طبعا

(وكيل النيابة) ليه لا

(أم معاذ) وأنا اش عرفني دي فلوس أيه وحلال ولا حرام

(وكيل النيابة) ده اللي همك حلال ولا حرام مشغلتيش عقلك وفكرتي مصدر الفلوس ايه؟

(أم معاذ) مهو أنا يا فندم جيت لحضرتك عشان أنتم الحكومة وأنتم اللي هتعرفوا مصدر الفلوس وبتاعة مين

(وكيل النيابة) تمام لسه عندك أقوال ثانية

(أم معاذ) أيوة فيه

(وكيل النيابة) بنفاذ صبر فيه أيه ثاني

(أم معاذ) أنا وصلت لأبو معاذ وروحت له

(وكيل النيابة) ايه كان مفقود هو كمان

(أم معاذ) لا كان هربان

(وكيل النيابة) هربان أيه عامل جريمة وهرب وعاوزة تبلغي عنه إذا كان كده نفتح محضر ثاني خالص بعيد عن القضية دي

(أم معاذ) هو عمل جريمة بس في حق معاذ وحقي مش حق الدولة ولا الحكومة

(وكيل النيابة) بنفاذ صبر وشخط ثاني جريمة ايه

(أم معاذ) اتجوزني ولما حملت في معاذ طلقني وهرب

(وكيل النيابة) واحنا مالنا يامدام بالكلام ده

(ام معاذ) مش لازم تبلغوه باللي حصل لمعاذ ولا الهم كله ليا وهو هايص مع النسوان وصوره في التليفزيون

(وكيل النيابة) تقصدي أيه هو أبو معاذ مين!

(أم معاذ) رياض الفولي بتاع العربيات والشركات وبتاع الحكومة

(وكيل النيابة) أنت عارفة بتقولي أيه أنت عارفة أنت بتكلمي عن مين؟

(أم معاذ) عارفة طبعا مهو أنا بنت خاله وهو أبو معاذ ابني بس كان ده أيام الفقر

لكن الوقت بقى بتاع الحكومة

(وكيل النيابة) سيادة النائب رياض الفولي والمليونير المشهور يبقى أبو معاذ

(أم معاذ) أيوة تحب أحلف لك على المصحف عشان تصدقني

(وكيل النيابة) معاك شهادة ميلاد معاذ

(أم معاذ) لا لكن معي وثيقة جوازنا عارفة أن مفيش حد هيصدق كلامي فخليت الوثيقة معي احتياطي

(وكيل النيابة) أشوفها لو سمحتي

(أم معاذ) حاضر ثواني تفتح الشنطة اتفضل حضرتك وثيقة جوازنا أهي

(وكيل النيابة) فعلا نفس الاسم

(أم معاذ) هو حضرتك مش مصدقني ليه آه عشان شكلي متواضع والباشا ما شاء الله في السماء

(وكيل النيابة) لا يامدام مش بالشكل أنا كان قصدي

يرن فون وكيل النيابة ويرى اسم رئيس مباحث شرم الشيخ فيفهم أن الأمر مهم فيستأذن من أم معاذ ثواني وارجع لحضرتك

(أم معاذ) أتفضل حضرتك براحتك أنا قاعدة أنا ورايا أيه

صوت خطوات ووكيل النيابة يغادر الغرفة

ويرد على الفون ألو أهلا وسهلا ضياء باشا لعله خير

(ضياء رئيس المباحث) لا مش خير خالص ومش هينفع الكلام في الفون لازم تيجي شرم الشيخ فورا الموضوع خطير وفيه ملابسات كبيرة لازم تيجي ونقعد مع بعض وتشوف الأدلة بنفسك

(وكيل النيابة) تمام في أقرب وقت هكون عند حضرتك مع السلامة ضياء باشا

صوت خطوات وباب يفتح

(وكيل النيابة) أعتذر أم معاذ عن التأخير

(أم معاذ) براحتك يا فندم

(وكيل النيابة) دلوقت هل فيه جديد عندك غير الفيزا ورقم ابنك اللي طلبك

(أم معاذ) أيوة يافندم فيه حاجة ثانية نسيت اقول لحضرتك عليها

(وكيل النيابة) اتفضلي

(أم معاذ) فيه رسالة جت ليا على الواتس كمان

(وكيل النيابة) رسالة أيه مقلتيش عليها ليه من الأول؟

(أم معاذ) معلش يا فندم والله سها عليا

(وكيل النيابة) ممكن أشوف الرسالة دي من فضلك

(أم معاذ) اتفضل الفون أهو

(وكيل النيابة) لا لا أيه ده فعلا لازم سفرية لشرم الشيخ حالا بدون تأجيل

(ام معاذ) فيه حاجة يافندم هي الرسالة خطيرة للدرجة دي