KABANATA 5

Sa narinig na prangkang sinabi ni Dave ay nabitin sa ere ang mug ng kape na hawag ni Jade. Pagkatapos, nagtatanong ang mga mata niyang pinakatitigan ang lalaki.

“A-Anong sinabi mo? Trabaho ba kamo?” tanong niya rito.

Tumango ang lalaki. “Madali lang, I mean, gusto ko sana na magpanggap ka bilang girlfriend ko,” ang walang gatol na sabi ni Dave.

Sa narinig ay kamuntik nang mabilaukan ang dalaga. “Ano? Teka nga, bakla ka ano?” hindi niya napigilang matawa sa pagkakaisip ng unang posibleng dahilan ni Dave na pumasok sa isipan niya.

“Ah, don’t call me that, okay?” anito sa nagbabantang tinig.

Nangingiting ipinagpatuloy ni Jade ang pagkain. At nang manatili siyang tahimik ay noon pa lang muling nagsalita si Dave.

“It’s because of my mother. Gusto niya akong ipakasal sa babaeng hindi ko naman gusto. I know I can stop her kung sakaling may maipakilala akong girlfriend sa kanya,” anito.

“Akala ko noon sa mga TV series lang nangyayari ang ganyan, pati pala in real life,” ang isinagot niya sa halip saka muling humigop ng kape.

“Look, alam ko kailangan mo ng pera, at kung pera lang marami ako nun, just name your price,” si Dave sa tono na parang desperado na at hindi malaman ni Jade kung saan nanggaling iyon.

Natitigilang napatitig si Jade sa tonong na iyon ng lalaki. “Ang sakit mo namang magsalita. Alam ko marami kang pera, mayaman ka nga di ba? Pero hindi naman porke kailangan ko ng trabaho ay sasabihan mo na ako ng ‘just name your price’. Eh wala ka naman palang ipinagkaiba dun sa halimaw na nambastos sakin kagabi eh!” aniya sa matigas na tono saka pinukulan ng dismayadong titig si Dave.

“I’m sorry, desperado na kasi ako. Hindi ko sinadya na ma-offend kita. Pero sana lang pumayag ka. I find you interesting kung iyon ang itatanong mo na bakit ikaw? May mga katangian ka na alam kong magiging convincing para sa mother ko kung bakit kita nagustuhan. Saka isa pa, may contract tayo, hindi ako gagawa nang kahit anong labag sa kontrata,” paniniyak pa nito.

Sandaling nag-isip si Jade.

Kung tatanggapin niya ang alok ni Dave, hindi na niya kailangang maghanap pa ng trabaho agad-agad. Pero depende iyon kung hanggang kailan siya magpi-pretend bilang nobya nito. Bukod pa doon, sa panahon ngayon, mahirap maghanap ng trabaho. Kaya siguro ang mas praktikal na kilos ay ang tanggapin nalang ang alok ni Dave lalo na at sinabi nitong may kontrata naman pala sila.

“G-Gaano katagal ba akong magpapanggap na girlfriend mo kung sakali?” tanong niya nang mahimasmasan.

“Tatlong buwan, iyon, okay na siguro iyon para mapapaniwala ko siya. Anyway, palalabasin ko naman sa kanya na matagal na tayo,” anito.

“Okay, basta walang mangyayari sa atin, isama mo iyon sa kontrata. Bawal ang kiss at, you know, hanggang holding hands lang, at kailangan kapag nasa harapan lang niya tayo magpapanggap,maliwanag ba?” tanong niya.

Amuse ang titig na ipinukol sa kanya ng lalaki. “Bakit hindi ka pa ba nagkakaboyfriend kaya ayaw mo nang may kiss?” tanong nito sa kanya.

Mabilis na pinamulahan doon si Jade. “Alam mo ikaw, may pagka salbahe rin iyang bunganga mo eh. Wala ka nang pakealam doon,” aniyang nagsasalubong ang mga kilay.

Umangat ang sulok ng labi ni Dave at iyon ang timing na nakita niya. “Iyan ang isa sa mga nagustuhan ko sa iyo, ang pagiging palaban mo. I wonder kung ganyan ka rin sa---,”

“Hey!” maagap niyang saway.

“Sorry,” ani Dave bagaman hindi ito nakangiti ay bakas parin sa mga mata nito ang matinding amusement para sa kanya. “Ganito talaga ako, kaya masanay ka na, tatlong buwan lang naman. Anyway may isang importante bagay pala akong gustong sabihin sa iyo, itatanong ko lang kung gusto mong ipasama ko iyon,” anito.

“What is it?” tanong niya.

“You better make sure you will not fall in love with me,” anitong sinundan ang sinabi ng mahinang tawa.

Umikot ang mga mata ni Jade sa narinig. “Madali lang iyon kaya huwag kang mag-alala,” sagot niya sa tono na may katiyakan.