الفصل الحادي والعشرون..... حكايتي مع بلقيس

(الأستاذ رامي) هقول لحضرتك

(أم أمل) مش قلنا هنخلي البساط أحمدي قولي بقى نزاجة

(الأستاذ رامي) يضحك بصي هقولك نادية أحسن بكثير من نزاجة دي

(أم أمل) زي ماتحب المهم قول قصتك شوقتني

(الأستاذ رامي) كنت معزوم في فرح في الصعيد تحديدا في سوهاج واحد زميلي من الدراسة في كلية الحقوق جامعة عين شمس

(أم أمل) وأيه اللي يجيبه من سوهاج لهنا هو مفيش هناك كلية حقوق

(الأستاذ رامي) لا طبعا فيه بس أبوه من صغر زميلي جه وسكن في الجيزة واشتغل هنا وأولاده اتعلموا هنا لكن لما جه يتجوز أبوه أصر أن الفرح يكون عندهم في سوهاج المهم عزمنا كلنا وكنا لسه مخلصين كلية طازة ويدوب بندرب عند محامي كبير ومشهور فقلنا نسافر له كلنا بربطة المعلم

كل الزملاء توكلنا على الله وركبنا القطر ووصلنا الظهر عشان كان عزمنا على الغداء وكان فرح حلو قوي والأكل كان معتبر جايبين طباخ ودابحين وعاملين واجب جامد مع المعازيم

(أم أمل) كل الأرياف والصعيد كده بيعملوا واجب جامد في الأفراح

(الأستاذ رامي) فعلا ربنا يجعل بيوت الناس كلها عمار سواء هنا أو هناك

المهم أكلنا وملينا البطون وكمان دخلنا المضيفة فرشنا على الأرض وروحنا في النوم صحينا على ضرب نار مخضوضين وواحد من الزملاء طمنا وقال عادي في افراحنا ضرب النار وده بيكون مجاملة كل واحد بيجي يضرب طلقتين مجاملة لأهل العريس والعروسة اذا كانت هي كمان من الصعيد وزميلنا ده من محافظة المنيا يعني عارف الطباع والعادات هناك المهم صحينا وشربنا الشاي الثقيل الصعيدي وحلينا كمان بفطير مشلتت وخرجنا بقي بعد المغرب نقعد في الصوان المنصوب أمام دار الزميل وكل شوية يجي حد يجامل يضرب له عيارين ويمشي وخلاص وبدأت زفة المزمار والتحطيب وده رقصة خاصة بيهم واندمجنا أحنا كمان في الرقص معهم والليلة زي الفل وقمت أرقص مع العريس وثواني وضرب النار اشتغل ثاني قلت عادي مجاملة من الحبايب للعريس لكن لقيت الضرب مش في الهواء كالسابق لا ده ضرب موجه للعريس بس ضرب عشوائي ومن كل اتجاه وحظي الجميل كنت برقص مع العريس فأخدت طلقة في كتفي ووقعت في الأرض أنا والعريس اللي اخد طلقة ودع بيها الدنيا ودخل الأخرة

(أم أمل) تصرخ مات العريس مات وتنهار في البكاء

صوت هرولة وجري عم سالم خير يا ست هانم مالك

فيه أيه ياحاجة عملت لها أيه أستاذ رامي

(الاستاذ رامي) اهدي ياحاجة معرفش أن قلبك خفيف كده ولا أقولك يانزاجة

(أم أمل) تضحك بمرارة بس افتكرت محمد اللي دخل أخرة قبل مايتجوز هو كمان

(الأستاذ رامي) البقاء والدوام لله ربنا يرحمه ويغفر له قدر يانزاجة قدر هو عريس في الجنة بإذن الله

(أم أمل) ربنا يرحمه ويسامحه أومال على الأقل أنا عارفة مكانه ربنا يكون في عون أم معاذ متعرفش طريق لابنها

(الأستاذ رامي) ليه هو لسه مظهرتش جثته للوقت

(أم أمل) لا وكل شوية تروح تسأل وساعات يبعثوا لها تروح تتعرف على جثة وتطلع مش بتاعته ربنا يربط على قلبها كما ربط على قلب أم موسى

(الأستاذ رامي) وحضرتك عرفتي كل ده منين لسه بتزوريها يعني لسه فيه ود بينكم

(أم أمل) لا طبعا بعد قتل أمل بنتي لابنها مقدرش أزورها اروح اقول لها أيه مينفعش

(الأستاذ رامي) والله ياحاجة أنا شايف أن زيارتك ليها ممكن تخفف عنها وطالما لسه موصلوش للجثة جايز يكون ابنها حي يرزق

