CHAPTER 8: I AM NURSE SOPHIE SAMONTE

Hindi na nagkaroon ng pagkakataong itanong ni Sophie kay Ella ang dahilan kung bakit hindi agad ito nakauwi noong araw na ginabi siya sa paghihintay sa kaibigan. 

Excited nilang pinag-usapan ng gabing iyon ang Pamilya Madrid. Nasentro ang kanilang pagkukuwentuhan sa nag-iisang anak na binata ng mga Madrid. Nilagyan nila ng mukha sa kanilang mga imahinasyon ang lalaking hindi pa nila nakikilala.

Na dinala ni Sophie hanggang sa kanyang panaginip.

Napanaginipan niyang napakaguwapong lalake ni Victor Madrid. May magandang pangangatawan at maginoong pag-uugali. Nililigawan siya nito. Pinagsisilbihan at nireregaluhan. Hanggang sa naging magkatipan sila.

Magkahawak kamay silang namamasyal. Nagsusuyuan. Pakiramdam niya’y nasa ulap siya, lalo ng yakapin na siya nito. 

At napapikit siya ng hahagkan na siya…

PAK!

Napadilat si Sophie.

“Bakit ka ba namamalo?” tanong niya, kasabay sa paghaplos sa hita niyang pinalo ng kaibigan.

“Alas otso na po ng umaga, ale. Mali-late ka po sa flight mo papuntang Palawan.” sagot ni Ella.

Biglang napabangon si Sophie. Takbo sa banyo. Naligo.

…….

Sa Palawan…

Ka video call ni Victor Madrid ang kapatid na si Amelia.

“Isang oras na daw naghihintay sa airport ‘yung magiging nurse ni mama!”

“Heto nga. Nagmamadali na nga!”

“Bilisan mo! Mahirap kumuha ng magaling na nurse.”

Pasakay na siya sa kotse, patuloy pa rin ang tungayaw ng kanyang ate.

“Paano mo naman natiyak na magaling ang nurse.”

"Summa cum laude siya ng grumadweyt ng nursing, laging nasa deans list noong nag-aaral and to top it all topnotcher siya sa board exam!”

Saglit na natameme si Victor.

Dikawa'y umiral ang asal na mapang-asar.

“Kung gano'n siya kagaling, di sana'y maraming ospital ang nag offer sa kanya ng trabaho!” pakikipag-argumento niya.”

“Ayaw daw n‘ya sa ospital magtrabaho.”

“Magna-nurse siya tapos ayaw n'ya magtrabaho sa ospital! Anong kaartehan ‘yun?”

“Sa ayaw niya,e. Pakialam mo?”

“Baka gustong makabingwit ng bilyonaryo at stepping stone niya ang pagtatrabaho bilang nurse ng rich!”

“Hoy, Victor! Huwag mo man lang tangkaing ligawan ang nurse na ‘yun. Huwag mong pairalin ‘yang pagiging babaero mo. Binabalaan kita!”

“Bakit, maganda ba siya?”

Nang-aasar ang naging halakhak ni Amelia Madrid, na sinundan ng sarkastikong pananalita.

“You will see.”

Na sinundan ng pagputol sa pag-uusap nilang magkapatid.

Inis na napabuntunghininga si Victor.

“Pangit siguro ‘yun, kaya “you will see” ang sagot ni ate.”

Mabilis magsabi ng maganda ang ate niya, kung talagang maganda ang ipinasusundo sa kanya.

“Minsan nga kahit ordinary looking lang ang babae sasabihin niya, maganda at seksi! Para magmadali ako sa pagsundo.”

Siya ang tagasundo ng ate niya sa mga kaibigan nitong nanggagaling kung saan man, at  namamasyal sa Palawan, na iniimbita ng ate niya na sa kanilang bahay na mag stay-cation.

Pangit nga siguro.” pagbibigay konklusiyon niya sa nasa isip.

Hindi niya kailangang magmadali.

…..

Iritado na si Sophie.

“Ano ba ‘yan? Dalawang oras na ‘kong naghihintay, hanggang ngayon wala pa!”

Kinabahan siya.

“Baka kakilala ng mga Sandoval ang mga Madrid na ito, at nalaman na ako ang magiging nurse ni Amanda Madrid.”

Takot sa mga Sandoval ang dahilan kung bakit ayaw niyang magtrabaho bilang nars saan mang ospital. Alam niyang sa dami ng mga koneksiyon ng mga ito ay madali siyang mati-trace.

