CHAPTER 7: Issue

Karamihan sa silid na iyon ay mga lalaking nasa late 40's ang edad. Natitigilan at tila bagong discover na species siya na ine-examine ng mga ito.

"Langyang Vern na ito, malay ko ba naman kasing ipababalandra na ako agad sa lahat." kagat labing niyang sabi sa isip.

"Ito mga matandang ito naman, kala mo naman nasa bumbunan ko si Angeli Khang kung makatingin. Nakakailang na, ha."

Pinisil niya ang daliri sa ilalim ng lamesa ngunit pinanatili niya ang malamig na tingin sa mga ito.

"Buti nalang pasok pa rin sa banga ang make-up ko. Kahit mukhang basahan ang suot ko, slay pa rin."

Pagkatapos ng ilang segundong katahimikan ay may isang lalaking nagtaas ng kamay.

“President, I am sorry to ask, pero.. hindi ba masyadong biglaan ang desisyong ito?”

At sa isang tanong na iyon ay umingay ang paligid.

Kanya-kanyang bulungan na ang mga naroon. Tila gatilyo iyon ng matagal nilang pakikiramdam.

“Mr. President, alam niyong ang paghawak ng kumpanya ay hindi biro. Hindi ba dapat muna itong pag-usapan nang mabuti?”

Ramdam ni Rana ang disgusto ng mga ito sa kanya.

They became shameless. Expressing their disappointment to her. It was very evident to their faces. She was especially younger than Vern and a woman. That's what she thought.

Ang pagiging anak ng mag-asawang Esquivel ay hindi sapat upang ilagay siya sa pinakamataas na posisyon.

Ngunit naiintindihan niya ang mga ito.

Napansin ito ni Vern kaya't sumeryoso ang nakangiti nitong mukha. Nais sanang ipagtanggol si Rana, ngunit agad siyang pinigilan nito.

Tumayo siya sa pagkaka-upo, agad tumahimik at nakuha niya agad ang atensyon ng lahat.

Taas noo niyang tinignan ang mga tao sa kanyang harapan.

“Ladies and gentlemen, allow me to reintroduce myself again. Ako si Ranayah Esquivel, ang isang R sa RR Group of Companies at ang nag iisang may-ari ng R.A.N Financial Consortium.”

Sa isang simpleng pahayag, biglang nagbago ang ekspresyon ng maraming tao sa silid. Nagsinghapan ang mga ito.

"Siya pala ang sinasabi nilang "little Rean" ng pamilya Esquivel!"

"Ang pinakamamahal na kapatid ng Young Master, Ruan!"

"Talaga palang ipinangalan sa kanilang magkapatid ang kumpanya. Akala ko ay Russo at Rean ang ibig nitong sabihin." bulong-bulong ng isang apprentice sa isa pang apprentice.

“Narinig ko na kahit noong nag-aaral pa lang siya sa kolehiyo, nakapagtayo na siya ng sariling fashion brand at nanalo pa ng mga international awards. Pagkatapos, matagumpay niyang na-handle ang kanyang investment sa stock market kaya nakabili ang ilang matagal nang kilalang kumpanya tulad ng Gu Group at Lin Group. Isang tunay na alamat sa industriya!”

"Hindi ko akalain na siya pala iyon!"

Tatlong taon na ang nakalipas mula noong huling narinig ng mga tao ang tungkol kay Rana.

Inisip siguro ng mga ito na nanirahan na siya sa Europa para i-pursue ang fashion industry.

Kaya hindi nila alam kung sino talaga ang tagapagmana ng RR Group dahil hindi rin naman nagpapakita rito si Ruan.

Ngunit walang sinuman sa industriya ang hindi nakarinig ng pangalang "little Rean" mula sa pamilya Esquivel.

Si Rana ay isang makinang na bituin noon sa business world.

Ngunit dahil sa kanyang pagpapakasal kay Bryson, ay tinalikuran niya ang lahat ng ito.

Ang kanyang pagkawala sa industriya ang naging dahilan kung bakit hindi agad siya nakilala ng mga tao.

Isa pa, mayroong mga bagong negosyanteng mas yumabong ang pangalan kaya't tuluyan na siyang nakalimutan ng iilan.

Matapos patahimikin ang mga usapan, mabilis na pinangunahan ni Rana ang pulong at ipinakita ang kanyang kakayahan.