(أم أمل) ازي يا أستاذ رامي

وأمل معترفة بقتله

(الأستاذ رامي) ربك كريم والمستخبي النهاردة مصيره يبان

(أم أمل) هو أحنا ايه خرجنا من قصتك للسيرة الهم دي كمل خلينا نعرف باقي القصة

(الأستاذ رامي) شوفي ياستي فوقت في المستشفى لقيت ايدي في أيد واحدة زي القمر قمر مين دي نجوم وقمر وشمس كله مع بعضه

(أم أمل) تضحك بصوت عالي أيه ده كل ده أيه بتقول شعر

(عم سالم) يردد في الصالة الست دي مش طبيعية شوية تصرخ شوية تضحك أكن مفيش حاجة حصلت يلا لنا الله ربنا يروق بال الناس جميعا

(الأستاذ رامي) شعر مين ده لو كنت شاعر كنت كتبت فيها دواوين شعر زي قيس وليلى

(أم أمل) كلنا كده لما بنحب أصل مراية الحب عامية الا قولي يأستاذ رامي هي ليه رمز العدالة ست معصوبة العينين ليه مع ان المفروض العدالة تكون مبصرة مش عامية

(الاستاذ رامي) مع انك هتخرجينا من موضوعنا بس ماشي اشرح لك ليه العدالة معصوبة العينان

هنا الرمز للحياد والنزاهة المطلقة فهي تعني ان العدالة عمياء لا ترى الوجوه ولا تفرق بين غني وفقير أو قوي وضعيف ولا تتأثر بالشكل أو المكانة الاجتماعية بل تحكم بناءً على الأدلة والحقائق فقط

وليه هي ست مش رجل للإشارة انه رغم السيف والميزان الا أن الرحمة موجودة في هذه العدالة كون قلب المرأة أرحم من قلب الرجل والميزان الذي تحمله فيه إشارة احقاق الحق وفق القانون

(أم أمل) رغم أن أمل كانت في كلية الحقوق كل مرة أفكر اسألها تيجي حاجة تشغلنا وأنسى شكرا لحضرتك

(الأستاذ رامي) احنا شغالين حضرتك وحضرتك ونسينا الاتفاق

(أم أمل) واحدة واحدة لحد ما نتعود المهم كمل الحكاية شوفت القمر لما فوقت قول كانت مين؟

(الأستاذ رامي) كانت الدكتورة (بلقيس)

(أم أمل) آه ملكة سبأ

(الاستاذ رامي) أيه عاوزة تعرفي حكاية ملكة سبأ بالمرة ونقلب القصة لحكاية من التاريخ

(أم أمل) تضحك ثاني لدرجة القهقهة

(عم سالم) سبحان الله اضحك الله سنك ياست الكل

(أم أمل) لا لا كمل حكاية الدكتورة بلقيس

(الأستاذ رامي) أنا بصراحة لما شوفتها قلت بس احنا في الآخرة ودي الجنة ودي الحور العين بتاعتي وحمدت ربنا وكنت ببص لها وعنايا مفنجلة ومزهول والدكتورة لاحظت كده

(أم أمل) تضحك لدرجة تساقط الدموع من عينيها

(الأستاذ رامي) مازحا ايوة كده يا نزاجة محدش اخد منها حاجة

المهم سألتها احنا فين ردت قالت: في المستشفى المركزي بسوهاج

رديت عليها يعني أنا حي مش ميت

قالت: أيوة حي ترزق ووكيل النيابة موجود عند مدير المستشفى وجاي حالا يأخد أقوالك في الحادث

قلت لها حادث أيه

قالت: حادث الفرح

قلت هو أنا من ساعة لما شوفت عنيك فاكر حتى اسمي

وشها احمر وجاب ألوان الطيف وطلعت تجري من الغرفة وشوية جه وكيل النيابة عشان يأخد أقوالي

فقررت استعبط شوية واعمل نفسي لسه في مرحلة الهذيان عشان أشوف الدكتورة وأعرف حكايتها كمان وفعلا كل ما وكيل النيابة يسألني ارد وأقوله أيه أنا فين في الجنة ولا النار أنت مين والرجل زهق مني وأمر الحارس على الباب يمنع دخول اي حد الا الطبيب وطقم التمريض وانصرف وقالي هيرجع ثاني لما ارجع لحالتي الطبيعية ميعرفش اني خلاص عمرى ما هرجع طبيعي ثاني بعد ما قابلت بلقيس