الرابع...

بعد مضي ساعتين من الانتظار والفحص، خرجت سهر من المستوصف وهي تستند بوهن على صفية، وقد عُلق كتفها المصاب بـ "حامل" طبي، وخلفهم محمود الذي لم يغب بصره عنها لحظة واحدة، وما إن وصلوا إلى ردهة البيت، حتى وقفت سهر أمام باب شقتها بملامح ذابلة وقالت بامتنان:

_ أنا هدخل بقى يا خالتي، وكتر خيركم على ال عملتوه معايا.

سمعت صوت محمود يأتي من خلفها، قوياً وحانياً في آن واحد، وهو يحاول تلطيف الأجواء بلهجة مشوبة بالحرص:

_ عارفة لو مبطلتيش الكلام ده هخلع لك كتفك التاني، اطلعي مع ماما يلا على ما أشوف بابا وعم رشدي وصلوا لإيه.

...

وهناك وقف فؤاد يشعر بالضجرِ الشديدِ من كلماتِ عمه صالح، يزفرُ أنفاسه بضيقٍ وهو ينتظرُ على أحر من الجمر أن ينتهي الرجلُ من تقريعه المستمر، بينما كان صالح يرمقه بنظراتٍ يملؤها الخزي والعار وهو يقول:

_ يا ابني اتقِ ربنا في بنات الناس، هو أنتَ صغير على الكلام القبيح ده؟ أنا مش عارف طالع لمين! زرع شيطاني بالشكل ده، أنت فضحتنا في كل مكان وخليت سيرتنا على كل لسان، ومعمرتش في ولا جوازة، أنا مش عارف آخرتها إيه معاك.

صاح فؤاد بضيقٍ وقد نفد صبره من توبيخِ عمِه، وحاول قلب الحقائق كعادته بصلفٍ وادعاءٍ:

_ وأنا يعني كنت عملت إيه؟ دي بتتبلى عليا يا عمي لما مسكتها بتسرق الفلوس، كانت عاوزة تداري على شنيعتها فعملت التمثيلية دي.

زفر صالح بأسى وهز رأسه بقلةِ حيلةٍ، فهو يعلمُ يقيناً أن الحديث مع ابنِ أخيهِ ضربٌ من العبثِ وبلا جدوى، فقال بنبرةٍ حازمةٍ:

_ تصدق بالله يا فؤاد، أنا ال هروح آخد البت وأعملك المحضر، يمكن تتأدب وتعرف إن الله حق، والظلم لُه نهاية.

حدق به فؤاد بشر وقد جحظت عيناهُ بغضبٍ أسود، وصاح بتحد سافر:

_ عاوز تعمل فيا أنا محضر يا عمي؟ طب وماله روح اعمل علشان ميطلعش عليها شمس، ولو جبت المحل كله يشهد معاك هجيب مليون واحد يشهد لصالحي، وخليها بقى عند في عند!

انتفض صالح واقفاً بغضبٍ عارمٍ زلزل أركان الغرفة، وصاح بوجهٍ محتقن:

_ لا ده أنتَ اتجننت رسمي! ماشي يا فؤاد، من بكرة رجلك متعتبش ولا محل من محلاتي، ابقى وريني هتصرف منين، وهات مفاتيح العربية والفيزا، ووريني بقى هتعيش إزاي.

حدق فؤاد بغضبٍ هو الآخر، لكن صمتاً مفاجئاً خيم عليه حينما أدرك أن بساط الرفاهية يسحبُ من تحت قدميهِ، ففكر بسرعة في أن الأمر سينقلبُ ضدهُ ولن يجد من يعيله، فقال متراجعاً عن تحديهِ بنبرةٍ غلفها بمكرٍ وخبث:

_ إيه بس يا عمي؟ أنتَ هتصدق كلامي ساعة غضب؟ أنا برضه ابن أخوك وماليش غيرك، بص أنا هعمل ال يرضيك.

نظر له صالح بريبةٍ وشك، فلم تكن ملامح فؤاد توحي بأي ندم حقيقي، وسأله:

_ هتعمل أي حاجة ترضيني؟

أجابه فؤاد بمكرٍ وهو يحاول استعادة رضا عمه بأي ثمن:

_ آه طبعاً يا عمي، هو أنا ليا غير رضاك عليا؟ أنتَ في مقام والدي.

قال له صالح بلهجةٍ آمرة ليختبر صدق نواياه:

_ حيث كدة، يبقى تيجي معايا وتعتذر لسهر وتراضيها، وتمسح الإهانة ال نالتها بسببك.

حدق فؤاد في عمه برهة، ثم أخذ يحك ذقنه ببطء، وارتسمت على شفتيهِ ابتسامة خبيثة تحمل خلفها نوايا مظلمة وقال:

_ طبعاً يا عمي، نروح، أنا تحت طوعك، شوف عاوز نروح إمتى وأنا معاك.

