BEAUTIFUL ASSASSIN

Shanra Pov

Sa mataas na gate ng malaking bahay ng mga Acebedo ay para akong anino na nakasuot ng itim na overall na damit at natatakpan ng itim na bonnet ang buong mukha maliban sa aking mga mata. Mabilis akong sumampa sa tuktok ng gate nang walang kahirap-hirap. Inilibot ko ang mga mata ko sa paligid na para bang isang gumagalaw na CCTV camera. Nang masiguro ko na walang tao sa paligid na nakakakita sa akin ay parang pusang tumalon ako papasok sa loob ng bakuran. 

Napakatahimik ng gabi ngunit walang maririnig na ingay mula sa aking mga yapak. Ang gaan ng katawan ko at para bang hindi tumatapak sa sahig ang aking mga paa. Halatado sa kilos ko na sanay ako sa ganitonh klaseng trabaho.

Maingat akong naglakad palapit sa abot-kamay na mga CCTV camera at tinakpan ng masking tape ang mga

ito para wala nang ma-record pa kundi puro kadiliman na lamang. Abot-kamay ko lamang ang ibang cctv na madadaanan ko kaya madaling ko itong natakpan ng dala kong masking tape.

Pagkatapos ay naglakad ako palapit sa walang kamalay-malay na guwardiya. Palingon-lingon ako sa paligid habang dahan-dahang lumalapit sa nakaupong guwardiya na tila malalim ang tulog. Napailing ako habang nakatingin sa guwardiyang tumutulo pa ang laway sa pagtulog. Siguradong bukas ay matatanggal ito sa trabaho dahil hindi niya ginawa ang trabaho nitong magbantay sa paligid. 'Ayan tuloy, nakapasok ako sa loob ng bahay ng amo niya nang hindi niya namamalayan. At para masigurado ko na hindi agad magigising ang guwardiya ay pinisil ko ng mariin ang sleeping nerve ng bantay hanggang sa tuluyan itong lumungayngay sa kinauupuan. Maingat na inayos ko ang pagkakaupo ng walang malay na guwardiya. Isinandig ko siya sa dinding para kunwari'y tulog lamang. Pagkatapos ay maingat at walang pagmamadali na lumapit ako sa pintuan papasok sa kabahayan at walang kahirap-hirap na nabuksan ang naka-kandadong pintuan. Eksperto ako sa ganitong bagay. Part of my hard traing is to be an expert to unlocked even the hardest lock in the world.

"Sino ka? Bakit ka nakapasok dito?"

Ang balak na pagbubukas ko sa pintuan ay naudlot nang marinig ko ang boses na iyon ng isang lalaki sa likuran ko. Naisip ko na isa ito sa mga guwardiya na naka-duty sa gabing iyon.

Bago pa makapagtawag ng ibang kasamahan ay mabilis na akong nakalapit sa kanya at mahigpit na tinakpan ko ng aking palad ang bibig ng nabiglang guwardiya kasabay ng pagtusok ng karayom sa leeg nito. Walang malay na bumagsak ang guwardiya sa semento.

Hinila ko ang walang malay na katawan ng guwardiya at itinago sa likuran ng mga halaman. May kabigatan ang lalaki kaya naman nahirapan ako sa paghila sa katawan ng guwardiya para maitago ko sa likuran ng makapal na halamanan.

Lalabas na sana ako sa likuran ng mga halaman nang biglang may lumabas na isa pang guwardiya mula sa loob ng bahay. Nagpalinga-linga ito na tila may hinahanap.

"Sanchez? Bakit mo iniwang hindi naka-lock ang pintuan? Mayayari tayo nito kay Sir 'pag nagkataon," tawag nito sa kasamahan nito. Nang walang sumagot sa kanya ay nag-umpisa itong maglakad palapit sa guwardiyang walang malay na nakaupo at nakasandig. 

"Damn! Kapag nakalapit siya sa kasamahan niyang guwardiya ay matutuklasan niyang hindi ito natutulog kundi walang malay," mahinang anas ko. Kailangan kong patulugin din ang guwardiyang ito bago pa niya matuklasan ang nangyari sa kasamahan nito.

Maingat at walang kilatis na lumapit ako sa walang kamalay-malay na guwardiya na naglalakad pa rin palapit sa walang malay naman nitong kasamahan. Ngunit bago pa man ito tuluyang nakalapit sa kasamahan ay mabilis na akong nakalapit sa kanya at itulak ko siya pasandal sa sementadong poste kasabay ng pagtusok nang karayom ko sa kanyang leeg. Hindi nakapalag ang guwardiya dahil sa gulat at 'di inaasahang pag-atake aa kanya. Katulad ng dalawang mga kasamahan ay walang malay na bumagsak din ito sa malamig na semento. Napailing na lamang ako habang nakatingin sa guard. Kailangan pa nila ng training dahil silang patuligin ng kanilang kaaway.

Mabilis na hinila ko ang katawan ng lalaki at itinabi sa katawan ng kasamahan nitong itinago ko sa likuran ng mga halaman. Pagkatapos ay itinuloy ko na ang naudlot na pagpasok sa loob ng bahay nang negosyanteng si Danding Acebedo.

Malaki ang bahay at maraming mga magagarang gamit ang makikita sa loob ng bahay ni Danding kaya hindi ko napigilan ang mapa-ismid. Alam ko naman kasi na mula sa masamang paraan kinuha ni Mr. Acebedo ang perang pinangbili sa mga magagarang gamit na ito.

Hindi na ako nag-aksaya ng oras at agad na akong umakyat sa itaas ng hagdan para hanapin ang kuwarto ng taong pakay ko. Maswerte na sa unang kuwarto na aking pinasok ay kuwarto agad ng mag-asawang Acebedo ang aking napasukan. Hindi naka-lock ang pintuan ng kuwarto ng mag-asawa kaya walang kahirap-hirap na nakapasok ako sa loob. Siguro tiwala ang mga ito na walang ibang tao na maglalakas-loob na pumasok sa loob ng bahay nila dahil may mga guwardiya namang nagbabantay sa paligid. Ngunit iyon ang malaki nilang pagkakamali. Dahil mas naging madali lamang tuloy para sa akin na lapitan ang taong pakay ko para gawin ang aking misyon.

Wala akong inaksayang panahon. Lumapit ako sa mag-asawang mahimbing na natutulog. Walang kamalay-malay ang mga ito sa nakaambang panganib sa kanilang paligid. Marahil ay naramdaman ng lalaki na may ibang tao sa loob ng kuwarto nila kaya bigla itong napadilat ng mga mata. Ngunit tanging iyon lamang ang nagawa nito. Ni hindi ito nakapagsalita kahit isang letra dahil mabilis ko nang naitusok sa dibdib ng lalaking nakahiga ang hawak kong karayom na nagtataglay ng nakamamatay na lason. Muling ipinikit ng lalalaki ang mga mata nito upang tuluyan nang matulog at hindi na gumising pa.

Pagkatapos kong masiguro na wala nang buhay ang aking pakay ay mabilis na akong lumabas ng kuwarto at walang kahirap-hirap na nakalabas sa malaking bahay. Muli akong umakyat sa mataas na gate para makalabas sa bakuran ng mga Acebedo. At nang tuluyan na akong nakalabas ng gate ay mabilis na akong tumakbo patungo sa madilim na bahagi ng kalsada hanggang sa tuluyan akong naglaho sa kadiliman ng gabi.