Prologo

THIRD PERSON's POV

"Ah, basta! Ako ang magiging asawa mo! Sa ayaw at sa gusto mo, Vaughn Matthew!" tiwalang sambit ni Sam na may halong pagbabanta sa harapan ng barkada ng kuya niya, kaya naman mahinang natawa ang mga ito kasama na iyong binatilyong magiging asawa raw niya.

"Samantha, doon ka nga sa room mo! Isusumbong kita kila Mommy at Daddy! Ang bata-bata mo pa kung ano-ano na iyang pinagsasasabi mo!" saway naman ni Samuel sa bunsong kapatid na nasa edad sampung taon pa lamang at nasa elementarya, samantalang sila ay nasa disiotso na at pawang mga college students na.

"Si Kuya naman e! Dapat nga suportahan mo ko sa pangarap ko! Ayaw mo no'n magiging bayaw mo itong si Vaughn na kaibigan mo naman!?" pumapadyak pa ang mga paang katwiran ni Sam

Kaya natawa na naman ang mga kaibigan ng kanyang kuya na sina Medel, Boogie, Raven at isama pa nga si Vaughn. Busy ang mga ito sa paggawa ng mga school projects kaya nandirito ang mga ito sa bahay nila.

"Anong pangarap ang sinasabi mo riyang bata ka!? Baka pantasya! Hindi ka pa nga marunog magligpit ng kama mo pag-aasawa na agad iyang nasa kukote mo!" sermon pang wika ni Sammy sa kanya

"Ouch! Kuya! Yaya! " mangiyak-ngiyak na daing ni Sam nang itulak siya ng bahagya ng kuya niya palayo sa mga kaibigan sabay tawag sa kanyang tagapag-alaga.

"Tama na 'yan, bro! Hindi ka na nasanay sa nakakabata mong kapatid." Awat naman ni Vaughn sa kanya at tumayo pa tsaka nilapitan si Sam para aluin.

"Tsk! Kaya lumalaki ang ulo niyan kasi kinukunsinte mo, akala naman niya may gusto ka rin sa kanya!" Pahayag pa ni Samuel, natawa lamang ng bahagya ang iba nilang kaibigan samantalang si Vaughn ay pilit pinapatahan si Sam.

"Hate ko talaga iyang si Kuya!" mahaba ang ngusong sumbong pa ni Sam kay Vaughn, niyapos pa kasi siya nito para lamang tumigil sa pag-iyak.

"Ano nangyari!?" Bulalas na sambit at bakas sa mukha ang pag-aalala sa Yaya ni Sam nang makalapit ito sakto namang may bitbit na isang basong tubig galing sa kusina kaya pinainom agad ang kaniyang alaga

"Pinagalitan na naman po ng kuya niya." Si Vaughn na ang sumagot sa pag-uusisa ni Yaya Joy

"Ganoon ba? Sige, salamat, Hijo, papasok na kami sa room niya para makapagpahinga." Paalam naman ng Yaya at hinila na si Sam sa braso habang hawak nito ang basong may laman pang tubig

" Sige po, Yaya. H'wag ka nang magalit sa kuya mo!" ginulo pa ni Vaughn ang buhok ni Sam bilang paglalambing

"Hmmp!" Pairap namang tugon nito tsaka sumunod sa tagapag-alaga.

"Kuu! Kaya lumalaki ang ulo ni Sam e, inaamo mo kasi! Kunwari pang walang gusto baka naman nahihiya ka lang kay Sammy na aminin!?" Kantyaw ni Raven sa kanya nang makabalik na sa umpukan ng mga kaibigan si Vaughn

"Loko! Baka naman makasuhan ako ng child abuse niyan!? Naaawa lang ako sa bata kayo talaga! Parang hindi kayo dumaan sa ganoong edad na may mga crush-crush na!" Katwiran pa niya

"Sabihin mo lang, bro kung may gusto ka sa little sister ko. Para itakwil na rin kitang kaibigan!" Pagbabanta naman ni Sammy na dumilim ang mukha.

