Chapter 5: Tripping

TUMANGO LANG NAMAN ang dalawa nilang kasama pa bilang pagsang-ayon, nakangisi na noon nang malaki. Nauunawaan iyon ni Fae dahil halos nawala na siya sa ganitong gathering nila pagkatapos ng kanyang kasal. Ano pa bang ipagtataka niya sa opinyon ng mga kaibigan? Para kay Jago, tinalikuran niya na ang kanyang social circle para lang sa gago.

“At dahil diyan, kailangan mong uminom ng welcome shot!” si Maya na inabot na ang cocktail drinks nito.

Walang gatol na tinanggap iyon ni Fae, nilagok hanggang sa tuluyang maubos. Namilog ang mata ng tatlong kaibigan na nakasaksi sa pagiging uhaw niya.

“Ayon! Wala pa ‘ring kupas ang isang Felicity Gambello.” korong saad nila na pumalakpak pa.

“Fae, kung hindi ka sumipot sa pagkakataong ito, iniisip ko kung dumalo ba ako sa kasal mo o sa libing mo limang taon na ang nakalilipas.” lambing ni Akira.

“Oo nga, kahit ako nagulat. Wala ka bang pa-candle light dinner ngayon kasama ang asawa mo ha? Anniversary niyo at iyon ang laging senaryo niyo.” si Lia na may mausisang mga matang nakatunghay pa.

“Wala—”

“Aba isa na namang himala!” si Maya na hinila na si Fae upang makaupo na sa kanilang table tabi, sumalo.

“Huhulaan ko, nagsawa ka na? Sabi sa’yo eh, sa una lang masaya ang pag-aasawa.” himok muli ni Lia.

Sinubukan ni Lia na tingnang mabuti ang kanyang mga mata. Hindi pa nakuntento doon ang kaibigan na hinawakan pa iyon upang mas suriin ng malapit. Pinalo na ni Fae ang kamay ni Lia at Akira na kung makabukas ng kanyang mga mata animo wallet lang upang kumuha ng pera. Natawa na doon si Maya.

“Tanggalin niyo nga ang kamay niyo, masisira ang false eyelashes ko ano ba ‘yan?! Pinaghirapan ko eh!”

Napuno pa ng malakas na tawanan ang table nila.

“Gagi, ano bang hinahanap niyong dalawa sa mata ni Fae? Kung makabukas kayo parang wallet lang ah.” ‘di pa rin maka-move on dito sa tawang tanong ni Maya.

Sa kanyang nakaraang buhay, ang pamilya niya ay winasak ni Jago na nahuhumaling sa pag-ibig noon kay Odessa. Ang tatlong kaibigan ang tumulong sa kanya upang bumangon at huwag bumigay ang katawan. Doon niya napatunayan na tunay nga silang mga kaibigan. Hindi lang sa mga panahong maganda ang sikat ng araw, maging sa tag-ulan ng problema ay naroon din sila. Hinding-hindi malilimutan ni Fae ang katapatan nila. Kaya naman binanggit ng babae sa kanila na gusto niyang hiwalayan si Jago. Hindi na niya iyon inilihim pa. Maliban na lang sa katotohanang muli siyang bumalik sa nakaraan. Pinanatili ni Fae na lihim iyon at sarili lang may alam.

“Tama lang iyan, kung hindi ka na masaya bakit magtatagal ka pa? Pilitin mong palayain ang sarili. Tayong mga babae, hindi natin kailangang magtiis.” si Maya na para bang relate na relate sa mga sinasabi.

“Oo nga, kung alam mo namang hindi ka niya kayang suklian ng pagmamahal na binibigay mo anupa’t magtitiis ka? Go, Felicity! Nasa likod mo lang kami.” si Akira na marahang hinagod pa ang bukas na likod ni Fae, napangisi na ang babaeng noon lang ito napuna. “Ang wild ha? Burles queen ka ba ngayong gabi, Fae?”

“How about you, Lia? Anong masasabi mo?”

Bumaling na ang tatlo sa kanya na tahimik umiinom.

“Cheers!” taas nito sa kanyang hawak na baso, walang masabi dahil nasabi na ng mga kasama nila lahat. “Ipagdiwang na natin ngayon pa lang ang tagumpay mong makaalis sa puder ng asawa mo. Uminom tayo hanggang sa maubos ang ating ulirat ngayong gabi!”

“Cheers!” sabay-sabay nilang taas ng baso.