...

في منزل رشدي، كان الحاج خميس قد فرغ من حديث طويل بذل فيه قصارى جهده ليرد جاره العنيد عن غيه، وقد جلس معهما محمود الذي آثر البقاء ليطمئن على سير الأمور بعدما صعدت سهر مع والدته، وسمع والده يختم حديثه بنبرة يملؤها العتب والحكمة قائلاً:

_ ما تهدى شوية على البت، مش كل يوم الناس دهسين بيتك كدة يا رشدي، وبعدين البت فالمنطقة هيبقى معروف عنها إنها بتتضرب وتتهان، وممكن حد ابن حرام يلعب في دماغها وتبقى أنتَ السبب في ضياعها، وبعدين يا أخي البت كبرت ماشاء الله وفيها الطمع، لازم تعززها شوية هي تمت ال 17 يا رشدي وعيب أوي ال بتعمله فيها ده.

تنهد رشدي بحرقة وكأن جمرة تشتعل في صدره، وقال بصوت مثقل بالمرارة:

_ كان نفسي في ولد يشيل عني يا خميس، بس أعمل إيه؟ أنا بحاول على قد ما أقدر بس بجد مش قادر، كل ما أشوفها بشوف أمها، ومش بتحمل لما بفتكر إني اتحرمت منها بسببها.

كان محمود يستمع لكلمات رشدي وغليان يمر في عروقه، فقد شعر بظلم فادح يقع على تلك الفتاة التي رآها بعينيه كالجوهرة النقية، وسمع والده يستغفر الله بعلو صوته فنظر لرشدي بضيق مستنكر، بينما استرسل الحاج خميس في حديثه:

_ يا رشدي استغفر ربنا، بت إيه وولد إيه بس؟ ما سهر شيلاك وشايلة البيت ولا أجدعها راجل، حرام تفترى عليها بقا في حاجة ملهاش ذنب فيها، دي أعمار وكل شيء بإيد ربنا و..

لم يكمل الحاج خميس حديثه إذ قطعه طرق عنيف على الباب هز أرجاء المكان، فتحرك محمود بسرعة قائلاً:

_ خليكم أنتم، أنا هشوف مين.

فتح محمود الباب ليجد أمامه رجلاً وقوراً في عمر والده، وخلفه لمح رجلاً في أواخر الثلاثينات، وما إن وقعت عيناه عليه حتى أحس بنفور شديد وبغض يسري في جسده دون مبرر واضح، فسمع صوت الرجل الكبير يقول بوقار:

_ أنا الأستاذ صالح محفوظ صاحب المحل اللي سهر شغالة فيه، وده ابن أخويا فؤاد و..

توقف صالح عن إكمال حديثه فجأة حينما اندفع محمود كالإعصار وهجم على فؤاد، ممسكاً بياقته ليلكمه في وجهه بقوة أطاحت بتوازنه، فحال بينهما صالح وهو يحاول تهدئة الموقف، بينما ترك فؤاد ذلك الشاب يضربه دون رد فعل، خافضاً بصره أرضاً وهو يرسم على شفتيه ابتسامة خبيثة لم يلحظها أحد، ويقول في سره بمكر:

_ هتحمل علشان أوصلك، أي حاجة تحصل المهم تبقي بتاعتي.

سمع محمود صوت أبيه يأتيه من الداخل متسائلاً بنبرة يملؤها التعجب:

_ في إيه يا محمود، ومين ال على الباب؟

أجابه محمود بصوت هادر والغل ينهش صدره، وهو يشير بيده نحو فؤاد الذي كان يمسح أثر اللكمة عن وجهه:

_ ده البيه اللي اتحرش بسهر، له عين البجح ييجي لحد هنا بكل برود!

سند الحاج خميس جاره رشدي وأعانه على النهوض حتى وصلا إلى الباب بخطوات وئيدة، وما إن وقع بصر رشدي على فؤاد حتى اشتعل وجهه غيظاً وصاح بنبرة مخنوقة:

_ أنت جاي ليه؟ مش كفاية اللي عملته في بنتي واللي حصل لها بسببك!

تدخل صالح محاولاً تهدئة الأجواء المتوترة، وتحدث بلهجة دبلوماسية يغلفها الوقار:

_ يا جماعة، ابن أخويا جاي لحد عندكم يعتذر لكم ويراضيكم، مش هتدخلونا ولا هنفضل واقفين على الباب؟ ده أنتم أهل الكرم والواجب والمنطقة كلها بتحلف بأدبكم.

شعر الحاج خميس بالحرج من وقفتهم أمام الجيران في الردهة، فنظر إلى رشدي وابنه محمود نظرة ذات مغزى، ثم تنحى جانباً وقال:

_ اتفضلوا بيتكم ومطرحكم.