Pagkatapos ng pagpupulong ay inaya siya ni Vern na silipin ang kanyang magiging opisina. 

Pinagmasdan ni Vern si Rana na walang kahirap-hirap na napatahimik ang lahat at nakuha ang kontrol sa sitwasyon.

Masaya siya para sa kanya at, sa parehong oras, palihim na ipinagmamalaki siya.

"She's really back." anito sa isip habang papunta sila sa dati niyang opisina.

Muli silang sumakay sa elevator at pinindot ni Vern ang 40th floor o ‘Penthouse’ kung tawagin.

That floor is exclusive for the President. Ang Presidente lang ang may kakayahang pumasok doon o ang ibang taong pinayagan ng Presidenteng pumasok doon.

"Ngayong bumalik ka na, hindi ka na aalis, tama ba?"

Tinignan ni Vern si Rana sa repleksyon nito sa pinto ng elevator.

Busy ito sa pagbabasa sa mga dokumentong binigay ng mga secretary niya kanina. Napangiti ang lalaki.

"Namiss mo 'yan?" tukso nito.

Tumingala si Rana sa kanya at tinigil ang ginagawa.

"Medyo. Nakakamiss ma-stress sa trabaho."

Nawala ang ngiti ni Vern.

Tila naawa siya rito dahil parang sa asawa nalang niya na-sstress ang babae.

"At sa tanong mo kanina, malapit na akong ma-divorce. Saan pa ako pupunta?" ngisi ng babae.

Narinig ng lalaki mula kay Ruan na nag-file na nga ng divorce agreement si Rana sa kanyang asawa. Ngayon na siya mismo ang nagsabi nito, hindi niya mapigilang makaramdam ng kasiyahan.

Nakawala na siya sa lalaking iyon.

Gayunpaman, alam niyang minahal nang lubos ni Rana ang Deogracia na iyon,  kaya’t tiyak na nasaktan siya sa desisyong ito.

Kaya naman, pinili niyang hindi ipakita ang kanyang kagalakan at sa halip ay nagkunwaring nag-aalala.

"Mas mabuti ngang bumalik ka. Ako at ang kuya mo ang mag-aalaga sa’yo."

Napangiti nang bahagya si Rana at natatawang sumagot.

"Ikaw ang mag-aalaga sa akin? Mas mabuting ayusin mo muna ang lahat ng tsismis tungkol sa'yo!"

"Wala naman akong ginagawang masama ah." natatawa nitong sagot.

"Anong wala? Eh kulang nalang magkaroon tayo ng priority lane sa haba ng pila kanina sa baba!"

"Priority lane?" lalo itong natawa.

"Oo, mukha  tayong namimigay ng relief goods." napapa-face palm na sabi ni Rana.

Humagalpak ito ng tawa.

Nakarating na sila sa tamang floor at isang tap lang sa doorlock ay agad bumukas ang automatic door. Laglag pangang tinignan ni Rana ang magiging opisina niya.

It's not an office! Bahay talaga.

Malawak na tanggapan agad ang bubungad sayo. May malaking led tv sa harap at may grand piano pa sa sulok.

There's a bed on the side while the other side were made of glass. Ceiling to floor. Doon nakapwesto ang kanyang long table at mga kagamitan. Isang ikot ng swivel chair ay matutunghayan niya ang city lights sa ibaba.

Napakaganda!

Ngunit naputol ang pagkamangha niya nang malakas na tumunog ang receiver sa desk. Mabilis iyong pinindot ni Vern. Naka-loudspeaker.

"RR Group, President Vernon speaking, what is it?" aniya.

"Masamang balita, Mr. President! Maraming negatibong balita tungkol kay Miss Rana ang lumabas sa internet! Napakabilis kumalat ng masasamang tsismis at ang publiko ay laban sa kanya ngayon!"

Nagpalitan ng tingin sina Rana at Vern.

Agad na kinuha ni Rana ang cellphone sa bulsa at hinanap ang sinasabing issue sa kanya.

At isang search sa pangalan niya ay mabilis siyang lumabas sa 'popular now'. Iba't ibang post na ang nagkalat.

"Dating asawa ng Deogracia Corporation President, walang kredibilidad at hindi karapat-dapat sa respeto. Nag-demand ng napakalaking bayad kapalit ng diborsyo—isang babaeng sakim at walang hiya!"