Ngayon pa lang ay nakikita na ni Fae ang sarili pagkatapos hiwalayan si Jago, ang kalayaang tahakin ang daan patungo sa panibagong buhay na hindi kasama ang lalaki. Iiwan niya ng tahimik ang trahedya ng nakaraan niyang buhay at aayusin ang sarili. Kung kinakailangang maging matandang dalaga siya, gagawin niya upang hindi lang mapahamak. O kung kaya naman ay gumamit ng ibang lalaki. At sisiguraduhin niya iyong mangyayari. Walang makakadlang dahil ayaw na niyang maulit ang nangyari sa nakaraan. Hindi na siya magiging maramot para sa kanyang sarili. Pagbibigyan niya itong huminga at lumaya. Gawin ang lahat na ng nais.

“Para sa pakikipaghiwalay ni Fae!”

“Cheers!”

“Para sa panibagong buhay!”

“Cheers!”

Pagkatapos ng ilang baso ng cocktail ay medyo nalasing na ang apat na babae. Mabilis na lumakas na rin ang loob ng apat na magkakaibigan. Tinapik ni Maya ang isang balikat ni Fae upang kausapin ito.

“Pagmasdan mo ang paligid, may mga gwapo ba na gusto mo? Huwag kang matakot, sige lang lumandi ka. Ako ang bahalang pagkilalanin kayo. Ako ang magiging cupid niyo. Lagi na lang gumagawa ng mga eskandalo si Jago, hindi tayo sa kanya magpapatalo!”

Napabuntong-hininga si Fae, ininspeksyon na ang paligid ng nanlalabo niyang mga mata. Dumapo ang mga mata niya sa isang matangkad at payat na pigura hindi kalayuan. Base sa kanyang pananamit, mukhang bata pa siya sa kanila. Isang estudyante sa kolehiyo? Hindi niya matukoy kung tama ang hula. Sinundan ni Maya ang tinitingnan niya at napangiti.

“Kung makakahanap si Jago ng babaeng estudyante sa kolehiyo, makakahanap ka din ng lalaki. Patas na kayo.” patuloy ni Maya habang abala si Lia at Akira sa kung anuman ang pinag-uusapan doon ng dalawa.

Tumawa si Fae, inilihis na ang mga mata. Hindi niya sinabing babaero ito kaya naman ay hihiwalayan niya.

“Ganito ang gawin mo, kunwari matatapid ang paa mo. Doon mo gawin sa malapit sa kanilang banda ha?” briefing pa ni Maya na ikinatawa na ni Fae dito. Excited na ang babae sa mga kalokohan niya. “Huwag mo akong tawanan, proven at tested iyan nitong dalawang ito. Hindi ka na kasi updated sa mga gala.”

“Oo na,” kasa niya na biglang mas naging excited.

Sa gabing iyon, wala siyang ibang iisipin. Wala siyang asawa, malaya siya. Hindi masama ang gagawin niya.

“You're wish is my command, Maya.”

Tumayo na si Fae, inihanda na ang kanyang sarili sa pamemeke ng pagkatisod. Mahigpit ang hawak niya sa baso ng inumin. Baka kasi mamaya ay mabitawan niya at mabasag, makaaksidente pa siya o siya ang masugatan noon kapag nagkataon at hindi nag-ingat. Nang gawin niya ang napag-usapan nila ni Maya, biglang may humawak sa kanyang isang braso. Tila slowmotion niya itong nilingon gamit ang inosente niyang mukha, tiningnan na ang lalaki ng malagkit.

“Oops, careful!” may diin nitong sambit pero banayad.

“Sorry..”

Ngumiti lang ang lalaki na sa paningin ng apat na magkakaibigan ay gwapo, papasa na sa panlasa nila.

“You want some drinks? Treat ko…”

Nasapok na ng tatlong kaibigan ni Fae ang kanilang noo. Ang usapan lang nila ay magpapapansin siya hindi mag-aalok na parang hinihimok itong maging instant asukal de mama siya ng lalaking kausap niya.

“Pambihira, nasa script niyo ba iyon?” si Lia na dinampot na ang inumin, siya ang kinakabahan dito.

“Wala, talaga naman ‘tong si Fae.” iling ni Maya sa biglaang diskarte ng kaibigang halatang lasing na. “Hindi siya papasang maging artista. Kulang sa utak.”

“Hayaan niyo lang siyang mag-enjoy. Iyon naman ang pinunta niya dito. Tingnan niyo nga, ang saya niya.” si Akira na hindi inaalis ang mga mata sa kaibigan nila.