Kabanata 0004

“Alam mo na ba na niloloko ka ng asawa mo, Luciana?”

Si Danica Alcantara, ang best friend ni Luciana ang nasa kabilang linya at may pinapaalam sa kanyang balita.

“Nakita ko sa balita kanina ang tungkol diyan at magkasama sila ng sikat na singer na si Liezel Rivero. Ang sabi-sabi ay buntis ito at at nakita pa sila sa isang ospital. Halos sila ang laman ng mga balita ngayon kaya tingnan mo para malaman mo ang totoo!” dagdag na sabi ni Danica sa kanya.

Sandaling nanikip ang dibdib ni Luciana at hindi alam ang gagawin. Kalaunan, kinuha niya ang cellphone upang tingnan ito.

Ang una niyang binuksan ay ang Facebook at doon, maraming mga pictures na nakakalat tungkol kagabi kung saan magkasama sina Maximo at Liezel sa isang ospital.

Si Maximo Guevarra ay ang CEO ng Guevarra's Company. Makapangyarihan at mayaman ay hindi na kataka-taka na palagi siyang nangunguna sa listahan sa pinakakilalang CEO sa bansa. Hindi na rin bago na ang kanyang pribadong buhay ay talaga namang nakakaakit sa mata ng lahat.

Ang mga pictures niya na kasama ang isang babae sa isang prenatal check-up ay parang bomba na sumabog sa lahat ng mga balita ngayon. Tuluyan na ngang inungkat ng internet ang buhay ni Liezel.

Si Liezel Rivero ay kilalang mang-aawit sa USA, at siya ang kasintahan noong kabataan ni Maximo na sinasabing malalim daw ang kanilang pinagsamahan. Ngunit, makalipas ang ilang taon, nagpunta ito ng ibang bansa para mag-aral. Si Maximo naman ay matapat na naghintay sa kanya ng halos isang dekada.

Ngayon na nagbalik na si Liezel Rivero, tuluyan na ngang nagkita ang kilalang CEO at ang kanyang unang minahal. Walang sinuman ang makakapigil sa kanilang pagkikita.

Lahat ng mga tao na nasa internet ay sobrang namangha sa kanilang magandang kwento ng pagmamahalan at sa loob lamang ng ilang oras ay nadagdagan nang halos tatlong milyon ang followers ni Liezel sa lahat ng kanyang account.

Ngayon, nalaman na rin ni Luciana ang totoo kung saan nakuha ang atensyon niya sa lugar na pinanggalingan ni Liezel at pilit itong iniugnay sa sinasabi ng kaibigan ni Maximo noon.

‘Ikaw pala ang tinutukoy na unang minahal ni Maximo, ha?’ ani Luciana sa kanyang isip.

Hindi niya rin napigilan na maglabas ng isang mapait na tawa dahil sa kanyang mga nalaman.

“Nakita mo na ba, Luciana? Alam mo, napakawalang kwenta talaga ng internet ngayon at sobrang nakakagalit. Nanggigigil ako sa kanila kaya kailangan ko silang sawayin!” galit na sabi ni Danica sa kabilang linya.

“Huwag na, Danica. Alam ko naman ang tungkol diyan, e,” sagot ni Luciana at agad na pinigilan ang kaibigan sa tangkang gagawin nito.

“Alam mo ang tungkol dito?” tanong ni Danica upang linawin ito sa kanya.

“O-Oo, alam ko,” tipid na sagot ni Luciana sa kaibigan.

“Ano'ng nangyayari sa ‘yo, Luciana? Bakit mo hinahayaan na makipaglandian ang asawa mo sa ibang babae? Hindi ba dapat mo harapin ang babaeng gustong sumira sa pagiging asawa mo!?” galit na usal ni Danica at hindi makapaniwala sa ginawa niya.

Nagbuntong-hininga na lamang si Luciana at sinabing, “Hindi mo ba nakita kung ano ang sinasabi ng mga tao sa internet? Ang babaeng ‘yon ay matagal na hinihintay ni Maximo at siya ang tunay niyang minahal.”

