Kabanata 19

Blair Castro

PASILIP-silip ako sa kabilang bahay habang mahigpit na hawak ang cellphone ko. Galing ako sa laundry shop at pagbalik ko ay wala ang kotse ni Lukas sa tapat. Holiday ngayon kaya walang pasok sa school pero may activity ako na ibinigay kina Lira na galing sa lesson plan na iniwan ng talagang guro nila. Gusto kong makita kung paano gagawin ni Lira ang family tree at mukhang ngayon na ang chance ko dahil wala ang kotse ni Lukas—baka umalis siya saglit.

Mariin kong pinagdikit ang mga labi ko at sumilip sa bukas na pinto ng bahay mula sa gate. Nakita ko si Lira na nasa living area habang nakaupo sa sahig at may ginagawa sa coffee table.

Napangiti ako at akmang tatawagin siya nang may humarang sa tinatanaw ko.

Nanlaki ang mga mata ko nang salubungin ako ng luntiang mga mata ni Lukas. Kunot ang kaniyang noo habang nakahalukipkip at bahagyang nakatagilid ang ulo