"Bro, relax! Ikaw na rin ang maysabing bata pa nga ang kapatid mo! Hindi dapat siniseryoso! My God, she's only ten years old! Ano ba naman ang malay ng bata sa pag-aasawa!? Baka nga paglaki niya mahiya pa sa atin at pagtawanan lamang ang kalokohang pinagsasasabi niya ngayon!" Naiiling pang paliwanag ni Vaughn

"Dapat kasi umiiwas ka na, bro! Baka akala niya may pagtugon ang nararamdaman niya dahil mabait at sweet ka sa kanya." Pahayag naman ni Medel

"I agree!" Sang-ayon naman ni Boogie

"Okay! Okay! Para matigil na kayo ay sige, simula ngayon ay iiwasan ko na si Sam." Pangako naman ni Vaughn

"Good!" Wika pa ni Sammy at pinagdikit pa nila ang mga kamaong nakatikom bilang pag-seal ng kanilang usapan.

"Dapat dalangan na rin natin ang pagpunta rito para hindi nakikita ni Sam itong si Vaughn." Suhestyon naman ni Boogie

"Pwede! Pwede!" Tatango-tango namang pag-sang-ayon ni Sammy

Pinagpatuloy na nga nila ang ginagawang school project dito sa garden ng bahay nila Samuel. Pawang nakasuot pa sila ng school uniform dahil dito na nga sila dumiretso pagkatapos ng kanilang klase sa university.

"Ano na naman ang ginawa mo at nagalit ang kuya mo sa'yo?" Malambing na tanong ni Yaya Joy sa kanya habang sinusuklay nito ang mahaba niyang buhok na sing-itim ng gabi, nakaharap sila sa vanity table sa silid ni Sam.

Obvious namang babae ang may-ari nito dahil puro kulay pink ang makikita sa silid. Sa kama mismo pati headboard, bedsheet, punda ng unan at carpet. Pati na ang couch sa isang side ng silid at vanity table niya ay puro pink din ang kulay. Isama pa ang mga stuffed toys na hello kitty na naka-display sa cabinet. Ultimo nga gamit sa bathroom at shower ay iisa ang kulay.

"Sinabi ko lang po na si Vaughn ang gusto kong maging asawa!" Mahaba ang ngusong tugon niya kaya mahinang natawa ang kanyang Yaya

"Ikaw talagang bata ka! Kaya magagalit sa'yo ang kuya mo! Ang babae kasi ang dapat na nililigawan hindi sila ang nanliligaw o unang nagbibigay ng motibo." Paliwanag namab nito

"Paano po kung nahihiya iyong guy na umamin tapos naghihintay lang si girl na una siyang magtapat?" Tila matanda pang tanong ni Sam, nakatingin siya sa kanyang Yaya sa repleksyon nito sa salamin.

"Aba! Kailangang maghintay ni girl, hindi kasi tama iyon bilang dalagang pilipina na mauunang umamin ng pag-ibig sa guy." Tugon sabay paliwanag pa ni Yaya

"Nge! Baka po tumanda na sila pareho pero hindi pa rin nag-aaminan ng kanilang mga damdamin!?" dismayado pang wika ni Sam

"Ikaw na bata ka, ang bata-bata mo pa, alam mo na ang salitang mga iyan!" Pagalit namang sermon ni Yaya sa kanya

Nagkandahaba pa lalo ang kanyang nguso.

"Kaya po siguro hanggang ngayon e single kayo kasi hindi pa nagtatapat ang guy na gusto n'yo, 'no!?" Bungisngis pang wika niya

"Napaka-pilyo mo talagang bata ka! Pati iyon e nalalaman mo pa! Bad iyon! Dapat paglalaro muna ang inaatupag mo!" Sermon nito sa kanya at pinandilatan siya ng mga mata sa repleksyon niya sa salamin kaya natawa lamang siya at hindi na kumibo

"Tingnan ko nga ang sinagutan mong assignment? Bumaba lang ako sandali sa kusina sumunod ka na agad sa akin at nanggulo ka pa sa kuya mo at mga kaibigan niya!" sermon pa nito pagkatapos siyang suklayan

Tumayo naman siya at tinungo ang leather couch at naupo roon tsaka binuksan ang school bag na nakapatong sa center table na yari sa salamin.

Kinuha ang mga notebooks tsaka iniabot sa kanyang Yaya. Isa-isa namang binuklat nito ang kwaderno ng alaga tsaka nga tiningnan ang mga assgnment niya.