“Wala akong pakialam kung siya man ang naunang minahal ni Maximo. Kabit pa rin siya at sa mata ng lahat ay mali ‘yon!” singhal na sagot ni Danica.

“Kalimutan mo na ‘to, Danica,” nanghihinang saad ni Luciana sa kaibigan at nagpatuloy, “Matagal na walang kwenta ang kasal ko sa kanya sa simula pa lang at isa pa, pagod na rin ako.”

Isa rin sa dahilan kung bakit ayaw niyang pansinin ito ay dahil hindi siya makakapayag na bumaba para lang makipag-away sa isang kabit. Kapag gumawa siya ng eskandalo, malalaman ng lahat ang tungkol sa kanilang magulong pagsasama.

Sa kabila ng lahat, ayaw ni Luciana na dumihan ang relasyon nila ni Maximo ng putik.

Samantala, ilang minuto namang natahimik si Danica bago muling magsalita.

“Ano na ang plano mo ngayon? Mananatili ka pa rin ba sa pagsasama niyo o hihiwalayan mo na siya?” tanong sa kanya ni Danica.

“Hihiwalayan ko na siya.”

Walang pagdadalawang-isip si Luciana nang sagutin niya si Danica sa tanong nito.

Napayuko naman si Luciana at dumako ang kanyang mga mata sa dextrose na nakakabit sa kamay niya. Sa kabila pa man ng pinagdadaanan niyang sakit ngayon, mas pinili pa rin ni Maximo na samahan si Liezel, at napuno na siya. Napagod na siya.

“Kung wala sa ‘kin ang pagmamahal niya, wala na akong planong pilitin pa siya,” ani Luciana sa kanyang nanghihinang boses.

“Tandaan mo, nasa tabi mo lang ako palagi. Marami ka pa na mahahanap na mga lalaki at siguradong maghahabol sa ‘yo dahil maganda ka. Huwag mo na sayangin ang sarili mo sa isang walang kwentang tao tulad ni Maximo, Luciana,” tugon ng kaibigan na si Danica kaya napangiti siya.

“Salamat sa pagdamay sa akin, Dani,” ani Luciana sa kaibigan.

Mabuti na lang ay nandiyan ang kaibigan niya sa mga panahong nasa kadiliman siya at hindi siya nito iniwan.

Pagkatapos ng kanilang tawag, nagpahinga muna saglit si Luciana. Nang maubos na ang kanyang dextrose, nagsimula na maging maayos ang kanyang pakiramdam. Tuluyan na nawala ang pananakit ng kanyang tiyan pero mahina pa rin ang kanyang katawan.

Agad na siyang inuwi ni Manang Bettina at ang personal driver niya sa mansyon. Pagdating ng bahay, agad siyang nagpahinga upang tuluyang gumaling.

Pagsapit ng dilim ay dumating na rin si Maximo. Paghubad niya ng kanyang jacket, agad siyang nagtanong sa katulong tungkol kay Luciana.

“Nasaan ang senyorita mo, Manang Bettina?” tanong ni Maximo.

“Nasa taas na po siya at nagpapahinga, Senyorito,” sagot ni Manang Bettina at nagpatuloy, “Malungkot po siya kanina paggising niya nang malaman na wala kayo.”

Napakunot na lamang ang noo ni Maximo at agad na umakyat sa taas. Nang makarating sa kwarto, ang unang ginawa ni Maximo ay itulak ang pinto nang dahan-dahan.

Nakita niya ang asawa na nakahiga sa couch habang ang kanyang itim at mataas na buhok ay nakalugay patungo sa sahig. Mas lalo siyang nagmukhang mahina sa ganoong posisyon.

Muling napakunot ang noo ni Maximo nang may biglang pumasok sa kanyang isipan.

‘Kung may gastritis siya, bakit sa couch niya naisipang matulog?’