Luminga-linga siya. Nagbuhul-buhol ang kalabog sa dibdib ng makitang may lalaking naka shades ang wari ay minamatyagan siya.

“Baka pinagmumukha muna nila akong tanga sa paghihintay, tapos…tapos…”

Hindi n'ya malaman kung ano ang iisipin niya.

Tiningnan ang puting kartolinang dalawang oras na niyang hawak, kung saan nakasulat ang kanyang pangalan.

SOPHIE SAMONTE

Nabitiwan niya ang stick na kinakakabitan ng kartolina, ng mapansing palapit sa kanya ang lalaking naka shades. Nagmamadaling naghanap ng mapagkukublihan.

Nilingon ang lalaking kinatatakutan.

“My God! Sinusundan niya ako!”

Takbo sa nakitang ladies room si Sophie.

“Safe ako dito!”

Walang lalaking puwedeng pumasok sa kanyang pinuntahan. Inilabas niya ang make-up kit niya, matapos humarap sa salamin ng ladies room.

…….

Dinampot ni Victor ang kartolinang nabitiwan ni Sophie. Binasa ang pangalang nakasulat doon.

SOPHIE SAMONTE

Tiningnan ang oras sa relong suot.

“Wow! Mahigit dalawang oras na pala akong late sa usapan.”

Sinuyod niya ng tingin ang paligid. Umasang makikita ang babaing kanina lamang ay idinidispley ang kartolinang may nakasulat na pangalang Sophie Samonte, upang agad makita ng Victor Madrid na susundo rito.

“Paano ko naman malalaman kung nandito pa siya,e, hindi ko naman alam kung ano ang hitsura niya.”

Nagdalawang isip siya kung tatawagan ang ate niya.

“Siguradong magwawala sa galit ‘yun. Bobombahin na naman ako ng umaatikabong sermon.’

Nagpasyang magbakasakali muna sa paghahanap.

Palinga-linga, tsumatsamba si  Victor, nagbabaka sakaling makikita at makikilala ang nurse na ipinasusundo sa kanya.

“Oh, Lord, bigyan mo po ako ng milagro. Bigyan Mo ako ng sign kung paano ko makikilala ang nurse na ‘yun.”

Ng may bumangga sa kanya.

Si Sophie, na nakapagpalit na ng anyo sa pamamagitan ng make up.

“Ano ba?” histerikal, ninenerbiyos na sigaw nito sa nabangga.

“Anong ano ba? Ikaw ang nakabangga, ah.”

“Kung nakatingin ka sa pinupuntahan mo, hindi tayo magkakabangga!”

Pinagmasdan ni Victor ang mukha ng babaing pinipilosopo siya.

“Wow! Ang kapal… ng make up!” ang bigla niyang nasabi.

Pakiwari ni Sophie'y binabastos siya  ng nakangiting-nakaismid na pagkakatingin ng lalake..

“Bastos!”

Agad iniharang ni Victor ang may stick na kartolinang kanyang hawak, nang akala niya'y sasampalin siya ng kaharap.

Natigilan ang babae ng mabasa ang nakasulat sa kartolina.

SOPHIE SAMONTE 

 Natitigilang napatitig siya sa lalaking wari'y nang-aasar ang asta sa kanya.

Kamukha siya ni Amelia Madrid!

“Patay!”

Nasabi ni Sophie sa sarili nang mapag konek-connect ang kartolinang hawak ng kaharap, sa palinga-linga nitong paglalakad at ang anyo nito na malaki ang pagkakahawig kay Amelia Madrid, ang babaing nag-hire sa kanya bilang nurse ng ina nitong si Amanda Madrid.

Pakiramdam niya'y nangangapal ang kanyang mukha, hindi dahil sa kapal ng make up, kundi dahil sa pagkapahiyang nararamdaman.

“OMG! Paano ba ako magpapakilala dito?”

“Huwag na, Miss. Marami na akong girlfriends.”

Tinalikuran at iniwan siya ni Victor.

“Bastos na ‘to, ah!”

Gigil na gigil sa inis si Sophie. 

“VICTOR MADRID!”

Napatigil sa paglalakad si Victor, dahil sa malakas na pagtawag sa pangalan niya ng babaing inasar niya. Napaisip.

“Baka si Nurse Sophie Samonte ‘yon, ah?”

Palapit na sa kanya ang babae ng lingunin niya ito.

“I'm Nurse Sophie Samonte.” Pagpapakilala nito sa kanya, sabay sa pag-abot ng kamay para sa handshake.

                                       *******