CHAPTER SIX: HIS FIANCEE

TATLONG buwan na ang nakakalipas buhat nang tinanggap ko ang kontrata kay Sir Kyle. Nakasaad sa kontratang iyon na dalawa ang aking trabaho: ang pagiging secretary at lover niya. Sa simula ay kabado ako dahil mahigpit ang bilin niya sa akin na hindi ako puwedeng malaman ng kahit sino kung ano ang aming relasyon. Hindi rin ako puwedeng magbuntis kaya sinisiguro namin na may proteksyon kami sa lahat ng oras. Alam din niya kung kailan mas malaki ang posibilidad na ako ay magbuntis.

“Maghanda ka mamaya, pagkatapos ng aking dinner meeting ay sa hotel na tayo tutuloy,” sabi ni Sir Kyle sa akin habang inaayos ko ang mga dokumentong kailangan niya.

Tatango na sana ako nang naalala ko na mayroon siyang ibang schedule para sa oras na iyon. Tiningnan ko kung ano ang nasa aking planner upang alalahanin kung ano ang nasa kaniyang schedule.

“What? Hindi mo ba naintindihan ang aking sinabi?” sunod-sunod na tanong ni Sir Kyle sa akin.

Isang iling ang aking isinagot, “Sir Kyle, hindi tayo puwedeng magkita ngayon dahil makikipagkita ka kay Ma’am Jessica. May scheduled interview kayo sa press.”

“Cancel it,” utos ni Sir Kyle sa isang malamig na tinig.

“Sir, hindi ko po puwedeng gawin ang inyong sinasabi. Makakahalata si Ma’am Jessica kung hindi ka magpapakita mamaya.”

Isang malalim na hininga ang pinakawalan ni Sir Kyle. Alam kong may sasabihin siya sa akin ngunit hindi iyon natuloy dahil narinig namin ang isang boses na pamilyar sa kaniya. Dumating nang walang pasabi ang kaniyang fiancee na si Ma’am Jessica.

“Ano ang ginagawa mo rito? Ang akala ko ay mamayang gabi pa tayo magkikita,” sabi ni Sir Kyle na halata kong pinipilit na gawing kaswal ang boses.

Nginitian muna ako ni Ma’am Jessica bago hinarap si Sir Kyle, “Kilala kita at alam kong ipapa-cancel mo ulit sa iyong secretary ang iyong schedule para mamayang gabi. Nagpunta ako rito para paalalahanan ka na kailangan mong magpanggap ngayong gabi.”

“Bakit magpapanggap pa ako mamayang gabi kung alam nating pareho na sa isang kasal ang naghihintay sa ating dalawa?” tanong ni Sir Kyle kay Ma’am Jessica.

“Dahil wala tayong ibang mapagpipilian?” patanong na sagot ni Ma’am Jessica bago pa man siya humarap sa akin. “Tell me the truth, gusto bang ipa-cancel ng iyong boss ang schedule niya para mamayang gabi?”

Ibubuka ko ang aking bibig nang biglang nagsalita si Sir Kyle.

“Leave Jean Antoinette alone,” sabi niya sa isang iritableng tinig. “Hindi mo na siya kailangang tanungin pa.”

Nangunot ang aking noo nang napansin ko ang pagsilay ng isang ngisi sa labi ni Ma’am Jessica, “Wala akong ginagawang masama sa kaniya. Tatanungin ko lang siya kung may iba kang schedule tonight.”

Isang malalim na hininga ang aking pinakawalan, “Kinumpirma na sa akin ni Sir Kyle na mayroon kayong schedule ngayong gabi at gusto niyang siguraduhin na magiging maayos ang inyong interview para mamaya.”

Napatango si Ma’am Jessica, satisfied siya sa aking sagot, “Mabuti kung ganoon. Well, hindi ko na kayo guguluhin pa at alam kong busy rin kayo ngayong araw.”

Ramdam ko ang masamang tinging ibinibigay sa akin ngayon ni Sir Kyle pagkaalis ni Ma’am Jessica. Halata kong naasar siya sa nangyari dahil pinagdiinan ko sa kaniya na mas mahalaga ang lakad nilang dalawa ni Ma’am Jessica kaysa sa palihim naming pagkikita sa hotel na madalas naming puntahan.

“Sinusubukan mo ba ang aking pasensiya, Jean Antoinette?” tanong ni Sir Kyle sa akin.

“Ginagawa ko lang po ang aking trabaho, Sir,” sagot ko sa isang pabulong na tinig. “Hindi mo rin gugustuhing maisiwalat sa publiko ang ating relasyon. Iniingatan ko lang ang iyong reputasyon.”

“Fine, you win. Hindi tayo magkikita ngayong gabi,” saad ni Sir Kyle sa akin. “Siguraduhin mo lang na matatapos mo ang design na ipinapagawa ko sa iyo.”

Isang malalim na hininga ang aking pinakawalan, “Naiintindihan ko, Sir Kyle.”

“Another thing, siguraduhin mo rin na libre ang aking schedule bukas ng gabi,” utos ni Sir Kyle. “I do not need your sorry excuses tomorrow.”

Kung hindi ko boss si Sir Kyle ay siguradong nairapan ko na siya kanina. Pinigilan ko ang aking sarili at isang ngiti ang aking isinagot.

“Wala kang maririnig na excuse sa akin bukas,” paniniguro ko sa kaniya.

Kinagabihan, nakita ko sa tv ang interview nina Sir Kyle at Ma’am Jessica. Napailing ako lalo na at alam kong nagpapanggap silang dalawa sa harap ng camera. Sa unang tingin ay mapagkakamalan kong in love sila sa isa’t isa dahil sa sweetness na ipinapakita nila. 

Habang busy ako sa panonood ng kanilang interview ay nag-ring ang aking phone. Nangunot ang aking noo nang nakita ko ang pangalan ni Sir Kyle.

“Finally!” sambit ni Sir Kyle nang sinagot ko ang kaniyang tawag.

“Sir, bakit napatawag kayo?” tanong ko sa kaniya. “Ang akala ko ay hindi mo ako tatawagan after office hours.”

“Magkita tayo sa hotel. You only have ten minutes to prepare,” sabi niya bago ibinaba ang phone.