"Good! Pwede ka na manood ng telebisyon. Mamaya na tayo bumaba kapag wala na riyan ang mga kaibigan ng kuya mo. Baka manggulo ka na naman!" Saad pa nito at siya na ang nagbalik ng nga notes ng alaga sa loob ng bag kaya hindi niya nakita ang pagsimangot ng mukha ng kaniyang alaga.

Pagkatapos ay dinampot ang remote control na nakapatong din sa center table tsaka ini-on ang telebisyon. Ilang sandali pa ay tutok na tutok na silang nanonood ng cartoon na palabas.

Naistorbo lamang nang tawagin sila ng isang kasambahay.

"Kakain na." aya sa kanila ng kasambahay nang isinungaw nito ang ulo pagkatapos kumatok habang hawak pa ang doorknob

"Nandiyan pa ba ang mga kaibigan ni Sammy?" Usisa muna ni Yaya

"Kakaalis lang, sakto namang dumarating sila Ma'am at Sir kaya nagpahain na ng hapunan." Tugon naman ni Sarsi na may halong paliwanag

"Sige, susunod na kami nitong alaga ko." Wika pa ni Yaya Joy

"Okay!" Tugon pa ni Sarsi sabay talikod, hindi na nito isinarado ang pinto dahil lalabas din naman ang mag-yaya.

Ini-off na nga ng tagapag-alaga ni Sam ang telebisyon at sabay na silang lumabas ng silid.

"Yaya, isusumbong po kaya ako ni Kuya kila Mommy at Daddy?" Bakas sa maamo at batang mukha ni Sam ang takot at pag-aalala.

Naglalakad na sila sa hallway pababa ng hagdan. Hawak kamay pa silang dalawa.

"Naku! Ngayon ka kinakabahan! Samantalang kaninang kausap mo si Vaughn at kuya mo e hindi ka natatakot!?" Sermon pa nito kaya nagkandahaba na naman ang nguso ni Sam pero hindi na siya sumagot pa hanggang sa makababa sila sa dining room.

"Good evening, Daddy, Mommy!" Magiliw namang bati ni Sam sa mga magulang at hinalikan ang mga ito sa mga pisngi

"Good evening too, anak! Upo na at nang makakain na tayo." Malambing namang wika ni Ginang Amanda

Tumabi naman siya sa Mommy niya nang upo, nasa kabisera ng dining table si Ginoong Reynaldo samantalang sa kaliwa nito nakapwesto si Sammy at sa kanan nga si Ginang Amanda at sa tabi niya naupo si Sam.

Ilang sandali pa ay tahimik na silang kumakain habang nasa dirty kitchen ang mga kasambahay. Kahit naman kasi ayain nila ang mga ito ay hindi pa rin sumasabay sa kanilang kumain. Ayaw lamang daw nilang masabihan na abusado kaya kahit papaano ay sila na umiiwas dahil alam naman daw nila kung saan sila lulugar.

"Mom, Dad, may ginawa na naman pong kalokohan si Sam kanina sa harap ng mga kaibigan ko." Sumbong ni Sammy nang nangangalahati na sila sa kanilang pagkain.

Pinandilatan siya ng nakakabatang kapatid pero dinilaan lamang niya ito.

"Ano na naman iyon, Samantha Rose!?" Mariing usisa ng kanilang padre de pamilya, malapit nang magalit dahil tinawag na siya nito sa buo niyang pangalan.

Sa mahinang boses ay inamin nga niya ang ginawang kalokohan. Istrikto kasi ang Daddy nila kaya hindi pwede ang magagaslaw na mga kilos.

"Anong sinabi mo!?" Bulalas na wika nito pagkatapos niyang umamin, at pabagsak na binitawan ang hawak na kubyertos. Kaya lumikha iyon ng ingay na ikinapunta ng mga kasambahay sa living area.

"May gatas ka pa nga sa labi tapos pag-aasawa na agad iyang nasa

isipan mo! Pag-aaral ang atupagin mo hindi kung ano-ano! " sermon pa ni Ginoong Reynaldo

Wala ng nakakontra sa kanilang tatlo bagkus ay pinagpatuloy na lamang ang pagkain hanggang sa maubos na ang nasa kanilang harapan.